Sena Kuli Cikombelo Ncomukonzya Kusyoma?

Ikuti naa cikombelo cimwi cakamutyompya, cilakonzya kumukatazya kusyoma cikombelo cili coonse. Pele amusyome kuti nkocili cikombelo ncomukonzya kusyoma. Ciindi naakali anyika, Jesu wakabunganya nkamu yabasikumutobela basyomeka alimwi akubayiisya kupona kweelana azyeelelo zya Leza. Basikutobela Kristo beni-beni—ibantu ibasolekesya kupona kweelana azyeelelo zya Bunakristo—alino nkobacili. Ino inga mwabajana kuli?

Ba Estelle, ibaambwa kumatalikilo aacibalo, bakaamba kuti: “Ndakatalika kwiiya Bbaibbele ciindi Bakamboni ba Jehova nibakatalika kundiyiisya. Tiicakanditolela ciindi kulumvwisya lugwalo lwa Johane 8:32, ilwaamba kuti: ‘Mulazyiba kasimpe, eelyo kasimpe kalamwaangununa.’”

Ba Ray, abalo ibaambwa kumatalikilo, bakaamba kuti: “Kwiinda mukwiiya Bbaibbele a Bakamboni ba Jehova, ndakazyiba kuti Leza tali nguwe uupa kuti bantu kabapenga. Ndakalumba kuzyiba kuti nokuba kuti Leza ulijisi twaambo tubotu ncalekelede bubi lino, usyomezya kuti ino-ino uyoobugwisya.”

Cakutadooneka, cilakatazya kucita cintu ciluzi kuti bantu banji kabatalilemeki. Pele cilakonzyeka. Bantu banji bayandika kugwasyigwa kutegwa balimvwisye Bbaibbele alimwi akubelesya nzyobaiya. Nkakaambo kaako Bakamboni ba Jehova baleendelezya ziiyo zya Bbaibbele zyaaŋanda zitabbadelelwi kumamiliyoni aabantu nyika yoonse. Nsondo ansondo, bantu banji balaiya cini ncoliyiisya Bbaibbele. Akaambo kaceeci, balaba acilongwe ciyumu a Mulengi wabo, alimwi bapona buumi bukkomanisya. *

Ciindi ciboola mwaakuswaanganya Bakamboni ba Jehova, amukababuzye kaambo ncobabusyomena bukombi bwabo. Amukazilingaule njiisyo zyabo alimwi ampuwo njobajisi. Mpoonya amukalisalile nobeni cikombelo ncomukonzya kusyoma.

[Bupanduluzi buyungizidwe]

[Majwi aakwelelezya sikubala aali apeeji 7]

Amukababuzye Bakamboni ba Jehova kaambo ncobabusyomena bukombi bwabo