MIBUZYO YAMU BBAIBBELE YAINGULWA

Sena Leza ulaiswiilila mipailo yoonse?

Leza ulabaswiilila bantu bamisyobo yoonse. (Intembauzyo 145:18, 19) Ijwi lyakwe, Ibbaibbele, litukulwaizya kumwaambila cintu cilicoonse citulibilisya. (Bafilipi 4:6, 7) Nokuba boobo, imwi mipailo taimukkomanisyi Leza. Mucikozyanyo, kwiinduluka mipailo yakupeta buya takumukkomanisyi pe.—Amubale Matayo 6:7.

Alimwi Jehova taikkomanini mipailo yabantu batyola milawo yakwe acaali. (Tusimpi 28:9) Mucikozyanyo, kaindi, Leza taakaiswiilila mipailo yabana Israyeli ibakajisi mulandu wabujayi. Cilisalede kuti, kuli zyeelelo nzyotweelede kuzuzikizya kutegwa Leza aiswiilile mipailo yesu.—Amubale Isaya 1:15.

Ino ncinzi ncotweelede kucita kutegwa Leza aiswiilile mipailo yesu?

Leza takonzyi kuuswiilila mupailo wesu kuti katunyina lusyomo. (Jakobo 1:5, 6) Tweelede kusinizya kuti nkwali alimwi akuti ulatubikkila maano. Tulakonzya kuyumya lusyomo lwesu kwiinda mukwiiya Bbaibbele, nkaambo lusyomo lwini-lwini luyeeme abumboni alimwi azisyomezyo zijanika mu Jwi lya Leza.—Amubale Bahebulayo 11:1, 6.

Tweelede kupaila kuzwa ansi aamoyo alimwi cakulicesya. Naba Mwana wa Leza, Jesu, wakali kulicesya ciindi naakali kupaila. (Luka 22:41, 42) Aboobo, muciindi cakwaambila Leza ncayelede kucita, tweelede kusoleka kumvwisya zyeelelo zyakwe kwiinda mukubala Bbaibbele. Kuti twacita oobo, tulakonzya kupaila kweelana akuyanda kwa Leza.—Amubale 1 Johane 5:14.

Kutegwa muzyibe zinji, amubone cibalo 17 cabbuku eeli, Ino Ncinzi Cini Bbaibbele Ncoliyiisya?, ilyakamwaigwa a Bakamboni ba Jehova

Mulakonzya kukkopa a Web site ya www.dan124.com

[Cifwanikiso icili apeeji 16]

Nkaambo nzi mipailo imwi ncoitamukkomanisyi Leza?