Kapango aaka kali akati katupango tuzyibidwe kapati mu Bbaibbele alimwi nkekainda kuzubululwa. Kwaambwa kuti aaka nkekapango kalikke “ikapandulula cakusalazya alimwi mubufwaafwi cilongwe Leza ncajisi abantu alimwi anzila yalufwutuko.” Akaambo kaceeci, muzisi zimwi lugwalo oolu lwa “Johane 3:16” kanji-kanji lulalembwa mpolukonzya kuboneka ciindi nokuli zicitika zyaabuleya, atupepa twakubbatika amyootokala, abwaanda, alimwi akumwi buyo.

Tacidoonekwi kuti aabo ibabikka lugwalo oolu mpolukonzya kuboneka balasyoma kuti luyando lwa Leza lulakonzya kubapa kufwutuka kukabe kutamani. Ino nywebo muyeeya buti? Ino luyando lwa Leza lwaamba nzi kulindinywe? Alimwi ino muyeeya kuti Leza ncinzi ncaakacita kutondezya kuti ulamuyanda?

Bantu banji balilibambilide kusyoma kuti Leza nguwakalenga zintu zyoonse alimwi abantu. Zintu zipona zyakapangwa kabotu alimwi munzila iigambya cakuti cileelela kwaamba kuti kuli sibusongo wakazilenga. Buzuba abuzuba bantu banji balamulumba Leza akaambo kacipego cabuumi. Alimwi balizyi kuti Leza alikke nguukonzya kubapa ziyandika mubuumi mbuli meenda, cakulya, alimwi nguupa kuti zintu kazilibambulula anyika, kutegwa bazumanane kupona alimwi akukkomana azintu nzyobacita.

Tweelede kumulumba Leza akaambo kazintu eezyi, nkaambo ncobeni, Mulengi wesu alimwi ngu Sikutupa nzyotuyandika. (Intembauzyo 104:10-28; 145:15, 16; Milimo 4: 24) Tulakonzya kumulumba Leza akaambo kaluyando ndwajisi  kulindiswe twayeeya zintu zyoonse nzyacita kutegwa katuli baumi. Mwaapostolo Paulo walo waamba boobu: “[Leza] nguupa bantu boonse buumi, muya alimwi azyintu zyoonse. Nkaambo walo nguutupa buumi, kweenda akupona.”—Milimo 17:25, 28.

Nokuba boobo, luyando lwa Leza lulatondezyegwa munzila zinji kutali buyo kutulanganya munzila yakumubili. Alimwi watusumpula akutulemeka kwiinda mukutupa kuyandisya zintu zyakumuuya alimwi akutugwasya kuzijana zintu eezyo. (Matayo 5:3) Munzila eeyi, bantu basyomeka baba abulangizi bwakuba cibeela camukwasyi wa Leza, nkokuti kuba “bana” bakwe.—Baloma 8:19-21.

Lugwalo lwa Johane 3:16 lulazumanana kwaamba kuti Leza wakatondezya luyando kulindiswe kwiinda mukutuma Jesu, Mwanaakwe, anyika kuti atuyiisye kujatikizya Usyi, nkokuti Leza wakwe alimwi akutufwida. Nokuba boobo, bantu banji balazumina kuti tabakamvwisyi kaambo ncocakali kuyandika kuti Jesu afwide bantu boonse alimwi alufwu lwa Jesu mbolutondezya luyando lwa Leza. Atulange-lange Bbaibbele mbolipandulula ikaambo Jesu ncaakafwida alimwi ambotugwasyigwa alufwu lwakwe.

Bantu boonse balalangilwa kufwa, aboobo balapenga akaambo kakuciswa, kucembaala, alimwi balafwa. Nokuba boobo, aaya tanaakali makanze aa Jehova Leza kuzwa kumatalikilo. Wakapa bantu bakusaanguna bulangizi bwakupona kukabe kutamani mu Paradaiso anyika. Pele kwakali cintu comwe ncobakeelede kucita: Bakeelede kumumvwida. Leza wakabaambila kuti, kutamumvwida kwakali kuyoobapa kuti bafwe. (Matalikilo 2:17) Mwaalumi wakusaanguna wakazangila Leza, alimwi eeci cakapa kuti afwe alimwi akuti balunyungu lwakwe abalo kabafwa. Mwaapostolo Paulo upandulula kuti: “Cibi cakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.”—Baloma 5:12.

Nokuba boobo, Leza “ulayandisya bululami.” (Intembauzyo. 37:28) Nokuba kuti Leza tanaakacilanga buyo cibi ncaakacita acaali muntu wakusaanguna, eeci tacaambi kuti bantu boonse banoopenga akufwa lyoonse akaambo kakuzanga kwamuntu omwe. Mukwiimpana, kwiinda mukubelesya njiisyo yakulunga “buumi kubuumi,” wakatondezya bululami akupa kuti bantu bamumvwida babe abulangizi bwabuumi butamani alimwi. (Kulonga 21: 23) Mubuzyo ngwakuti, ino mbuti mbocakali kuyookonzyeka kupilusya buumi bulondokede mbwaakasweekelwa Adamu? Bwiinguzi mbwakuti: Muntu umwi wakeelede kupa naa kutuula buumi bweelene ambwaakajisi Adamu, nkokuti, buumi bulondokede.

Cilasalala kuti kunyina muntu uutalondokede walunyungu lwa Adamu wakali kukonzya kupa cituuzyo cili boobo, pele Jesu wakali kukonzya kucita oobo. (Intembauzyo 49:6-9) Jesu wakazyalwa kanyina cibi, wakalilondokede mbubonya mbwaakalondokede Adamu kumatalikilo. Aboobo kwiinda mukwaaba buumi bwakwe, Jesu wakanununa bantu kuzwa mubuzike kucibi. Kwiinda mukucita boobo, wakapa lunyungu lwa Adamu coolwe cakupona buumi bulondokede  mbuli mbobakajisi ba Adamu a Eva aciindi cimwi. (Baloma 3:23, 24; 6:23) Sena kuli ncotweelede kucita kutegwa tugwasyigwe acitondezyo eeci caluyando?

Notulanga-langa alimwi lugwalo lwa Johane 3:16, tujana majwi aakuti “uuli woonse uumusyoma atakanyonyoonwi pele akabe abuumi butamani.” Eeci caamba kuti kuli ncotweelede kucita kutegwa tujane cipego cabuumi butamani. Kutegwa tujane “buumi butamani,” tweelede kusyoma muli Jesu alimwi akumumvwida.

Mulakonzya kulibuzya kuti: ‘Ino makani aakumumvwida aboola buti? Sena Jesu tanaakaamba kuti, “uuli woonse uumusyoma” uyooba abuumi butamani?’ Masimpe cilayandika kuba alusyomo. Nokuba boobo, cilayandika kuzyiba kuti mu Bbaibbele, kusyoma buyo kuti Jesu nkwali tacili ncecintu cilikke ciyandika. Kweelana abbuku limwi lipandulula mabala aamu Bbaibbele, bbala ndyaakabelesya Johane, mumwaambo wakusaanguna lyaamba “ikusyoma ncobeni ikutali kusyoma buyo.” Kutegwa Leza atuyande, tatweelede kuzyiba buyo kuti Jesu Mufwutuli, pele alimwi tweelede kusolekesya camoyo woonse kucita zintu nzyaakayiisya Jesu. Ikuti muntu kataciti eezyo nzyaakayiisya, nkokuti lusyomo lwakwe ndwabuyo. Bbaibbele lyaamba kuti: “Lusyomo lunyina milimo lulifwide.” (Jakobo 2:26) Munzila iimbi inga twaamba kuti, muntu weelede kusyoma muli Jesu, nkokuti weelede kupona kweelana azintu nzyasyoma.

Mwaapostolo Paulo ukapandulula boobu ikaambo aaka: “Nkaambo luyando ndwajisi Kilisito lulatukulwaizya, nkaambo oobu mbotwasinizya, ikuti muntu omwe [Jesu] wakafwida boonse . . . alimwi wakafwida boonse kutegwa aabo bapona kabataciliponeni beni, pele kabaponena yooyo iwakabafwida alimwi wakabusyigwa.” (2 Bakolinto 5:14, 15) Kutondezya kulumba kwini-kwini akaambo kalufwu lwa Jesu kweelede kutupa kubambulula buumi bwesu, nkokuti, kutaliponena tobeni pele kuponena yooyo wakatufwida. Eeci caamba kuti, mubuumi bwesu, tuyandika kubikka mubusena butaanzi kucita zintu Jesu nzyaakayiisya. Kubambulula buumi bwesu munzila eeyi kuyoojatikizya zintu nzyotubikkila kapati maano, nzyotusala alimwi azyoonse nzyotucita. Ino mbulumbu nzi mbobayoopegwa aabo ibasyoma muli Jesu akucita nzyaakayiisya?

Mucibeela camamanino mulugwalo lwa Johane 3:16 tujana cisyomezyo ca Leza kuli baabo ibasyoma mucinunuzyo alimwi akupona kweelana azyeelelo zya Leza. Leza uyanda kuti bantu basyomeka aaba ‘batakanyonyoonwi pele bakabe abuumi butamani.’ Nokuba boobo, kuli bulangizi bwiindene-indene kuli baabo ibayoolongezyegwa aluyando lwa Leza.

Jesu wakasyomezya kabunga komwe kuti kayooba abuumi butamani kujulu. Cakusalazya, wakabaambila basikwiiya bakwe ibasyomeka kuti wakali kuyoobabambila busena kutegwa bakalele anguwe mubulemu. (Johane 14:2, 3; Bafilipi 3:20, 21) Aabo ibayoobusyigwa kutegwa bakapone kujulu “bayooba bapaizi ba Leza aba Kilisito, alimwi bayooba bami balela antoomwe anguwe kwamyaka iili 1,000.”—Ciyubunuzyo 20:6.

Kuli buyo bantu basyoonto akati kabasikutobela Kristo ibapedwe coolwe eeci. Alimwi buya, Jesu wakaamba kuti: “Mutayoowi, nokatanga kaniini, nkaambo Uso wazumina kumupa Bwami bwakwe.” (Luka 12:32) Ino “katanga kaniini” aaka kakali kuyooba kapati buti? Lugwalo lwa Ciyubunuzyo 14:1, 4, lwaamba kuti: “Ndakalanga akubona Mwanaambelele [Jesu iwakabusyigwa] kaimvwi aa Cilundu [cakujulu] ca Ziyoni, alimwi wakali antoomwe abali 144,000 ibalembedwe zyina lyakwe alimwi azyina lya Bausyi ankumo zyabo .  . . Aaba bakaulwa akati kabantu kuti babe micelo mitaanzi kuli Leza alimwi aku Mwanaambelele.” Kuti tweezyanisya mabbiliyoni aabantu ibakapona kaindi, namba eeyi yabantu bali 144,000 ncobeni ‘nkatanga kaniini.’ Bakatanga aaka baambwa kuti mbami, aboobo ino bayoolela bani?

Jesu wakaamba kujatikizya nkamu yabili yabantu basyomeka ibayoolongezyegwa a Bwami bwakujulu. Mbubwenya mbokulembedwe mulugwalo lwa Johane 10:16 Jesu wakaamba kuti: “Ndilijisi mbelele zimbi izitali zyamucaanda ecino; azyalo eezyo ndeelede kuzileta alimwi ziyooswiilila jwi lyangu, eelyo ziyooba itanga lyomwe alimwi zinooli amweembezi omwe.”  Eezyi “mbelele” zilangila kuyoopona kukabe kutamani anyika—bulangizi mbubonya mbobakajisi ba Adamu a Eva. Ino tuzyi buti kuti bajisi bulangizi bwakuyoopona anyika?

Ziindi zinji, Bbaibbele lyaamba zyabukkale bwamu Paradaiso kuti buyoobeda anyika. Kutegwa mulibonene eeci, inga mwabala zibalo eezyi mu Bbaibbele lyanu: Intembauzyo 37:9-11; 46:8, 9; 72:7, 8, 16; Isaya 35:5, 6; 65:21-23; Matayo 5:5; Johane 5:28, 29; Ciyubunuzyo 21:4. Tupango ootu tulaamba kujatikizya kumana kwankondo, nzala, kuciswa alimwi alufwu. Twaamba ciindi bantu babotu nobayooba alukkomano lwakuyookonzya kuliyakila maanda aabo, kulima myuunda yabo alimwi akukomezya bana babo muluumuno. * Sena bulangizi oobu tabumukkomanisyi? Tulijisi twaambo tulimvwisya ncotusyomena kuti zisyomezyo eezyi ziyoozuzikizigwa ino-ino.

Kuti mwayeeyesya kujatikizya zintu Leza nzyaamucitila nywebo kumugama alimwi abantu boonse, cilasalala kuti nzinji kapati nzyaakacita kale. Tulijisi buumi, tulijisi maano, tulapona, alimwi tulijisi nzyotuyandika kutegwa katupona. Kuyungizya waawo, cipego ca Leza cacinunuzyo ncaakapa kwiinda muli Jesu iwakatufwida, cilakonzya kutupa zilongezyo zipati kapati, mbubonya mbotwaiya mulugwalo lwa Johane 3:16.

Kupona kukabe kutamani muluumuno, mubukkale bubotu, kakunyina kuyoowa kuciswa, nkondo, nzala naa lufwu, ncobeni kuyooleta lukkomano lutamani alimwi azilongezyo zinji. Kutegwa mukatambule zilongezyo eezyi, ciyeeme alindinywe. Mubuzyo wacaala ngwakuti, ino ncinzi ncomumucitila Leza?