MAKANI AAYEEME AMUTWE UULI ACIVWUMBYO | JESU ULAFWUTULA—KUZWA KUNZI?
Ikaambo Ncotuyandika Kufwutulwa
“Muntu, uuzyalwa kumukaintu, upona buyo mazuba masyoonto alimwi ujisi mapenzi manji kapati. Ulafwulula mbubonya mbuli duba mpoonya ulaneta; ulazimaana mbuli cinzimweemwe akuleka kubako.”—Jobu 14:1, 2.
Kuzwa kaindi, bantu balalombozya mbocinga cabota kutacembaala, kupona buumi bubotu kukabe kutamani. Pele cuusisya ncakuti: Tulafwa. Majwi aali atala aawa aakaambwa a Jobu myaka iinda ku 3,000 yainda, acili aamasimpe asunu.
Bantu boonse balayandisya kupona kukabe kutamani. Bbaibbele litwaambila kuti Leza wakabikka luyandisisyo lwakupona kukabe kutamani mumyoyo yesu. (Mukambausi 3:11) Kuti kacili boobo, sena inga caba camaano kuli Leza siluyando kubikka luyandisisyo mulindiswe lwalo lutakonzyi kuzuzikizyigwa? Ikuti bwiinguzi bwanu mbwakuti peepe, nkokuti muliluzi. Ijwi lya Leza lyaamba lufwu kuti ngusinkondo alimwi litusyomezya kuti ‘luyoonyonyoonwa.’—1 Bakorinto 15:26.
Tacidoonekwi kuti lufwu ngusinkondo. Taakwe muntu ulaamaano uunga wayanda kufwa. Ciindi ntenda noyiswena aafwaafwi, tulayeeleba, tulaiyuba naa kwiitija. Notwaciswa, tulasolekesya kujana nzila zyakusilikwa kutegwa tupone. Tulacita kufwumbwa ncotukonzya kutegwa tweelebe zintu zikonzya kupa kuti tufwe.
Sena kuli kaambo katupa kusyoma kuti sinkondo ooyu wakaindi uyoonyonyoonwa? Inzya nkokali. Jehova Leza, Mulengi wesu, tanaakalenga bantu kuti kabapona buyo myaka misyoonto mpoonya akufwa. Kuzwa kumatalikilo tanaakali makanze aakwe aakuti bantu kabafwa. Wakali kuyanda kuti bantu kabapona anyika mane kukabe kutamani, alimwi kufwumbwa ncaamba ulacizuzikizya.—Isaya 55:11.
Aboobo ino lufwu luyoomanizyigwa buti? Kuzwa kaindi bantu basolekesya kulumana lufwu, pele kunyina nobazwidilila pe. Mazuba aano, kusoleka ooku kwazumanana. Basayaansi bajana misamu alimwi abusilisi bwiindene-indene bwalo ibwapa kuti baazunde malwazi aamwi. Baiya mbwaabede maseelo aazintu zipona alimwi ambwaabeleka. Mumasena manji mazuba aano, bunji bwabantu balapona myaka minji kwiinda mbobakali kupona myaka iili 100 yainda. Nokuba boobo, lufwu talulangilwi kuzundwa pe. Mbubwenya Bbaibbele mbolyaamba, “boonse balajokela kubulongo.”—Mukambausi 3:20.
Cikkomanisya ncakuti, tatweelede kusyoma bantu kuti balakonzya kulimana penzi eeli ilyatola ciindi cilamfwu. Jehova Leza watubambila kale bubambe bwakuti swebo tufwutulwe kulufwu, alimwi bubambe oobu buyeeme ali Jesu Kristo.
