Ibbaibbele litwaambila kuti mamanino ayoobikkilizya alunyonyooko noliti: “Kuyooba mapenzi mapati aatanacitikide kuzwa kumatalikilo aanyika kusikila sunu . . . Mubwini, kuti mazuba aayo atakafwiinsyigwi, kunyina muntu uuyookonzya kufwutuka.” (Matayo 24:21, 22) Nokuba boobo, Leza utusyomezya kuti bantu banji bayoofwutuka: “Nyika ilamana . . . , pele ooyo uucita kuyanda kwa Leza unooliko lyoonse mane kukabe kutamani.”—1 Johane 2:17.

Ikuti kamuyanda kuyoofwutuka lunyonyooko oolo luboola ‘akukkalilila lyoonse mane kukabe kutamani,’ ino ncinzi ncomweelede kucita? Sena mweelede kutalika kuliyobweda mpasya naa kuyobola zintu zyakubelesya? Peepe. Ibbaibbele lilatwaambila cakusinizya kuti tatweelede kulibambila munzila eeyo pe. Tubala kuti: “Mbwaanga zintu eezyi zyoonse ziyakweenzemuka boobu, amuyeeye buyo naa mweelede kuba bantu bali buti mubukkale busalala alimwi amilimo yakubelekela Leza cakulyaaba, nomulindila akuyeeyesya kusika kwabuzuba bwa Jehova.” (2 Petro 3:10-12) Tupango ootu tutondezya kuti “zintu eezyi zyoonse” iziyakweenzemuka zibikkilizya bweendelezi bwanyika eeyi iinyongene alimwi abaabo boonse ibasala bweendelezi oobu muciindi cakusala bweendelezi bwa Leza. Cilisalede kuti, ikuliyobweda zintu zinji zyakumubili, tacikatupi kufwutuka lunyonyooko oolo pe.

Masimpe ngakuti, lufwutuko lwesu luyeeme akulyaaba kuli Jehova Leza alimwi akwiiya kulilemeka munzila njakkomanina. (Zefaniya 2:3) Muciindi cakutobela nzyobacita bantu banji alimwi akutabikkila maano kuzitondezyo zilibonya caantangalala izyakuti tupona kuciindi camamanino, tweelede “kuyeeyesya kusika kwabuzuba bwa Jehova.” Bakamboni ba Jehova balakonzya kumutondezya mu Bbaibbele mbomukonzya kuyoofwutuka buzuba oobu buboola.