Mibuzyo Yamu Bbaibbele Yaingulwa
Ino bubi buzwa kuli?
Ino Nguni Wakasola Kusunka Jesu Kuti Acite Cibi?—matayo 4:8-10
Bantu balayanda kupona muluumuno, kusyomeka, alimwi akuba aluse. Pele ino nkaambo nzi kanji-kanji ncokuli nkondo, kutalulama, alimwi alunya? Malipooti aamba zintu ziyoosya alidumide kapati mazuba aano. Sena kuli muntu uupa kuti bantu kabacita zibi?—Amubale 1 Johane 5:19.
Sena Leza wakalenga bantu kabajisi cilengwa cakucita zintu zibyaabi? Peepe, Jehova Leza wakalenga bantu mucinkozya cakwe, kabajisi bube bwakwiiya luyando lwa Leza. (Matalikilo 1:27; Jobu 34:10) Pele alimwi Leza wakabalemeka bantu kwiinda mukubapa nguzu zyakulisalila. Ciindi bazyali besu bakusaanguna nobakasala kucita cibi, bakakaka kutobela cikozyanyo ca Leza aboobo bakaba bantu batalondokede. Twakakona cilengwa cakuyanda kucita cibi kuzwa kulimbabo.—Amubale Deuteronomo 32:4, 5.
Sena bubi bunooliko lyoonse?
Leza uyanda kuti tutuleke tumpenda twesu. (Tusimpi 27:11) Aboobo ulatuyiisya mbotukonzya kutantamuka kucita zintu zitali kabotu alimwi ambotukonzya kujana lukkomano lwini-lwini. Pele aciindi ecino, tatukonzyi kulwiiya luyando lwa Leza cakulondoka.—Amubale Intembauzyo 32:8.
Nokuba kuti bubi bulivwulide lino, Leza wabuzumizya kwaciindi cisyoonto buyo kutegwa bantu boonse balibonene mapenzi aaboola akaambo kabubi. (2 Petro 3:7-9) Pele lino-lino, nyika iyoozula bantu bakkomene aabo bamvwida Leza.—Amubale Intembauzyo 37:9-11.
Andiza Inga Mwaakkomanina Ayaaya
MIBUZYO YAMU BBAIBBELE YAINGULWA
Sena Diabolosi Nkwali Ncobeni?
Sena Saatani Diabolosi mbube buyo buli mukati kesu, naa nkwali ncobeni?
