NOMWABALA twaambo ootu tobilo, ino nkaakali ikeendelana ambomuyeeya? Bantu banji bajana kuti majwi aa Saulo waku Tarso, alimwi wiitwa kuti mwaapostolo Paulo alaumbulizya alimwi akukkomanisya. (Milimo 17:26, 27) Ibbaibbele lilijisi majwi aambi aapa bulangizi mbuli yaaya. Mucikozyanyo, Jesu wakapa mupailo uupa bulangizi bwakuti basikumutobela balakonzya kumuzyiba Leza alimwi akutambula zilongezyo.—Johane 17:3.

Nokuba boobo, basyaabusongo bamwi mbuli Philo bakajisi muzeezo wiimpene. Bakaamba kuti tatukonzyi kumuzyiba Leza nkaambo ulakatazya kuzyiba. Ino makani aamasimpe ngaali?

Ibbaibbele lilaamba caantangalala kuti kuli zintu zimwi zijatikizya Leza zibakatazya kumvwisya bantu. Mucikozyanyo, kuvwula kwamyaka njajisi Mulengi, busongo bwakwe bulibedelede, alimwi akuvwula kwambubo takukonzyi kweelanisyigwa naa kupimwa. Bantu tabakonzyi kuzimvwisya zintu eezyi. Nokuba boobo, zintu eezyi tazikonzyi kutulesya kumuzyiba Leza. Mane buya kuzinzibala kuyeeya zintu eezyi kulakonzya kutugwasya ‘kuswena kuli Leza.’ (Jakobo 4:8) Atulange-lange zikozyanyo zisyoonto zijatikizya zintu eezyi zikatazya kumvwisya. Mpoonya tulalanga-langa zintu zijatikizya Leza nzyotukonzya kumvwisya.

BUUMI BWA LEZA BUTAMANI: Ibbaibbele liyiisya kuti Leza nkwali “kuzwa lili alili mane kukabe kutamani.” (Intembauzyo 90:2) Munzila imwi, inga twaamba kuti Leza tajisi matalikilo alimwi tajisi mamanino. Kweelana akuyeeya kwabantu, “mweelwe wamyaka yakwe tuukonzyi kuzyibwa pe.”—Jobu 36:26.

Mbomugwasyigwa: Leza usyomezya kumupa buumi butamani ikuti naa mwamuzyiba ncobeni. (Johane 17:3) Ino cisyomezyo eeci inga caba buti camasimpe ikuti naa Leza lwakwe taponi kukabe kutamani? Alikke “Mwami walyoonse alyoonse” nguukonzya kuzuzikizya cisyomezyo eeci.—1 Timoteyo 1:17.

MIZEEZO YA LEZA: Ibbaibbele liyiisya kuti “kunyina uukonzya kulingula maano” aa Leza nkaambo mizeezo yakwe ilisumpukide kapati kwiinda yesu. (Isaya 40:28; 55:9) Cakweelela, Bbaibbele libuzya mubuzyo wakuti: “Ino nguni uuzyi mizeezo ya Jehova kutegwa amulailile?”—1 Bakorinto 2:16.

Mbomugwasyigwa: Leza ulakonzya kuswiilila mipailo minji aciindi comwe. (Intembauzyo 65:2) Alimwi ulabona katiiti kali koonse ikawida aansi. Sena mizeezo ya Leza kuli niiba azintu zinji zyakuyeeya cakuti inga waalilwa kumubona alimwi akuswiilila mipailo yanu? Peepe, nkaambo mizeezo yakwe tayigoli. Kuyungizya waawo, “nywebo mulayandika kwiinda tutiiti tunji.”—Matayo 10:29, 31.

NZILA ZYA LEZA: Ibbaibbele liyiisya kuti muntu ‘kunyina nayakwiimvwisya milimo eeyo Leza mwini-mwini njaacita kuzwa kumatalikilo kusikila kumamanino.’ (Mukambausi 3:11) Aboobo, kunyina notuyoozizyiba zintu zyoonse zijatikizya Leza. Busongo ibuli munzila zya Leza ‘kunyina uunga wabuteelela.’ (Baroma 11:33) Nokuba boobo, Leza ulayanda kuyubununa nzila zyakwe kuli baabo ibayanda kumukkomanisya.—Amosi 3:7.

Mbomugwasyigwa: Ikuti kamubala akwiiya Bbaibbele, lyoonse munakwiiya zintu zipya kujatikizya Leza alimwi anzila zyakwe. Eeci caamba kuti tulakonzya kuzumanana kuswena kuli Taateesu wakujulu lyoonse mane kukabe kutamani.

Ikutakonzya kumvwisya zintu zimwi zijatikizya Leza tacaambi kuti tatukonzyi kumuzyiba naaceya. Ibbaibbele lilijisi makani manji aatugwasya kumuzyiba kabotu Leza. Amubone zikozyanyo zimwi:

ZINA LYA LEZA: Ibbaibbele lituyiisya kuti Leza wakalipa zina limugeme. Waamba kuti: “Ndime Jehova. Eeli ndezina lyangu.” Zina lya Leza lilajanika ziindi zibalilwa ku 7,000 mu Bbaibbele, kwiinda zina limbi lili lyoonse.—Isaya 42:8.

Mbomugwasyigwa: Jesu wakaamba boobu mumupailo wakwe wacikozyanyo: “Taateesu ooli kujulu, alisalazyigwe zina lyako.” (Matayo 6:9) Sena andinywe inga mwalibelesya zina lya Leza mumipailo yanu? Jehova ulilibambilide kufwutula muntu uuli woonse uulemeka zina lyakwe.—Baroma 10:13.

BUSENA NKWAKKALA LEZA: Ibbaibbele liyiisya kuti kuli masena obilo—busena bwakujulu ooko nkozikkala zilenge zijisi mibili yamuuya alimwi abusena bwaanyika abubumbo boonse buboneka ameso. (Johane 8:23; 1 Bakorinto 15:44) Mu Bbaibbele, ibbala lyakuti “kujulu” kanji-kanji lyaamba busena bwamuuya. ‘Busena nkwakkala’ Mulengi buli “kujulu.”—1 Bami 8:43.

Mbomugwasyigwa: Mulazyiba bwini mbwabede Leza. Mulengi tazili nguzu zijanika koonse-koonse muzintu zyoonse. Jehova ulijisi busena nkwakkala. Nokuba boobo, “kunyina cilenge nociba comwe cisisidwe mumeso aakwe.”—Bahebrayo 4:13.

BUBE BWA LEZA: Ibbaibbele liyiisya kuti Jehova ulijisi bube bubotu kapati. “Leza nduyando.” (1 Johane 4:8) Tabeji pe. (Tito 1:2) Tasalululi, ngusiluse, silubomba, alimwi ulamuka kukalala. (Kulonga 34:6; Milimo 10:34) Pele kaambo ikakonzya kubagambya bantu banji nkakuti, Mulengi uyanda kuba ‘acilongwe cini-cini’ abaabo bamulemeka.—Intembauzyo 25:14.

Mbomugwasyigwa: Mulakonzya kuba mulongwe wa Jehova. (Jakobo 2:23) Mpoonya, mbomuyaabuzyiba bube bwa Jehova, mulakonzya kuzimvwisya kabotu zibalo zyamu Bbaibbele.

Ibbaibbele lilamupandulula kabotu-kabotu Jehova Leza. Tacikatazyi kumuzyiba pe. Alimwi buya Mulengi uyanda kuti mumuzyibe. Ijwi lyakwe Bbaibbele lisyomezya kuti: “Ikuti wamuyandaula, uyookulekela kuti umujane.” (1 Makani 28:9) Amumuzyibe Leza kwiinda mukubala alimwi akuzinzibala kuyeeya zibalo zyamu Bbaibbele. Ikuti mwacita oobo, Bbaibbele lisyomezya kuti Leza “uyooswena kulindinywe.”—Jakobo 4:8.

Ambweni mulakonzya kulibuzya kuti, ‘Mbwaanga tandikonzyi kuzimvwisya zintu zyoonse zijatikizya Mulengi, ino inga ndaba buti mulongwe wakwe?’ Amuyeeye mubuzyo ooyu: Sena mulongwe wadokota waandula bantu weelede kuti kajisi digili mumakani aabusilisi? Peepe. Mulongwe wadokota ulakonzya kazyi mulimo uumbi wiindene kapati awadokota. Nokuba boobo, balakonzya kuba balongwe beni-beni. Cipati ncakuti mulongwe wadokota ulibuzyi bube bwadokota, zintu nzyayanda, alimwi anzyatayandi. Mbubwenya buyo, mulakonzya kwiiya mbwabede Jehova mu Bbaibbele, nkokuti kuzyiba zintu zini nzyomweelede kucita kutegwa mube aacilongwe a Leza.

Ibbaibbele lilijisi makani ngotuyandika kuzyiba kutegwa tumuzyibe Leza, ikutali makani aatalimvwisyi aajatikizya Mulengi. Sena inga mwayanda kwiiya zinji kujatikizya Jehova Leza? Bakamboni ba Jehova balijisi bubambe bwaciiyo ca Bbaibbele caaŋanda citabbadelelwi. Twamulomba kuti mubandike a Bakamboni bakubusena nkomukkala naa kulanga a Webbusaiti yesu ya www.dan124.com/toi.