Jehova Leza ngo Kasensa kabuumi. (Intembauzyo 36:9) Aboobo, sena inga tacibi camaano kuti Leza ooyu nguwenya ulakonzya kubabusya bafwide? Ibbaibbele litusyomezya kuti uyoocita oobo kumbele. (Amubale Milimo 24:15) Pele ino nkaambo nzi ncayoocitila boobo?

Kuzwa kumatalikilo, Mulengi wesu wakali kuyanda kuti katupona anyika mane kukabe kutamani. (Matalikilo 1:31; 2:15-17) Eeci ncaciyanda kusikila asunu. Cilamucisa kubona zintu zitucitikila—kupona buumi bwamapenzi alimwi bufwambaana kugola.—Amubale Jobu 14:1, 14, 15.

Sena Leza wakalenga bantu kuti kabakkala kujulu? Peepe. Leza wakalenga bangelo kuti kabakkala kujulu. Bantu wakabalengela kuti kabakkala anyika. (Matalikilo 1:28; Jobu 38:4, 7) Katwaayeeyede makani aaya, amubone bantu mbaakabusya Jesu. Bantu mbaakabusya bakazumanana kupona mpoonya aano anyika. Mbubwenya buyo, bunji bwabaabo ibayoobusyigwa kumbele bayoozumanana kupona aano anyika.—Amubale Johane 5:28, 29; 11:44.

Nokuba boobo, Leza wakasala bantu basyoonto ibayoobusyigwa akupegwa buumi bwakujulu, kwalo nkobayooba amibili yamuuya. (Luka 12:32; 1 Bakorinto 15:49, 50) Aabo bayoobusyilwa buumi bwakujulu bayoolela nyika kabali bami antoomwe a Kristo.—Amubale Ciyubunuzyo 5:9, 10.