Ndakakomenena mudolopo lya Puerto Limón, lyalo lili kujwe aankomwe aalwizi mucisi ca Costa Rica. Bazyali bangu bakajisi bana bali lusele, aboobo mebo ndakali waciloba. Bataata bakafwa nondakajisi myaka iili lusele. Aboobo, bamaama bakatukomezya kabali muzyali uuli alikke.

Cisobano ca baseball cakali cintu ciyandika kapati mubuumi bwangu. Ndakali kucikkomanina kapati nondakacili mwana. Nondakajisi myaka iitandila ku 20, ndakasangana tiimu imwi yatakaningasumpuka. Ciindi nondakali kuuma mutiimu eeyo kandijisi myaka iili kuma 20, sikuyandaula basicisobano wakandilomba kuti ndikaume mutiimu iisumpukide ku Nicaragua. Nokuba boobo, akaambo kakuti bamaama bakali kuciswa-ciswa aciindi eeco alimwi ndime ndakali kubalanganya, tiindakali kuyanda kukkala ku Nicaragua. Aboobo tiindakazumina kuunka kucisi eeci. Mukuya kwaciindi, aumwi sikuyandaula basicisobano wakanditamba kuti ndikaume mutiimu yacisi ca Costa Rica, yalo yakajisi basicisobano ibatakacizyi kapati kucisobana. Aciindi eeci ndakazumina. Ndakali kuuma mutiimu yacisi kuzwa mu 1949 kusika mu 1952, alimwi ndakali kuunka kusobana zisobano izyakali kucitilwa ku Cuba, Mexico, alimwi aku Nicaragua. Ndakali kucita kabotu acibeela mpondakali kusobanina mucisobano ca baseball, cakunga ndakali kucikonzya kusobana zisobano izili 17 kakunyina kulubizya. Ndakali kukkomana kumvwa bantu kabandilumbaizya!

Cuusisya ncakuti, ndakatalika akupona buumi bwakutalilemeka. Nokuba kuti ndakajisi buyo mukaintu omwe, lyoonse ndakali kusyaba abamakaintu bambi. Alimwi ndakali cakolwa. Bumwi buzuba ndakakolwa kapati cakuti ciindi nondakabuka buzuba bwakatobela, tiindakali kukonzya kuyeeya ambondakasika kuŋanda! Ndakali kuuma azisobano zyanjuka alimwi akubbeja.

Kandicipona buumi buli boobu, bamaama bakaba Bakamboni ba Jehova. Kumatalikilo bakasola kundigwasya kuti nditalike kusyoma nzyobasyoma, pele bakaalilwa nkaambo ndakali kuciyandisya kapati cisobano. Ikuti kandili kubbuwa lyakusobanina aciindi cakulya, tiindakali kwiimvwa anzala! Ndakali kubikkila buyo maano kucisobano. Ndakali kuciyandisya kapati cisobano ca baseball kwiinda cintu cili coonse!

Nokuba boobo, nondakajisi myaka iili 29, ndakalicisa kapati ciindi nondakali kusola kujata bbola notwakali kusobana. Nondakapona,  ndakacileka kuuma mutiimu yacisi. Nokuba boobo, ndakazumanana kujatikizyigwa mucisobano ca baseball kwiinda mukuyiisya basicisobano mutiimu yatakaningasumpuka iyakali munsi-munsi aŋanda mpondakali kukkala.

Mu 1957, ndakazumina kuunka kumuswaangano wacooko wa Bakamboni ba Jehova ngobakali kucitila mubbuwa lyakusobanina mondakali kuumina baseball. Nondakakkede kandiswiilila, cintu cilikke ncondakabona ndwiindano luliko akati kabukkale bwakulilemeka bwa Bakamboni alimwi abukkale butali kabotu mbondakali kubona akati kabasikweebelela zisobano zya baseball. Ncondakabona kumuswaangano wacooko cakandikulwaizya kutalika kwiiya Bbaibbele a Bakamboni ba Jehova akujanika kumiswaangano yabo yambungano.

Ndakakkomana kapati kujatikizya njiisyo zinji zyamu Bbaibbele nzyondakaiya. Mucikozyanyo, Jesu wakaambila limwi kuti mumazuba aakumamanino, basikwiiya bakwe bayookambauka makani mabotu aa Bwami bwa Leza munyika yoonse. (Matayo 24:14) Kuyungizya waawo, ndakaiya kuti Banakristo bakasimpe tabaciti mulimo wabo kutegwa bajane mpindu. Jesu wakaamba kuti: “Mwakapegwa kakunyina kubbadelesyegwa, amupe kakunyina kubbadelesya.”—Matayo 10:8.

Ciindi nondakali kwiiya Bbaibbele, ndakali kweezyanisya ncolyaamba ancondakali kubona akati ka Bakamboni ba Jehova. Ndakakukkomanina kubeleka canguzu nkobakali kucita kutegwa baambilizye makani mabotu aajatikizya Bwami bwa Leza nyika yoonse. Ndakabona muuya wabwaabi ngobakajisi walo Jesu ngwaakalailila Banakristo kuti kabatondezya. Aboobo, ciindi nondakabala lugwalo lwa Marko 10:21 alimwi akubona kutamba kwa Jesu kwakuti, ‘Boola ube sikunditobela,’ ndakayanda kuba Kamboni.

Nokuba boobo, cakanditolela ciindi kuti nditalike kucita zintu cakumaninina kweelana a Bakamboni. Mucikozyanyo, kwamyaka minji ndakali kuuma “njuka” nsondo ansondo. Nokuba boobo, ndakaiya mu Bbaibbele kuti Leza tabayandi bantu basyoma “leza wa Mvwuma,” alimwi abasyaacivwulemwangu. (Isaya 65:11; Bakolose 3:5) Aboobo ndakasala kucileka kuuma njuka. Nsondo yakusaanguna kuzwa nondakacileka kuuma njuka, mubuzuba bwamu Nsondo namba yangu ‘yamvwuma’ njondakali kubelesya yakawina! Bantu bakandifwubaazya akaambo kakuti tiindakauma nsondo eeyo, alimwi bakandisinikizya kuti nditalike kuuma alimwi, pele ndakakaka. Kunyina nondakatalika kuuma njuka alimwi.

‘Buntu bwangu bupya’ bwakasunkwa alimwi mubuzuba mbubonya mbondakabbapatizyigwa kumuswaangano wacooko wa Bakamboni ba Jehova. (Baefeso 4:24) Mangolezya aayo, ndakajokela kuhotela nkondakali kukkala mpoonya ndakajana musimbi ngondakasyabide kaindi kalindila amulyango waluumu yangu. Wakandaambila kuti: “Kamuboola ba Sammy, atulikkomanisye!” Pele cakufwambaana ndakaingula kuti: “Peepe!” Ndakamwaambila kuti lino ndipona kweelana azyeelelo zyamu Bbaibbele zyakulilemeka. (1 Bakorinto 6:18) Wakapozomoka akwaamba kuti: “Mwati nzi?” Mpoonya wakaubya-ubya ncolyaamba Bbaibbele kujatikizya bwaamu alimwi wakandisinikizya kuti cisyabo cesu citalike alimwi. Nokuba boobo, ndakaile kunjila buyo muluumu yangu akukkiya kumulyango. Mazuba aano, ndilikkomene kwaamba kuti kuzwa ciindi nondakaba Kamboni mu 1958, ndazumanana kukuccilila kucinca kondakacita mubuumi.

Ndilimvwa mbuli kuti inga ndalemba bbuku buya kwaamba bubotu mbondajana kwiinda mukutobela busolozi bwamu Bbaibbele! Bubotu bumwi mbwakuti lino ndijisi balongwe banji beni-beni, buumi bulaampindu, alimwi alukkomano lwini-lwini.

Ndicicikkomanina cisobano ca baseball, pele ndakacinca mbondicibona. Mucisobano eeci ndakaba aampuwo alimwi amali, pele mukuya kwaciindi zintu eezyi zyakamana. Nokuba boobo, cilongwe cangu a Leza alimwi abunyina bwanyika yoonse zinooliko lyoonse mane kukabe kutamani. Bbaibbele lyaamba kuti: “Inyika ilamana antoomwe azisusi zyanjiyo, pele ooyo uucita kuyanda kwa Leza unooliko lyoonse mane kukabe kutamani.” (1 Johane 2:17) Lino ndilamuyanda Jehova Leza alimwi abantu bakwe kwiinda cintu cili coonse!