“Nondakali mwana, mwanookwesu musankwa wakali kunditundulula kwiinda mukunduuma alimwi akundaambila zintu zibi buzuba abuzuba. Nondakakwatwa, bapongozi bangu bakazumanana kunditundulula. Balo abalumi babo bakali kundeendelezya mbuli kuti ndili muzike. Ndakatalika kuba amizeezo yakuyanda kulijaya.”—Ba Madhu, a bakkala ku India.

 Ba World Health Organization bakaamba kuti: “Kutundululwa kwabamakaintu kulidumide kapati munyika yoonse. Kwaambwa kuti andiza mukaintu omwe akati kabamakaintu botatwe ulakonzya kutundululwa cacigaminina naa mumakani aakoonana mubuumi bwakwe.

 Ikuti eeci cakamucitikila kale, mulakonzya kulibilika kuti kufwumbwa nkomukonzya kuunka, muntu uumwi ulakonzya kumutundulula cacigaminina, kwiinda mumajwi naa mumakani aakoonana. Akaambo kakutundululwa alimwi akuteendelezyegwa kabotu, mulakonzya kulimvwa kuti ‘Bamakaintu tabayandiki.’ Pele sena bamakaintu balayandika ncobeni kuli Leza?

 Lugwalo: “Leza wakalenga mwaalumi amukaintu.” —Matalikilo 1:27.

 Bupanduluzi: Leza wakalenga baalumi alimwi abamakaintu. Ubabona kuti boonse beelede kupegwa bulemu. Kuyungizya waawo, ulangila kuti mulumi weelede “kuyanda mukaintu wakwe mbubonya mbwaliyanda mwini,” kutali kumweendelezya naa kumwaambila majwi mabi alimwi akumuuma. (Baefeso 5:33; Bakolose 3:19) Cakutadooneka, kutundulula bamakaintu makani mapati kuli Leza.

 “Nondakali mwana, bakali kunditundulula mumakani aakoonana babbululu bangu. Nondakajisi myaka 17, basikundilemba mulimo bakandikonga kuti balanditanda mulimo ikuti naa ndakaka koonana ambabo. Nondakakomena balumi bangu, bazyali alimwi abasimukoboma bakali kundinyansya. Pele mukuya kwaciindi, ndakaiya kujatikizya Jehova, b Mulengi. Ulabalemeka bamakaintu. Eeci cakandikulwaizya kuzyiba kuti ulandiyanda alimwi akuti ulandibikkila maano.”—Ba Maria, bakkala ku Argentina.

 Lugwalo: “Kuli mulongwe uukakatila kwiinda mwanookwanu.”—Tusimpi 18:24.

 Bupanduluzi: Mulongwe mwini-mwini uyoomugwasya. Ikuti kacikonzyeka, amubandike amuntu ngomusyoma kujatikizya mbomulimvwa.

 “Kwamyaka iili 20, kunyina ngondakaambila kuti ndakali kutundululwa mumakani aakoonana. Akaambo kaceeci, tiindakakkomene, ndakali kulibilika alimwi akunyongana mumizeezo. Pele nondakaambila muntu iwakalibambilide kuswiilila, ndakalemununwa kapati.”—Ba Elif, bakkala ku Türkiye.

 Lugwalo: “Kamuwaala makatazyo aanu oonse kuli [Leza], nkaambo ulamubikkila maano.”—1 Petro 5:7.

 Bupanduluzi: Ikuti mwapaila, Leza ulaswiilila ncobeni. (Intembauzyo 55:22; 65:2) Nkaambo ulamubikkila maano, ulakonzya kumugwasya kumvwisya mbomuyandika kapati.

 “Kwiiya kujatikizya Jehova kwakandigwasya kutalika kukkalikana mumizeezo. Lino ndilakonzya kupaila kuli Leza akumwaambila zyoonse. Uli mbuli mulongwe uumvwisya ncobeni mbondilimvwa.”—Ba Ana, bakkala ku Belize.

 Lugwalo: “Jehova . . . uyoobabetekela cabululami bamucaala alimwi abaabo bauside, ikutegwa muntu buyo waanyika atabayoosyi limbi.”—Intembauzyo 10:​17, 18.

 Bupanduluzi: Ino-ino Leza uyoogwisya kutalulama koonse, kubikkilizya akubatundulula bamakaintu.

 “Cali mbuli musamu uuponya kwiiya kuti Jehova ino-ino uyookumana kutabeendelezya kabotu bamakaintu abana basimbi. Candipa kuliiba mumizeezo.”—Ba Roberta, bakkala ku Mexico.

 Kutegwa mwiiye zinji kujatikizya Bbaibbele mbolipa bulangizi, kaambo ncomweelede kusyoma zintu nzyolisyomezya, alimwi a Bakamboni ba Jehova mbobapa lugwasyo kuzwa mu Bbaibbele mazuba aano, amulombe kuswaigwa.

 Amucite daunilodi cibalo eeci cikonzya kupulintwa.