Sena muyeeya kuti zintu ziyoobota kumbele? Bantu banji balasola kuzilanga kabotu zintu nokuba kuti kuli mapenzi manji munyika. Pele sena tweelede kulangila kuti zintu ziyoobota ncobeni? Inzya! Bbaibbele lilatupa bulangizi bwini-bwini bwakuti zintu ziyoobota kumbele.

•  Ino mbulangizi nzi mbolitupa Bbaibbele?

•  Sena zisyomezyo zyamu Bbaibbele ziyoozuzikizyigwa ncobeni?

•  Ino eeci ciyoocitika buti?

•  Ino ciyoocitika lili?

•  Ino mbuti bulangizi mbolipa Bbaibbele mbolukonzya kumugwasya mazuba aano?

 Bbaibbele lilaamba kuti bantu banoojisi mapenzi manji. Pele lilasyomezya kuti mapenzi aaya taanooliko lyoonse. Amubone zikozyanyo zisyoonto zigaminide.

•   Penzi: Kubula kwakukkala

   Ncolyaamba Bbaibbele: “Bayooyaka maanda akukkala mulingawo.”—Isaya 65:21.

   Iciyoocitika kumbele: Bantu bayookkala mumaanda aabageme.

•   Penzi: Kubula mulimo abucete

   Ncolyaamba Bbaibbele: “Basale bangu bayakwiikkomanina kapati milimo yamaanza aabo.”—Isaya 65:22.

   Iciyoocitika kumbele: Bantu boonse banoojisi mulimo uukkomanisya.

•   Penzi: Kutalulama

   Ncolyaamba Bbaibbele: “Basilutwe bayakweendelezya mubululami.”—Isaya 32:1.

   Iciyoocitika kumbele: Bantu tabacinoocitilwi cakutalulama akaambo buyo kamubala wabo naa mulimo ngobabeleka, alimwi kunoocinyina bucete. Boonse buyo banoocitilwa zintu cabululami.

•   Penzi: Nzala amalwazi aaboola akaambo kakubula cakulya

   Ncolyaamba Bbaibbele: “Kuyooba maila manji anyika; atala lyamalundu ayoovwula citaambiki.”—Intembauzyo 72:16.

   Iciyoocitika kumbele: Boonse banoojisi cakulya cinji alimwi cilaabusani. Kunyina unakoona anzala naa kuciswa malwazi aaboola akaambo kakubula cakulya.

•   Penzi: Bugwebenga akulwana

   Ncolyaamba Bbaibbele: “Bayookkala umwi aumwi munsi lyamusaansa wakwe amunsi lyamukuyu wakwe, alimwi takukabi muntu naba omwe uuyoobayoosya.”—Mika 4:4.

   Iciyoocitika kumbele: Boonse banooliibide nkaambo bantu babi tabacinooliko, alimwi “balulami bayookona nyika.”—Intembauzyo 37:10, 29.

•   Penzi: Nkondo

   Ncolyaamba Bbaibbele: “Cisi tacikanyamuni panga kulwana cisinyina, alimwi tabakaiyi limbi nkondo pe.”—Isaya 2:4.

   Iciyoocitika kumbele: Kunooli luumuno nyika yoonse. (Intembauzyo 72:7) Kunyina uyakufwidwa muyandwa akaambo kankondo naa unakuyandaula kwakuyubila akaambo kakutija nkondo.

•   Penzi: Kuciswa amalwazi

   Ncolyaamba Bbaibbele: “Taakwe muntu naba omwe uukkala munyika uuyakwaamba kuti: ‘Ndaciswa.’”—Isaya 33:24.

   Iciyoocitika kumbele: Takukabi bantu balemene naa baciswa. (Isaya 35:5, 6) Alimwi buya, Bbaibbele lisyomezya kuti “lufwu talukabi limbi.”—Ciyubunuzyo 21:4.

•   Penzi: Kunyonyoonwa kwacilawo

   Ncolyaamba Bbaibbele: “Inkanda alimwi anyika iinyina maanzi ziyoosekelela, acalo cibanda camucimpayuma ciyookondwa akufwulula mbuli maluba-luba aasaferone.”—Isaya 35:1.

   Iciyoocitika kumbele: Nyika yoonse iyooba paradaiso iinookkalwa abantu, mbubwenya mbwaakabede makanze aa Leza kumatalikilo.—Matalikilo 2:15; Isaya 45:18.

 Ambweni muladooneka. Nokuba boobo, tumukulwaizya kuvwuntauzya cakulomya kutegwa muzyibe ncolyaamba Bbaibbele kujatikizya buumi bwakumbele. Nkaambo nzi? Zisyomezyo izijanika mu Bbaibbele ziliindene kapati azisyomezyo naa businsimi bwabantu. Zisyomezyo eezyi zizwa kuli Leza. Ntootu twaambo tutondezya ncokuli kwiindana ooku:

•   Leza ulasyomeka. Bbaibbele lyaamba kuti Leza ‘takonzyi kubeja.’ (Tito 1:2) Kuyungizya waawo, alikke nguukonzya kwaamba zintu iziyoocitika kumbele. (Isaya 46:10) Bbaibbele lilijisi zikozyanyo zinji izitupa kusinizya kuti zintu zyoonse nzyasinsima zilacitika ncobeni. Kutegwa muzyibe zinji, amweebelele kavidiyo kakuti Ino Inga Twasinizya Buti Kuti Bbaibbele Ndyamasimpe?

•   Leza ulijisi nguzu izyakwaamana mapenzi eesu. Bbaibbele litwaambila kuti Leza ulijisi nguzu izyakucita “zintu zyoonse nzyayanda kucita.” (Intembauzyo 135:5, 6) Munzila imwi, kunyina icikonzya kumulesya kuzuzikizya zisyomezyo zyakwe. Alimwi buya, Leza uliyandide kutugwasya nkaambo ulatuyanda.—Johane 3:16.

 Pele, mulakonzya kulibuzya kuti, ‘Ikuti naa Leza uliyandide kutugwasya alimwi ulijisi nguzu izyakucita oobo, nkaambo nzi ncotusikilwa mapenzi manji?’ Kutegwa muzyibe bwiinguzi bwamubuzyo ooyu, amweebelele kavidiyo kakuti Nkaambo Nzi Leza Ncalekelede Kupenga?

 Leza uyoobelesya Bwami bwakwe, mfwulumende yakujulu, kuzuzikizya zisyomezyo zyakwe. Wakabikka Jesu Kristo kuba Mwami wa Bwami oobu, alimwi wakamupa nguzu izyakulanganya nyika abantu bakkala alinjiyo. Jesu naakali anyika, wakaponya bacisidwe, wakasanina bantu bakali anzala, wakaumuzya guwo, alimwi akubusya bafwide. (Marko 4:39; 6:41-44; Luka 4:40; Johane 11:43, 44) Aboobo, wakatondezya nzyaakali kuyoocita aakuba Mwami wa Bwami bwa Leza.

 Amweebelele kavidiyo kakuti Ino Bwami bwa Leza Ninzi? kutegwa muzyibe zinji kujatikizya mbobuyoomugwasya Bwami bwa Leza.

 Ino-ino! Ino inga twasinizya buti? Bbaibbele lyakaambila limwi zintu izyakali kuyoocitika kutondezya kuti Bwami bwa Leza buli afwaafwi kutalika kweendelezya nyika. (Luka 21:10, 11) Tulazibona zintu eezyi kazicitika mazuba aano.

 Kutegwa muzyibe zinji, amubale cibalo cakuti “Ino Bwami bwa Leza Buyootalika Lili Kweendelezya Nyika?”

 Mulembi umwi wa Bbaibbele wakakozyanisya bulangizi mbolitupa Bbaibbele ‘kungobyo yiimika bwato yabuumi bwesu.’ (Bahebrayo 6:19) Mbubwenya ngobyo mboliimika bwato nokuli guwo pati, abwalo bulangizi bwakumbele mbolitupa Bbaibbele bulakonzya kutugwasya kuliyumya mumapenzi aatusikila mazuba aano. Bulangizi oobu bulakonzya kutugwasya kubatama, kukkomana, kuyeeya kabotu alimwi buya akupona buumi buli kabotu.—1 Batesalonika 5:8.