Mumwezi wa July 2022, kwakali malipooti nyika yoonse aajatikizya kupya kwiindilide:

•   “Kwaciindi cabili mumwezi uuno, balupati-pati ku China bacenjezya bantu kuti mumadolopo aabalilwa ku 70, kunooli kupya kutaambiki.”—July 25, 2022, CNN Wire Service.

•   “Akaambo kakuti mu Europe moonse mulipide citaambiki, masaka alimukupya ceetezya mumasi manji.”—July 17, 2022, The Guardian.

•   “Mu Nsondo, mumadolopo manji ku United States, kwakalipide kapati kwiinda kaindi, kwaambisya ku East Coast alimwi azibeela zya South a Midwest.”—July 24, 2022, The New York Times.

 Ino eezyi zyoonse zyaamba nzi? Mwati mukuya kwaciindi anyika kunoocili bantu? Ino Bbaibbele lyaamba nzi?

 Inzya. Kupya kwiindilide ikulimukucitika nyika yoonse kutondezya buyo zintu zyakasinsimwa kuti ziyoocitika muciindi cesu. Mucikozyanyo, Jesu wakasinsima kuti “bantu bayoobona zintu ziyoosya.” (Luka 21:11) Akaambo kakupya kutaambiki nyika yoonse, bantu banji balibilika kuti zintu nzyobacita bantu zilapa kuti bantu batazumanani kupona anyika.

 Peepe. Leza wakalenga nyika kuti kaili munzi wabantu mane kukabe kutamani. (Intembauzyo 115:16; Mukambausi 1:4) Muciindi cakulekela bantu kuti bainyonyoone, wasyomezya kuti ‘uyoonyonyoona baabo banyonyoona nyika.’—Ciyubunuzyo 11:18.

 Amulange-lange businsimi bobilo buyo ibutondezya zintu Leza nzyaakasyomezya:

•   “Inkanda alimwi anyika iinyina maanzi ziyoosekelela, acalo cibanda camucimpayuma ciyookondwa akufwulula mbuli maluba-luba aasaferone.” (Isaya 35:1) Leza takalekeli nyika kuti ibe cimpayuma, mwalo imutakkali bantu, pele uyakubambulula zibeela izyakanyonyoonwa.

•   “Yebo ulailanganya nyika, wiipa kuti izyale micelo minji kapati alimwi akuti ibote kapati.” (Intembauzyo 65:9) Leza uyakupanga nyika kuba paradaiso.

 Kutegwa mwiiye zinji kujatikizya kucinca kwambowuunga muwo mbokuzuzikizya businsimi bwamu Bbaibbele, amubale cibalo camu Cikuwa cakuti “Climate Change and Our Future—What the Bible Says.”

 Kutegwa mwiiye zinji kujatikizya cisyomezyo camu Bbaibbele cakuti nyika iyoobambululwa, amubone cibalo cakuti “Ino Nguni Uyakwiifwutula Nyika?”