Kweelana alipooti yakapegwa caino-ino munyika yoonse, a muntu omwe akati kabantu bone ulaakulimvwa kulendelelwa.

•   “Penzi lyakulizandula lilakonzya kubajatikizya bantu boonse tacikwe makani aciimo naa busena.”​​—Ba Chido Mpemba, sicuuno wa World Health Organization’s Commission on Social Connection.

 Mukwiimpana ambobakonzya kuyeeya bantu banji, penzi lyakulendelelwa talijatikizyi buyo bapati naa bantu bali balikke, pele lilakonzya kujatikizya abana, bantu balaanseba zibotu, bazwidilide mubuumi alimwi abanabukwetene. Penzi eeli lilakonzya kunyonganya mbwalibonya muntu alimwi amumizeezo.

•   Dr. Vivek Murthy, ba U.S. surgeon general bakaamba kuti: “Kulendelelwa takujatikizyi buyo kulimvwa bubi.” Bakayungizya kuti: “Muntu uulizandula naa uutajisi balongwe uleelene buyo amuntu uufweba misanga yatombwe iili 15 abuzuba. Bulamfwu bwaciindi ncobapona cileelene.”

 Mulengi wesu tayandi kuti katulizandula. Makanze aa Leza lyoonse ali aakuti bantu kababa abalongwe akujana lukkomano.

•   Njiisyo yamu Bbaibbele: “Leza wakati: ‘Tacili kabotu kuti muntu kakkala alikke.’”​​—Matalikilo 2:18.

 Leza uyanda kuti tube aacilongwe anguwe. Utusyomezya kuti uyooswena kulindiswe ikuti twasola kuswena kulinguwe.​​—Jakobo 4:8.

•   Njiisyo yamu Bbaibbele: “Balikkomene aabo bazyi kuti bayandika kusololelwa a Leza, nkaambo Bwami bwakujulu mbubwabo.”​​—Matayo 5:3.

 Leza uyanda kuti katumukomba antoomwe abamwi. Ikuti twacita oobo, cilakonzya kutugwasya kulimvwa kukkomana kapati.

•   Njiisyo yamu Bbaibbele: “Alimwi katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe, . . . pele katukulwaizyanya umwi amweenzinyina.”​​—Bahebrayo 10:24, 25.

 Kutegwa muzyibe makani manji kujatikizya kaambo ncociyandika kweeleba penzi lyakulendelelwa, amubale cibalo cakuti “Kulendelelwa Munyika Iizwide Mincini.”