Mu May 23, 2023, mupati-pati mukulanganya makani aanseba umwi waku United States wakaambila banamaleya social media mboili mukubajatikizya munzila mbyaabi bakubusi banji.

•   “Nokuba kuti social media ilijisi bubotu kubana alimwi akubakubusi bamwi, kuli zintu zimwi zitondezya kuti ilakonzya kubanyonganya mumizeezo akumubili.”—Bbuku litegwa Social Media and Youth Mental Health: The U.S. Surgeon General’s Advisory, 2023.

 Bbuku eeli lyakaamba twaambo ncotweelede kwaabikkila maano makani aaya.

•   Bakubusi ibajisi myaka iili akati ka 12 a 15 “ibatola mawoola aainda kuli otatwe kabali a social media bakali kulangilwa kuba amalwazi aamumizeezo kubikkilizya azitondezyo zyabulwazi bwakutyompwa alimwi akulibilika.”

•   Ciindi aabo bajisi myaka iili 14, “nobabelesya kapati social media baba acilabila, balafwubaazyigwa, balimvwa bubi kujatikizya mbobalibonya, balimvwa kubula mpindu, alimwi akutyompwa. Alimwi eeci cicitikila kapati bana basimbi kwiinda basankwa.”

 Mbuti bazyali mbobakonzya kukwabilila bana babo kuntenda eezyi? Bbaibbele lilapa lulayo lugwasya.

 Amujatikizyigwe muzintu nzyobacita bana. Mbuli bazyali, amuzizyibe ntenda ziliko mpoonya akubona naa mwanaanu uleelede kubelesya social media naa pe.

•   Njiisyo yamu Bbaibbele: “Koyiisya mwana inzila njayelede kweendela.”—Tusimpi 22:6.

•   Kutegwa mwiiye zinji, amubone cibalo cakuti “Sena Mwanaangu Uleelede Kubelesya Social Media?”

 Ikuti mwazumizya mwanaanu kubelesya social media, amuzyibe bubi bukonzya kuboola alimwi akujatikizyigwa muzintu nzyacita ciindi nali a social media. Mubuti?

 Amukwabilile mwanaanu kuzintu zibi. Amumuyiisye mwanaanu kuzizyiba alimwi akuzyeeleba zintu zibi zijanika a social media.

•   Njiisyo yamu Bbaibbele: “Bwaamu abusofwaazi bwamusyobo uuli woonse naa busyaacivwulemwangu tazyeelede nokuba kwaambwa akati kanu pe, . . . alimwi kutabi bukkale buusya nsoni naa makani aabufwubafwuba naa kwaamba masesya aajatikizya zintu zitondwa.”—Baefeso 5:3, 4.

•   Kutegwa mujane nzila zigwasya, amubale cibalo cakuti “Kuyiisya Mwanaanu Mbwakonzya Kwiibelesya Kabotu Social Media.”

 Amumubikkile minyinza. Mucikozyanyo, amumubikkile ciindi nayelede kuunka a social media alimwi aciindi ncayelede kutola.

•   Njiisyo yamu Bbaibbele: ‘Amucenjele kapati. Kamweenda mbuli bantu basongo, akucibelesya kabotu ciindi coonse ncomujisi.’—Baefeso 5:15, 16.

•   Amubelesye kavidiyo katudooli twakudulowiŋa abboodi kakuti Amubacenjelele Aabo Mbomwiizya Limwi a Intaneti kutegwa mugwasye mwanaanu kumvwisya kaambo kubikka minyinza ncokuyandika.