Kwamyaka yiinda ku 130, Bakamboni ba Jehova bamazuba aano balaswaangana antoomwe kumiswangano yacooko iicitwa mwaka amwaka. Miswaangano eeyi lino ilabikkilizya amakani aayinda ku 40 aayindene-indene antoomwe anyimbo, kubuzya-buzya, alimwi amavidiyo. Kutegwa muswaangano ubagwasye akubakulwaizya aabo bajanika, weelede ‘kumvwugwa akubonwa’ kabotu-kabotu. (Luka 2:20) Ino mbuti zyakusanga zyanu mbozibelesyegwa kutegwa boonse bagwasyigwe kumiswaangano yacooko, tacikwe makani ankobakkala?

 Bunji bwama sitediyamu amabuwa aakuswaanganina kumasi aali kumbo alijisi kale mincini ya audio/video. Aboobo ciindi notubbadela kubelesya busena oobo, nkaambo nzi ncotubikka mincini yesu? Ba David babelekela mudipatimenti ya World Headquarters Broadcasting bakaamba kuti: “Masena amwi ngotulentiŋa apangidwe munzila yakuti bantu kabaswiilila kubantu baambaula kwamawoola aainda ku 6. Mucikozyanyo, mumasena mobacitila zisobano, bapanga zyakwambilizya zifwaafwi akulizya twiimbo-imbo amincini eeyo. Amasikkilini aabo batondezya zintu zijatikizya zisobano, kusambala makwebo, alimwi akutondezya zisobano zyakainda kale. Mukwiimpana, swebo tuyanda kuti baswiilizi kabacikonzya kweebelela mavidiyo malamfwu akumvwa kabotu-kabotu majwi woonse aali mukwaambwa.”

 Masena aakucitila miswaangano aliindene, aboobo ayalo mincini yeelede kwiindana-indana kweelana amasena aayo. Mbobamanina buyo kusala masena, bamu Broadcasting Department iili kumitabi yesu balalanga-langa mbobayookkala basimuswaangano. Icibagwasyilizya kusala kabotu nkuzyiba mweelwe wabantu balangilwa kuyoojanika alimwi ambobuli bupati busena. Kumane bakwesu baleezyeezya masipikka alimwi amasikkilini nkwaayoobikkwa, mbwayoobikkwa, akulemba mulongo wazintu zyoonse ziyooyandika kutegwa boonse basimuswaangano bakacikonzye kubona akumvwa pulogilamu yoonse.

 Kumiswaangano yacooko ikubelesyegwa myaambo minji, bubambe bwa Audio/video bulakatazya kapati. Ikuti naa pulogilamu ilasandululwa mumwaambo uumbi, basikusandulula balaswiilila kubelesya mincini imwi, mpoonya kubelesyegwa radio channel iilibedelede kutola makani kuli baabo babelesya mwaambo ooyo. Lino mbwaanga kubelesyegwa ma media player aalubazu, boonse basimuswaangano baleebelela vidiyo yomwe, nokuba kuti inga kakubelesyedwe myaambo yiindene-indene ili 8. Ba David bakaamba kuti: “Mincini eeyi ilakatazya kapati, aboobo basikwiibelesya beelede kuyiisyigwa cakulomya.”

 Kumaofesi aamitabi manji, bajisi zibelesyo nzyobainduluka kubelesya mwaka amwaka. Kumasena aali boobu, bakwesu balabikka bubambe bwakuti zibelesyo eezyo kazinyamunwa kuzwa amuswaangano wacooko umwi kuunka kuli uumbi. Mutabi waku United States ulikke buyo ubelesya mali aayinda ku $200,000 a mwaka amwaka kunyamuna zibelesyo zyamuswaangano wacooko. Nokuba boobo, eeci taciduli tweezyanisya akuula zibelesyo zimwi. Ba Steven, ibakali kugwasyilizya kulanganya audio/video amuswaangano wacooko ku Canada bakaamba kuti: “Tiimu yesu yakabona masimpe kuti tubbautu toonse, ntambo, azyoonse buyo zyakabikkilwa maano, kuyobolwa kabotu-kabotu, akuti zyakali kukonzya kubelesyegwa kumuswaangano uutobela.”

 Kulentiŋa zibelesyo zya audio/video kuladula kapati, inga tazili ziyumu alimwi inga tazibambwi kabotu. Aboobo, inga tulalyuulila zibelesyo nzyotuyandika. Calino, sikkilini iilampa mamita aali 5 mubulamfwu amamita otatwe mubwamba yuulya mali aasika ku $24,000. Kumane, noiba buyo ntambo yamaikkulofooni yomwe iilampa mamita aali 15 yuulya mali aasika ku $20. Aboobo, ba Broadcasting babeleka antoomwe aba Purchasing Department “kubona mali aayandika” kabatanaula cibelesyo cili coonse. (Luka 14:28) Mucikozyanyo, bali bongaye bantu ibayoogwasyigwa acibelesyo eeco? Sena kweelede kuulwa cipya naa kubelesya buyo nzila imbi? Sena tulijisi kwakuciyobweda, alimwi sena tulijisi basikulisungula bakayiisyigwa bakonzya kucilanganya?

 Kutegwa zibelesyo nzyotujisi zikkale kwamyaka minji akutugwasya kuyobola mali aasangwa, lyoonse tulazilanga-langa akuzibamba kuti kwayandika. Kunze lyaboobo, ciindi notuzinyamuna, tubelesya zinyamwido zilema kapati kutegwa zili mukati zitanyonyooki, alimwi azyalo zinyamwido eezyi zilabambwa kuti zyanyonyooka.

 Bantu batali Bakamboni balatulumbaizya kapati akaambo kambozili zibotu zibelesyo zya audio/video nzyotubelesya lyamiswaangano yacooko. Mucikozyanyo, amuswaangano umwi wacooko, mubelesi umwi uubelekela kuŋanda yabasikapepele mpati munyika yoonse wakaamba kujatikizya mbwaali mabotu mavidiyo eesu. Mukwesu Jonathan uugwasilizya ku audio/video amiswangano yacooko wakaamba boobu kujatikizya mubelesi ooyu: “Wakagambwa kuzyiba kuti bantu boonse bakali kubelekela mutiimu yesu bakali basikulisungula buyo alimwi tiibakali basyaazibwene mumulimo ooyu. Wakaamba kuti kampani yabo yakalikukonzya kutola mazuba aali 5 kubikka nzyotwakabikka mubuzuba bomwe acisela.” Kumuswaangano wacooko umwi, sikulanganya busena wakaamba kuti, “kuli basyaazibwene banji banyimbo alimwi amavidiyo balaakuboola abusena obuno, pele nsenabwene bantu bazyi kabotu ncobacita bali mbuli ndinywe!”

 Mbuti mbomwagwasyigwa azibelesyo zya audio/video amuswaangano wacooko? Ambweni mulimvwa mbuli mbobakalimvwa ba David, balo ibakkala ku England. Bakaamba kuti: “Ndijisi myaka 88 alimwi ndali kujanika kumiswaangano yacooko buumi bwangu boonse. Pele lino ncuuba-uba kwiinda kaindi kuswiilila cakubikkila maano kumuswaangano. Kwiinda mumavidiyo mabotu pulogilamu yoonse ileenda cakufwambaana alimwi makani alamvwika akweendelana kabotu.” Ba Micheal, ibakkala ku Nigeria bakaamba kuti, “Akaambo kakuti zibelesyo nzibotu, bakwesu tabacipengi kumvwa naa kweebelela mavidiyo, alimwi cilabagwasya kwiikkomanina akwiibikkila maano pulogilamu.”

 Nomunooli kumuswaangano wamwaka uno wakuti ‘Amwaambilizye Makani Mabotu’! Wacooko naa Waalubazu, amukaime asyoonto akuyeeya zyakajatikizyidwe kutegwa mugwasyigwe kumvwisya akubona pulogilamu yoonse. Tulalumba kuti zyakusanga zyanu, kubikkilizya azyeezyo zicitwa kubelesya donate.dan124.com, zyagwasilizya kutegwa mulimo ooyu ukonzyeke. Twalumba kapati.