Mwayandana amuntu umwi, mpoonya mwamvwana kuti muzyibane kabotu kutegwa mubone naa muleelela kukwatana. Ncinzi ncomweelede kulangila cisyabo canu mbociyaabuya ambele?

Mucibalo eeci tulalanga-langa makani aatobela:

•  Kamulangila kuba amibandi iizwa ansi aamoyo

•  Kamulangila kuba amizeezo iindene

•  EKamulangila kukatala akaambo kacisyabo

 Nywebo amuntu ngomusyabene limwi muyakuzyibana kabotu ciindi nomwiizya antoomwe. Zimwi zintu munakuzizyiba mwabona micito yamweenzinyoko.

 Pele kuli zintu nzyomweelede kubandika cakuzwa ansi aamoyo. Nomucita boobo, amusolekesye kutapanga zyakusala akaambo buyo kambomulimvwa muciindi cakulanga twaambo twamasimpe.

 Twaambo tumwi ntomweelede kubandika ntootu tutobela:

•   ● Makani aamali. Sena mulaazikwelete? Sena zimwi ziindi cilamuyumina kubelesya kabotu mali? Ikuti naa mwakwatana, mbuti nywebo angomuyookwatana limwi mbomunikwaabwabelesya mali?

•   Nseba. Sena nseba yanu ili kabotu? Sena kuli nomwakacisidwe kapati musyule?

•   Mbaakani. Ino ncinzi ncomuyanda kucita mubuumi bwanu? Sena mbaakani zyanu zileendelana azyamuntu ngomusyabene limwi? Mwakukwatana, sena muyoozumanana kukkomana ikuti bukkale bwanu bukacince akutaizuzikizya mbaakani yanu?

•   Mukwasyi. Sena mulijisi mukuli wakulanganya mukwasyi? Sena muyeeya kuti mukuli ooyu uyoozumanana kumbele? Sena muyanda kuyooba abana? Ikuti naa mboobo, ino bongaye?

 Ciindi nomubandika makani aali boobo mweelede kusyomeka cakumaninina. Tamweelede kusisa naa kupindamuna makani aali woonse akaambo buyo kakuyanda kukkomaninwa amuntu ngomusyabene limwi.​—Bahebrayo 13:18.

 Ncomweelede kuyeeya: Ino ncinzi ncomweelede kuzyiba kujatikizya muntu ngomusyabene limwi? Ino ncinzi ncayelede kuzyiba kujatikizya ndinywe? Ino kutasisa cili coonse kuyoomugwasya buti kulibambila kusyomeka kumbele mwaakuyanda kukwatana?

 Njiisyo yamu Bbaibbele: “Umwi aumwi wanu aambe zyamasimpe kumweenzinyina.”​—Baefeso 4:25.

 “Musimbi ulakonzya kuyeeya kuti, ‘mumyezi buyo iili 6, tulakwatana,’ pele musankwa walo inga kayeeya kuti kulainda mwaka. Ikuti caba boobo, musimbi cilakonzya kumucisa alimwi akunyongana mumizeezo akaambo kakuti ciindi ncalangila tacili ceeco ncalangila. Cilayandika kuti boonse kabajisi muzeezo omwe.”​—ba Ariana, balikwetwe kwamwaka omwe.

 Kunyina bantu bobilo bakozyenye. Aboobo mutayeeyeli kuti munoozuminana naa kweendelana amuntu ngomusyabene muzintu zyoonse. Mucikozyanyo, zilengwa ambwaakakomezyegwa muntu uumwi kulakonzya kujatikizya mbomuzilanga zintu.

 Ncomweelede kuyeeya: Ciindi nomwatamvwana mutwaambo tutayi koomoonga, sena mulilibambilide kunyoneka kutegwa kube luumuno ikuti kakunyina njiisyo yamu Bbaibbele iijatikizyidwe?

 Njiisyo yamu Bbaibbele: “Bantu boonse abazyibe kuti mulanyoneka.”​—Bafilipi 4:5.

 Nokuba kuti mulimvwa kuti muleelelana, munakwiindana muzintu zimwi. Kuyungizya waawo, kweendelana kulayandika, pele bube mbomutondezya ciindi nomwaimpana mbobuyandika kapati.”​—Ba Matthew, balikwete kwamyaka iili 5.

 Cakutadooneka cisyabo ciyooyanda ciindi cinji canu alimwi cilakonzya kumupa kukatala. Ino ncinzi cikonzya kugwasya?

 Amulibikkile minyinza. Tamweelede kunyonganizyigwa acisyabo canu cipya cakuti mwaluba mikuli yanu alimwi abalongwe banu bambi. Ba Alana, ibakwete kwamyaka iili 5 bakaamba kuti: “Muciyooyandika kuba abalongwe mwakukwata naa kukwatwa alimwi abalo banocimuyanda. Tamweelede kucita mbuli kuti tamubabwene, akaambo buyo kakuti mwakasyaba.”

 Kamuyeeya kuti, mwakwata naa kukwatwa, mweelede kuzilanga kabotu zintu mumbazu zyabuumi zyoonse. Inga cainda kubota kutalikila limwi kucita boobo ciindi nomucili mucisyabo.

 Ncomweelede kuyeeya: Sena mulakuyanda ciindi cinji alimwi akubikkilwa maano kumuntu ngomusyabene limwi? Sena muyeeya kuti muntu ngomusyabene limwi uyanda ciindi cinji kulindinywe? Ino mbuti nyoonse mbomukonzya kuba bantu banyoneka cakuti takwe uumvwa kukatala akati kanu?

 Njiisyo Yamu Bbaibbele: “Zintu zyoonse zilijisi ciindi canzizyo, ciindi cazintu zyoonse zicitika.”​—Mukambausi 3:1.

 “Ikuti bantu ibeebana kabacita buyo zintu zyakulikondelezya zilikke, balakonzya kugambwa kujatikizya cikwati. Aboobo inga cabota kuti kabacitila antoomwe milimo yabuzuba abuzuba mbuli kuunka mukuula zintu, kubeleka milimo yaaŋanda alimwi akukomba antoomwe. Kucita boobu kulakonzya kubagwasya kuba acilengwa cakubelekela antoomwe calo icikonzya kubagwasya mucikwati cabo.”​—Ba Daniel, balikwete kwamyaka yobilo.

 Kamuyeeya kuti, kusyabana nkwaciindi buyo cisyoonto kutegwa mucikonzye kusala naa inga mwakwatana amuntu ooyo naa pe. Cibeela 3 cazibalo eezyi, ciyoobandika zintu nzyomweelede kulanga-langa ciindi nomupanga cakusala eeco.