“Aboobo, amulicesye ansi aajanza lya Leza lyanguzu, kutegwa akamusumpule kuciindi ceelede, kumwi kamuwaala makatazyo aanu oonse kulinguwe, nkaambo ulamubikkila maano.”—1 Petro 5:6, 7, Bbaibbele lya Busanduluzi Bwanyika Mpya.

 “Amulibombye kujanza lya-Leza lyanguzu, kuti akamusumpule kuciindi ceelede. Makataazyo aanu oonse amwaasowele kumaanza aakwe, nkaambo nguumucebuka lyoonse.”—1 Petro 5:6, 7, The Bible in Tonga Lyamu 1963.

 Kwiinda mukwaamba majwi aaya, mwaapostolo Petro wakasyomezya Banakristo kuti balakonzya kupaila kuli Leza kujatikizya mapenzi aabo alimwi azintu zibapa kulibilika. Leza ulabayanda bantu balicesya, alimwi uyoobalumbula.

 “Amulicesye . . . ansi aajanza lya Leza.” Mu Bbaibbele, kanji-kanji janza lya Leza lyaamba nguzu nzyajisi zyakufwutula bantu alimwi akubakwabilila. (Kulonga 3:19; Deuteronomo 26:8; Ezara 8:22) Banakristo balalicesya ansi aajanza lya Leza ciindi nobamusyoma. Balizyi kuti balalezya alimwi balayeeya kuti tabakonzyi kwaazunda mapenzi munguzu zyabo. (Tusimpi 3:5, 6; Bafilipi 4:13) Balisinizyide kuti Leza ulijisi nguzu zyakubagwasya muciindi ceelede alimwi munzila iinda kubota.—Isaya 41:10.

 “Kutegwa akamusumpule kuciindi ceelede.” Aabo baliyumya mumapenzi cakukkazika moyo balakonzya kusinizya kuti, Leza uyoobasumpula nkokuti kubalumbula. Takonzyi kulekela bakombi bakwe kuti basunkwe cakumaninina naa kwiinda nguzu zyabo. (1 Bakorinto 10:13) Kuyungizya waawo, ikuti bazumanana kucita zibotu, Leza uyoobalumbula “kuciindi ceelede.”—Bagalatiya 6:9.

 “Kumwi kamuwaala makatazyo aanu oonse kulinguwe, nkaambo ulamubikkila maano.” Banakristo balakonzya kuwaala makatazyo aabo oonse kuli Leza kwiinda mukupaila cakulicesya kulinguwe. Bbuku limwi lyaamba kuti: “Ibbala lya kuwaala lijisi muzeezo wakusolekesya kusowa cintu cimwi. Kuyungizya waawo, lyaamba cintu cimwi muntu ncacita kuzwa ansi aamoyo.” Ikuti Munakristo wawaala makatazyo aakwe kuli Leza, inga wacesya kulibilika kwakwe alimwi ulakonzya kuba ‘aluumuno lwa Leza’ kweelana a Bbaibbele mbolyaamba. (Bafilipi 4:6, 7) Kumane, ulakonzya kuba masimpe kuti Leza ulayanda kumugwasya nkaambo ulizyi kuti ulamubikkila maano alimwi akuti inga wabelesya Nguzu zyakwe zinji kumulanganya.—⁠Intembauzyo 37:5; 55:22.

 Caandaano 5 cijisi majwi aamamanino Petro ngaakalembela Banakristo mulugwalo lwakwe lwakusaanguna. (1 Petro 1:1) Mbubonya mbocibede mazubaano, basikutobela Kristo bakaindi, bakali kujana mapenzi manji aakasunka lusyomo lwabo alimwi akubapa kulibilika. (1 Petro 1:6, 7) Kazyi mapenzi ngobakajisi, Petro wakabalembela lugwalo lubotu lwakabakulwaizya alimwi akubawumbulizya, cakuma 62-64 C.E.—1 Petro 5:12.

 Petro wakamana lugwalo lwakwe aciyeekezyo cikulwaizya baabo ibajana mapenzi akaambo kalusyomo lwabo. Ikuti bazumanana kulicesya alimwi akusyoma Leza, balakonzya kusinizya kuti uyoobagwasya kwiima nji. (1 Petro 5:5-10) Mbubonya buyo, majwi aa Petro alakonzya kubakulwaizya Banakristo ibali mukupenzyegwa mazubaano.

 Amweebelele kavidiyo aaka mubone zijatikizyidwe mubbuku lya 1 Petro.