TUPANGO TWAMU BBAIBBELE TWAPANDULULWA

Matalikilo 1:26—“Atulenge Muntu Mucinkozya Cesu”

AMULIZYE

“Mpoonya Leza wakati: “Atulenge muntu mucinkozya cesu, kweelana ambotubede, beendelezye nswi zyamulwizi azilenge zyuuluka mujulu alimwi abanyama bavwubwa anyika yoonse abanyama boonse bakalaba anyika.”—Matalikilo 1:26, Bbaibbele lya Busanduluzi Bwanyika Mpya.

“Elyo Leza wakaamba kuti, Atupange muntu mucinkozya cesu, abe mbubonyambuli ndiswe. Baendelezye inswi zyamumaanzi, abayuni bakujulu, aŋombe, anyika yoonse, abauka boonse bayavula ansi.’”—Matalikilo 1:26, The Bible in Tonga Lyamu 1963.

Bupanduluzi bwa Matalikilo 1:26

Bantu bakalengwa mucinkozya ca Leza, calo caamba kuti balakonzya kuba abube mbwajisi Leza mbuli luyando, lweetelelo alimwi abululami. Nkakaambo kaako bantu balakonzya kubwiiya bube bwa Leza.

“Mpoonya Leza wakati: ‘Atulenge muntu mucinkozya cesu.’” Jehova Leza a katanalenga cintu cili coonse, wakalenga mungelo uujisi nguzu kapati walo kumbele wakazyi kwiitwa kuti Jesu. Kwiinda mulinguwe, “zintu zimbi zyoonse zyakalengwa kujulu alimwi aanyika.” (Bakolose 1:16) Jesu ulabutondezya bube bwa Jehova, eeci caamba kuti “ngonguwe cinkozya ca Leza uutalibonyi.” (Bakolose 1:15) Mpoonya, Leza wakaambila Jesu kuti: “Atulenge muntu mucinkozya cesu.”

“Beendelezye . . . banyama bavwubwa anyika yoonse.” Banyama tiibakalengwa mucinkozya ca Leza. Tiibakalengwa munzila yakuti kabacikonzya kutondezya bube bwabantu mbuli luyando naa kuba amanjezyeezya. Nokuba boobo, Leza ulababikkila maano. Nkakaambo kaako wakaamba kuti bantu “beendelezye” banyama. Aboobo Jehova wakapa bantu mukuli wakulanganya banyama. (Intembauzyo 8:6-8; Tusimpi 12:10) Jehova uyanda kuti bantu kabailanganya kabotu nyika azilenge zyoonse zipona izili mulinjiyo.

Makani aayengelede lugwalo lwa Matalikilo 1:26

Zyaandaano zyobilo zyakusaanguna izili mubbuku lya Matalikilo zitondezya kulengwa kwabubumbo, nyika yesu, alimwi abuumi mbobwakatalika anyika. Zintu zyoonse nzyaakalenga Jehova nzibotu, pele cilenge ciinda kubota muntu. Ciindi Leza nakamanizya kulenga zintu zyoonse “wakabona kuti zintu zyoonse nzyaakalenga, nzibotu kapati.”—Matalikilo 1:31.

Amweebelele kavidiyo aaka kutegwa mwiiye zinji kujatikizya bbuku lya Matalikilo, mubone bubumbo mbobwakatalika.

Media player yaalilwa kulizya.Amudaunilode Vidiyo Eeyi

Makani aakubeja kujatikizya Matalikilo 1:26

Makani aakubeja: Leza ujisi mubili wanyama mbuli ndiswe.

Makani aamasimpe: “Leza Muuya” eeci caamba kuti, takkali munyika eeyi. (Johane 4:24) Nokuba kuti Bbaibbele zimwi ziindi lilaamba kujatikizya busyu bwakwe, maanza, moyo alimwi azintu zimwi buyo, zintu eezyi zilaambwa kujatikizya Leza munzila eeyi kutegwa bantu kabacikonzya kumvwisya.—Kulonga 15:6; 1 Petro 3:12.

Makani aakubeja: Lugwalo lwa Matalikilo 1:26 lwaamba Jesu kuti ngu Leza.

Makani aamasimpe: Leza alimwi a Jesu bajisi cilongwe ciyumu mbuli cilongwe cili akati kamwana abausyi, pele baliindene. Jesu wakayiisya kuti Leza mupati kwiinda nguwe. (Johane 14:28) Kutegwa mwiiye zinji, amweebelele kavidiyo kakuti Sena Jesu Kristo Ngu Leza? naa kubala cibalo cakuti “Nkaambo Nzi Jesu Ncaitwa Kuti Mwana wa Leza?”