Nkondo noyakamana kwakaumuna wii a Kkuti lya Ela. Muwo nowakali kubbubbula amatente ciindi cakumangolezya, Mwami Saulo wakabunganya bantu. Mwanaakwe mupati Jonatani awalo wakaliko, mpoonya kwakali mweembezi mukubusi iwakali kubalwiida calukkomano kujatikizya cakacitikide. Mukubusi ooyu wakali Davida, wakali musungu kapati alimwi wakali kusangaalizya. Saulo wakali kuswiililisya kapati kuli nzyaakali kwaamba Davida kutegwa kutabi kaambo nokaba komwe kamwiinda. Pele, ino mbuti Jonatani mbwaakalimvwa? Wakali kuzunda munkondo kwaciindi cilamfwu kuzwa naakatalika kusololela mpi yabasikalumamba ba Jehova. Pele buzuba oobo Jonatani talinguwe wakazunda pe; wakazunda mukubusi Davida. Davida wakamujaya Goliyati sintanze! Sena Jonatani wakamumvwida munyono Davida akaambo kakuti bantu boonse bakali kutembaula nguwe?

Tamukonzyi kusyoma mbwaakalimvwa Jonatani. Tubala kuti: “Lino Davida mbwaakamanina buyo kwaambaula a Saulo, Jonatani a Davida bakamvwana kapati, eelyo Jonatani wakatalika kumuyanda Davida mbubonya mbwaliyanda mwini.” Jonatani wakapa Davida zisani zyakwe, kubikkilizya abuta. Eelo kaka eeci cakali cipego cibotu, mbwaanga Jonatani wakazyibidwe kuti wakali sikalumamba uucibwene. Kuyungizya waawo, Jonatani a Davida bakapanga cizuminano, cizuminano cakuba balongwe beni-beni ibanoogwasyanya lyoonse.​—1 Samuele 18:​1-5.

Oobo mbocakatalika cilongwe cimwi cabantu bakali kumvwana kapati caambidwe mu Bbaibbele. Cilongwe cilayandika kapati kubantu basyomeka. Ikuti twasala cabusongo balongwe akuba balongwe basyomeka, tulakonzya kuyumya lusyomo lwesu muciindi ecino bantu mobatakwe luyando. (Tusimpi 27:17) Aboobo atubone ncotukonzya kwiiya kuli Jonatani kujatikizya cilongwe.

Ino cilongwe eeci cakafwambaana buti kuba? Bwiinguzi buyeeme antalisyo yacilongwe eeci. Amubone mbocakatalika. Aciindi eeci, Jonatani wakajisi mapenzi. Bausyi, Mwami Saulo bakali kuyaabwiindila buya kubija. Aciindi cimwi wakali kulicesya, wakajisi lusyomo alimwi wakali kumvwida, pele wakaba mwami uulisumpula alimwi uutanyoneki.​—1 Samuele 15:17-​19, 26.

Kucinca kwa Saulo kweelede kuti kwakamupenzya kapati Jonatani, nkaambo wakali kubayanda kapati bausyi. (1 Samuele 20:2) Kulangilwa kuti Jonatani wakali kulibilika kapati kujatikizya mapenzi Saulo ngaakali kuyooletela cisi ca Jehova cisalidwe. Sena kutasyomeka kwamwami ooyu kwakali kukonzya kupa kuti bantu bamuzangile Jehova akuti aleke kubakkomanina? Cakutadooneka, oobu bwakali bukkale bukatazya kuli Jonatani, imwaalumi wakajisi lusyomo.

Makani aaya alatugwasya kumvwisya cakapa kuti Jonatani amuyande mukubusi ooyu Davida. Jonatani wakabona lusyomo lupati ndwaakajisi Davida. Amuyeeye, mukwiimpana abasikalumamba ba Saulo, Davida tanaakamuyoowa Goliati nokuba kuti wakali sintanze. Wakalizyi kuti kuunka kunkondo muzina lya Jehova kwakali kuyoomupa kuba anguzu kwiinda Goliati azilwanyo zyakwe zyoonse.​—1 Samuele 17:45-​47.

Kumatalikilo, Jonatani awalo mbwaakazyi oobo. Wakalisinizyide kuti baalumi bobilo, walo asikumunyamwida zilwanyo, bakali kukonzya kwiizunda nkamu mpati yabasikalumamba ibakajisi zilwanyo. Nkaambo nzi? Jonatani wakati: “Kunyina cikonzya kulesya Jehova.” (1 Samuel 14:6) Aboobo Jonatani a Davida bakajisi bube bukozyenye: lusyomo luyumu muli Jehova alimwi bakali kumuyanda kapati. Aawa mpaakayeeme cilongwe cabaalumi aaba bobilo ibakali kumvwana kapati. Nokuba kuti Jonatani wakali mwana wamwami singuzu naakali amyaka iitandila kuma 50, mpoonya walo Davida wakali buyo mweembezi uulicesya ambweni uutanakkwanya amyaka iili 20, kwiindana ooku kwakanyina makani. *

Cizuminano ncobakapanga ncobeni cakali kukwabilila cilongwe cabo. Munzila nzi? Mutalubi kuti Davida wakalizyi Jehova ncaakali kuyanda kumucitila: Wakeelede kuba mwami uutobela wa Israyeli. Sena wakaasisa makani aaya kuli Jonatani? Peepe! Cilongwe cibotu mbuli ceeci cilayuma ikuti kamubandika cakwaanguluka, kutasisa makani aali oonse alimwi akutabeja. Ino Jonatani wakalimvwa buti akaambo kakuti Davida wakali kuyooba Mwami? Ino mbuti kuti Jonatani wakali abulangizi bwakuyooba mwami bumwi buzuba kutegwa akabambulule zintu bausyi nzyobakanyonganya? Bbaibbele kunyina nolyaamba naa Jonatani wakapenga mumoyo; litwaambila buyo kujatikizya makani aayandika kapati, nkokuti kusyomeka kwa Jonatani alimwi alusyomo lwakwe. Wakalibwene kuti muuya wa Jehova wakali aa Davida. (1 Samuele 16:​1, 11-​13) Aboobo Jonatani wakacizuzikizya cikonke cakwe alimwi wakazumanana kubona Davida kutali mbuli sinkondonyina, pele mbuli mulongwe wakwe. Jonatani wakali kuyanda kuti kuyanda kwa Jehova kucitwe.

Cilongwe eeci cakaba cilongezyo citaliboteli. Ino ncinzi ncotukonzya kwiiya kulusyomo lwa Jonatani? Mubelesi wa Jehova uuli woonse weelede kubona bubotu buboola akaambo kakuba abalongwe. Kutegwa tubujane bubotu oobu tweelede kuba abalongwe bajisi lusyomo luyumu, tacikwe makani aciimo cabo naa nkobazwa. Jonatani a Davida bakali kuyumizyanya akukulwaizyanya bunji bwaziindi. Boonse bobilo bakeelede kuyumizyanya akaambo kakuti kwakali masunko kumbele aakali kuyoosunka cilongwe cabo.

Kumatalikilo, Saulo wakali kumuyanda kapati Davida cakuti wakamubikkide kuba mupati wabasikalumamba bakwe. Pele tiilyakalampa, Saulo wakaba amunyono, imuuya mubi Jonatani ngwaakazunda. Davida wakazunda ba Filisiti basinkondonyina abana Israyeli munkondo zyoonse nzyobakalwana. Eeci cakapa kuti atembaulwe alimwi akuyandwa kapati. Mane buya bamakaintu bamwi bana Israyeli bakatalika kwiimba kuti: “Saulo wajaya bantu bali zyuulu, pele Davida wajaya makumi aazyuulu.” Saulo tanaakalukkomanina lwiimbo oolu. Tubala kuti: “Kuzwa buzuba oobo, Saulo lyoonse tanaakacili kumulanga kabotu Davida.” (1 Samuele 18:7, 9) Wakali kuyoowa kuti Davida wakali kuyoomunyanga bwami. Ooku tiikwakali kuyeeya kulikabotu. Masimpe, Davida wakalizyi kuti ngowakali kuyoonjila mubusena bwa Saulo, nokuba boobo kunyina naakayanda kumunyanga bweendelezi mwami iwakananikidwe a Jehova naakacili kweendelezya!

Saulo wakali kuyanda kuti Davida ajaigwe munkondo, pele makanze aakwe taakazwidilila. Davida wakazumanana kuzunda munkondo alimwi bantu bakamuyanda kapati akumulemeka. Nzila iimbi Saulo njaakasola kubelesya njakubunganya bamuŋanda yakwe boonse kubikkilizya ababelesi bakwe amwanaakwe mupati kutegwa bamujaye Davida! Amuciyeeyele buyo mbwaakatyompwa Jonatani kubona bausyi kabacita cintu cili boobu! (1 Samuele 18:25-​30; 19:1) Jonatani wakali mwana uusyomeka, pele alimwi wakali mulongwe uusyomeka. Lino mbwaanga wakeelede kusyomeka kumukwasyi akumweenzyinyina, ino wakawida kulubazu luli?

Jonatani wakaamba kuti: “Omwami utabisyi kujatikizya mubelesi wako Davida, nkaambo taakwe ncaakakubisizya; alimwi kufwumbwa ncaakucitila cakugwasya. Wakabikka buumi bwakwe muntenda ciindi naakajaya mu Filisiti, cakuti Jehova wakapa luzundo lupati kubana Israyeli boonse. Wakalibonena ameso aako alimwi wakakkomana kapati. Aboobo ino nkaambo nzi ncoyanda kubisizya muntu uutajisi mulandu mbuli Davida, kwiinda mukumujaya kakunyina akaambo?” Aciindi aawa, Saulo wakalitondezya kumuswiilila Jonatani akusyomezya kuti takoomujaya Davida. Pele Saulo taakacizuzikizya cisyomezyo eeco. Ciindi Davida naakazunda nkondo azimbi, Saulo wakaindila kumufwida munyono cakuti wakamufwusa sumo! (1 Samuele 19:​4-6, 9, 10) Pele Davida wakaleya akutija.

Sena kuli nomwakalijanide mubukkale momweelede kusyomeka kumabazu obilo? Cilakonzya kukatazya kapati. Mubukkale buli boobo, bamwi inga bamwaambila kuti mweelede kusaanguna kusyomeka kumukwasyi. Pele Jonatani wakalizyi kuti tiicakaluzi. Mbuti mbwaakali kukonzya kuba kulubazu lwabausyi, kakuli Davida wakali kusyomeka alimwi akumvwida Jehova? Aboobo kusala kwa Jonatani kwakayeeme akusyomeka kwakwe kuli Jehova. Eeci ncocakapa kuti amwiiminine Davida. Pele nokuba kuti Jonatani wakali kusyomeka kapati kuli Leza, wakatondezya kuti ulasyomeka kuli bausyi kwiinda mukubapa lulayo cakutabainda mumbali muciindi cakubayoowa. Toonse buyo tulakonzya kugwasyigwa kwiinda mukwiiya kusyomeka kwa Jonatani.

Jonatani wakasola alimwi kumupa lulayo Saulo kuti abambe luumuno a Davida, pele aciindi aawa Saulo tanaakasola akuswiilila. Davida wakaboola kuli Jonatani cakusisikizya, kumwaambila kuti wakali kuyoowa kujaigwa. Wakaambila mweenzinyina kuti: “Kwasyaala buyo aniini kuti ndifwe!” Jonatani wakazumina kuyoomvwa mbobakali kuyeeya bausyi kujatikizya makani aaya mpoonya akwaambila Davida naa bakalilibambilide kubamba luumuno anguwe. Aboobo bakapangana kuti Davida akayube, eelyo Jonatani wakali kuyoomuzyibya zintu mbozyabede kwiinda mukubelesya mivwi abuta. Pele cilikke ncaakalomba Jonatani kuli Davida ncakuti akacibambe cikonke cakwe cakuti: “Utakaleki kutondezya luyando lutamani kuli bamuŋanda yangu, noliba leelyo Jehova aakunyonyoona basinkondonyina boonse ba Davida anyika.” Davida wakazumina kuti uyoobalanganya boonse bamuŋanda ya Jonatani.​—1 Samuele 20:3, 13-​27.

Jonatani wakasoleka kwaamba zintu zibotu kujatikizya Davida kuli Saulo, pele walo wakaindila buya kunyema! Wakaamba Jonatani kuti “mwana wamukaintu muzangi” akwaamba kuti kusyomeka kwakwe kuli Davida kwakaleta masampu mumukwasyi. Wakasola kumoongelezya kwiinda mukumwaambila kuti: “Mazuba oonse mwana wa Jese ngali muumi anyika, bwami bwako tabukakkazikizyigwi pe.” Cakutazungaana, Jonatani alimwi wakakombelezya bausyi kuti: “Ino nkaambo nzi ncayelede kujailwa? Ino wacita nzi?” Saulo wakakalala kapati! Nokuba kuti wakali kuyaabucembaala, wakacili sikalumamba singuzu. Wakamufwusa sumo mwanaakwe! Nokuba kuti wakalicibwene kufwusa masumo, pele wakamwiinzya. Eeci cakamucisa kapati Jonatani alimwi wakalimvwa kusampuka, mpoonya wakazwa kanyemede.​—1 Samuele 20:24-​34.

Buzuba bwakatobela mafwumofwumo, Jonatani wakaunka kubusena nkwaakayubide Davida. Wakafwusa muvwi mbubwenya mbobakapangene, kutondezya Davida kuti Saulo wakacili kuyanda kumujaya. Mpoonya Jonatani wakaambila mubelesi wakwe kuti ajoke kumunzi. Eelyo nobakacaala bobilo a Davida, bakabandika asyoonto. Boonse bakalila, alimwi Jonatani kauside kapati wakamulaya mweenzinyina, walo iwakatalika kupona mbuli muzangalisi.​—1 Samuele 20:35-​42.

Mubukkale oobu bukatazya, Jonatani wakatondezya kuti wakali kusyomeka ncobeni akuti tanaakali kuliyanda. Saatani, sinkondonyina wabantu boonse basyomeka, naakakkomana kubona Jonatani katobela nzila zya Saulo zibyaabi alimwi akuyandisya bweendelezi akupegwa bulemu. Amuyeeye kuti, Saatani ulakkomana kubona bantu baliyanda. Wakazwidilila ciindi naakeena bazyali besu bakusaanguna, ba Adamu a Eva. (Matalikilo 3:​1-6) Pele wakaalilwa kuli Jonatani. Eelo kaka Saatani wakausa kapati! Sena andinywe inga mwaazunda masunko aali boobu? Tupona muciindi muuya wakuliyanda moudumide kapati. (2 Timoteyo 3:​1-5) Sena kuli ncotukonzya kwiiya kukusyomeka akutaliyanda kwa Jonatani?

Saulo wakaindila buya kutamuyanda Davida cakuti lyoonse ngowakali mumizeezo yakwe. Jonatani wakabula cakucita, kalangilila bausyi kabacita mbuli kuti muntu uutakkwene, kubunganya basikalumamba babo akuyaabuzinguluka mucisi, kuyanda kujaya muntu uunyina mulandu. (1 Samuele 24:​1, 2, 12-​15; 26:20) Sena Jonatani wakatola lubazu? Kunyina Magwalo mpaatondezya kuti wakatola lubazu mumazwanga aaya ngobakatalisya bausyi. Akaambo kakuti Jonatani wakali kusyomeka kuli Jehova, kuli Davida, akucikonke cakwe cacilongwe, kunyina naakali kukonzya kutola lubazu mumazwanga aali boobu.

Tanaakacinca mbwaakali kulimvwa kujatikizya mweenzinyina Davida. Muciindi, wakamujana alimwi Davida. Wakamujana ku Horesi, bbala lyaamba kuti “Cisaka.” Busena oobu bwakajisi cisaka alimwi bwakali mumalundu kumusanza lwaajwe lya Hebroni. Nkaambo nzi Jonatani ncaakalibikka muntenda kuyoobona simutuntuli ooyu? Bbaibbele litwaambila kuti makanze aakwe akali aakugwasya Davida “kuti ayume muli Jehova.” (1 Samuele 23:16) Ino Jonatani wakacita buti oobo?

Jonatali wakaambila mweenzinyina ooyu iwakali mwana kulinguwe kuti: “Utayoowi.” Alimwi wakamusyomezya kuti: “Saulo taata takakujani pe.” Nkaambo nzi Jonatani ncaakali masimpe amajwi aaya? Akaambo kakuti wakalaalusyomo luyumu lwakuti makanze aa Jehova ayoozwidilila. Kumane wakayungizya kuti: “Yebo uyooba mwami wa Israyeli.” Musinsimi Samuele wakalaambide majwi aaya myaka minji yakaindide, lino Jonatani wakali kumuyeezya Davida kuti ijwi lya Jehova lyoonse lilazwidilila. Pele ino walo Jonatani wakali kuyeeya kuti ncinzi ciyoomucitikila kumbele? Wakati: “Mebo ndiyooba wabili kulinduwe.” Eelo kaka wakali kulicesya mwaalumi ooyu! Wakalilibambilide kuyooyendelezyegwa akuyoomugwasyilizya mwaalumi iwakali musyoonto kulinguwe amyaka iili 30. Kumamanino Jonatani wakati: “Saulo taata uulaazyi buya makani aaya.” (1 Samuele 23:17, 18) Saulo wakalizyi mumoyo kuti tanaakali kuyookonzya kumuzunda mwaalumi Jehova ngwaakasalide kuba mwami!

Mumyaka yakatobela, tacidoonekwi kuti Davida tanaakaciluba ciindi eeci ncobakaswaangene a Jonatani. Eeci ncecakali ciindi camamanino kubonana. Cuusisya ncakuti, bulangizi bwa Jonatani bwakuyooba wabili kuli Davida tiibwakazwidilila pe.

Antoomwe abausyi, Jonatani wakaunka kuyoolwana ba Filisiti, ibakalyaambilila kuti mbasinkondonyina ba Israyeli. Wakali kulwana antoomwe abausyi kajisi manjezyeezya aasalala, nkaambo lyoonse wakali kubikka mulimo wa Jehova mubusena bwakusaanguna, tacikwe makani akulubizya kwabausyi. Wakalwana cabusicamba alimwi cakusyomeka mbuli lyoonse, pele bana Israyeli tiibakazunda pe. Bubi bwa Saulo bwakaindila cakuti wakatalika kusyoma mizimo, cibi cipati mu Mulawo wa Leza, aboobo Jehova wakalilekede kumulongezya. Bana botatwe ba Saulo, kubikkilizya a Jonatani bakafwa munkondo eeyi. Saulo wakalicisa kapati kumane wakalijaya.​—1 Samuele 28:​6-​14; 31:​2-6.

Davida wakausa kapati. Mwaalumi ooyu iwakali aamoyo mubotu mane buya wakamulila Saulo, walo iwakamupenzya kapati! Davida wakalemba lwiimbo kujatikizya Saulo a Jonatani. Andiza majwi ngaakalemba aetezya kapati ngacilongwe ncaakajisi Davida a Jonatani. Wakati: “Ndapenga kapati mumoyo, mwanookwesu Jonatani; wali muntu mubotu kapati kulindime. Luyando lwako kulindime lwali lubotu kapati kwiinda luyando lwabamakaintu.”​—2 Samuele 1:​26.

Davida tanaakaciluba cikonke cakwe kuli Jonatani. Myaka minji kumbele, wakayandaula mwana wa Jonatani wakalemene, Mefiboseti akumulanganya. (2 Samuele 9:​1-​13) Cilasalala kuti Davida wakaiya zinji kukusyomeka kwa Jonatani, alimwi akukukakatila kumulongwe neliba leelyo nocikatazya kapati kucita oobo. Sena andiswe tuyoomwiiya Jonatani? Sena inga twajana balongwe bali mbuli Jonatani? Sena andiswe inga twaba balongwe bali boobo? Ikuti katubagwasya balongwe besu kuba alusyomo muli Jehova akuluyumya, ikuti katusyomeka lyoonse kuli Leza, alimwi ikuti twazumanana kusyomeka muciindi cakulikkomanisya tobeni, tuyooba mulongwe mubotu mbuli mbwaakabede Jonatani. Alimwi tuyooiya lusyomo lwakwe.