Sena Mariya Mbabanyina Leza?

AMULIZYE

Bwiinguzi bwamu Bbaibbele

Peepe, Bbaibbele taliyiisyi kuti Mariya mbabanyina Leza, alimwi kunyina nolyaamba kuti Banakristo beelede kumukomba Mariya. a Amulange-lange twaambo tutobela:

Mariya tanaakalyaamba kuti mbabanyina Leza. Bbaibbele lyaamba kuti wakazyala “Mwana wa Leza,” kutali Leza.—Marko 1:1; Luka 1:32.
Jesu Kristo tanaakaamba kuti Mariya bakali banyina Leza naa kuti weelede kupegwa bulemu bulibedelede. Mane buya, wakalulamika mukaintu umwi wakaamba kuti Mariya wakalikkomene nkaambo mbabanyina Jesu, wakamwaambila kuti: “Ibakkomene mbaabo baswiilila jwi lya Leza akucita ncolyaamba!”—Luka 11:27, 28.
Mabala aakuti “Banyina Leza” aakuti “Theotokos” (iwakazyala Leza) taako pe mu Bbaibbele.
Mabala aakuti “Namalelo Wajulu” aali mu Bbaibbele, taambi Mariya, pele aamba leza mukaintu wakubeja wakali kukombwa abana Israyeli basiluleyo. (Jeremiya 44:15-19) Kulibonya kuti “Namalelo Wakujulu” andiza wakali Ishtar (Astarte), leza mukaintu wabana Babuloni.
Banakristo bakusaanguna tiibakali kumukomba Mariya, nokuba kumupa bulemu bulibedelede. Sikulemba makani aakaindi umwi wakaamba kuti Banakristo bakusaanguna “bakali kukasya kupanga tubunga twazikombelo alimwi akuyoowa kuti kubikkila kapati maano kuli Mariya kwakali kukonzya kupa kuti batalike kukomba leza mukaintu.”—In Quest of the Jewish Mary.
Bbaibbele lyaamba kuti Leza waliko lyoonse. (Intembauzyo 90:1, 2; Isaya 40:28) Mbwaanga tajisi matalikilo, takonzyi kuba abanyina. Kunze lyaboobo, Mariya naatakacikonzya kumunyamuna Leza mwida lyakwe; Bbaibbele lilasalazya kwaamba kuti nomuba mumajulu takonzyi kukkwana.—1 Bami 8:27.

Mariya, Mbanyina Jesu, kutali “Banyina Leza”

Mariya wakali mu Juda, alimwi wakazyalilwa muzyalani lya Mwami Davida. (Luka 3:23-31) Alimwi wakali kuyandwa kapati a Leza akaambo kalusyomo lwakwe. (Luka 1:28) Leza wakamusala kuti abe banyina Jesu. (Luka 1:31, 35) Mariya wakalijisi bana bamwi mbaakazyala antoomwe amulumaakwe, Josefa.—Marko 6:3.

Nokuba kuti Bbaibbele lyaamba kuti Mariya wakazooba sikwiiya wa Jesu, talyaambi makani manji kujatikizya nguwe.—Milimo 1:14.

Nkaambo nzi bamwi ncobaamba kuti Mariya wakali banyina Leza?

Bumboni bwakusaanguna bwakuti Mariya wakali kukombwa bwakajanika kumamanino aamwaanda wamyaka wane C.E. Aciindi eeco, Cikombelo ca Katolika cakaba ncecikombelo cazisi zyoonse zyakali mu Bulelo Bwabana Roma. Aboobo, ibanji bakali mubukombi bwakubeja bakatalika kulitaminina kuti Mbanakristo. Kuyungizya waawo, basicikombelo bakatalika kusyoma njiisyo ya Butatu iitali yamumagwalo.

Njiisyo ya Butatu yakapa kuti banji bakombi batalike kuyeeya kuti mbwaanga Jesu ngu Leza, nkokuti Mariya mbabanyina Leza. Mu 431 C.E., kumuswaangano wacikombelo ku Efeso kwakaambilizyigwa kuti Mariya “Mbabanyina Leza.” Kuzwa lyamuswaangano ooyu waku Efeso, kukomba Mariya kwakaduma kapati. Kumane boonse ibakali kuzwa muzikombelo zimbi nobakatalika kukomba ku Katolika, bakacileka kukomba baleza babo bakaintu baluzyalo, mbuli Atemi (kuba Roma, Diana) alimwi a Isis, akutalika kukomba zikozyanyo zya Nakalindu Mariya.

Mu 432 C.E., Pope Sixtus III wakalailila kuti kuyakwe cikombelo ku Rome, ikutondezya bulemu kuli “Banyina Leza.” Cakayakilwa afwaafwi atempele lyakayakilidwe kutondezya bulemu kuli Lucina, leza mukaintu wabuzyazyi wabana Roma. Mulembi umwi wakaamba kuti cikombelo eeci icakayakwa bwakali bumboni busalede bwakuti cikombelo ca Katolika cakatalika kukomba Mariya muciindi cakukomba Lucina.—Mary, The Complete Resource.

a Zikombelo zinji ziyiisya kuti Mariya mbabanyina Leza. Bamwaamba kuti ngo “Namalelo Wajulu” naa Theotokos, ibbala lya Chigiriki lyaamba kuti “iwakazyala Leza.”