Bantu babelesya zintu nzyaakali kuyiisya Jesu Kristo kutalisya zikombelo zya “Bunakristo” ziindene-indene. Pele mukwiimpana, Bbaibbele litondezya kuti kuli buyo Bunakristo bomwe bwakasimpe. Amubone twaambo totatwe ncocili boobo.

1.   Jesu wakaamba kuti wakali kuyiisya “kasimpe” aboobo Banakristo bakusaanguna bakali kwiita cikombelo cabo kuti ‘nkasimpe.’ (Johane 8:​32; 2 Petro 2:2; 2 Johane 4; 3 Johane 3) Eeci citondezya kuti aabo ibasumpula njiisyo izikazyanya anzyaakayiisya Jesu tabatobeli Bunakristo bwakasimpe.

2.   Bbaibbele liyiisya kuti Banakristo ‘beelede kwaamba cintu comwe boonse.’ (1 Bakorinto 1:​10) Pele mukwiimpana, zikombelo zya Bunakristo zinji zilakazyanya kujatikizya njiisyo, noziba njiisyo zyantalisyo mbuli kuzyiba ncocaamba kuba Munakristo. Zikombelo zili boobo inga tiizyaambwa kuti zyoonse zililuzi.​—1 Petro 2:​21.

3.   Jesu wakasinsima kuti bantu banji bayakulyaamba kuti Mbanakristo pele bayakwaalilwa kutobela milawo yakwe alimwi akuti uyoobakaka bantu bali boobu. (Matayo 7:​21-​23; Luka 6:​46) Bantu bamwi bayakweenwa abasololi bazikombelo ibasofwaazya bukombi bwakasimpe kutegwa basumpule nzyobayanda. (Matayo 7:​15) Nokuba boobo, bantu bamwi bayootobela Bunakristo bwakubeja nkaambo buyoobaambila zintu nzyobayanda kumvwa muciindi cakumvwa kasimpe kamu Bbaibbele.​—2 Timoteyo 4:​3, 4.

 Mucikozyanyo cakwe icijatikizya wiiti alimwi ansaku, Jesu wakasinsima kuti kuyooba buzangi bupati (luleyo) kujatikizya Bunakristo bwakasimpe. (Matayo 13:24-​30, 36-​43) Kwaciindi cilamfwu, ciyookatazya kwaandaanya akati ka Banakristo bakasimpe alimwi abakubeja. Mbubwenya mbwaakasinsima Jesu, basiluleyo bakavwula ciindi baapostolo nobakafwa. (Milimo 20:29, 30) Nokuba kuti njiisyo zyabasiluleyo inga kaziindene-indene, misyobo yoonse ya Bunakristo bwakubeja ‘yakaleya kukasimpe.’​—2 Timoteyo 2:​18.

 Jesu alimwi wakaambila limwi kuti mukuya kwaciindi Banakristo bakubeja alimwi abakasimpe bayoolibonya. Eeci calibonya muciindi eecino ncotupona, ciindi ‘camamanino aabweende bwazintu.’​—Matayo 13:30, 39.