Kunyina muntu wakamubona kale Leza. (Kulonga 33:20; Johane 1:18; 1 Johane 4:12) Bbaibbele lyaamba kuti “Leza Muuya,” ciimo citakonzyi kubonwa amuntu.​—Johane 4:24; 1 Timoteyo 1:17.

 Pele bangelo balakonzya kumubona Leza, akaambo kakuti nzilenge zyamuuya. (Matayo 18:10) Nkakaambo kaako, bantu bamwi ibafwa bayoobusyigwa kuti bakapone kujulu kabajisi mubili wamuuya mpoonya bayookonzya kumubona Leza.—Bafilipi 3:20, 21; 1 Johane 3:2.

 Kanji-kanji Bbaibbele libelesya bbala lyakubona munzila yamaambilambali, kwiiminina kumvwisya. (Isaya 6:10; Jeremiya 5:21; Johane 9:39-41) Munzila eeyi, ‘moyo’ wamuntu ulakonzya ‘kumubona’ Leza mazuba aano kwiinda mukuba alusyomo kutegwa amuzyibe akutondezya kulumba akaambo kabube bwakwe. (Baefeso 1:18) Bbaibbele lilaamba nzila mbomukonzya kuba alusyomo luli boobo.

•   Amwiiye kujatikizya bube bwa Leza, mbuli luyando abwaabi kubikkilizya abusongo alimwi anguzu, kwiinda muzintu nzyaakalenga. (Baroma 1:20) Naakayeezyegwa milimo yakulenga ya Leza, mwaalumi uusyomeka Jobu wakalimvwa mbuli kuti wakali kumbele lya Leza, kamubwene ameso aakwe.—Jobu 42:5.

•   Amumuzyibe Leza kwiinda mukwiiya Bbaibbele. Bbaibbele litusyomezya kuti: “Ikuti wamuyandaula [Leza], uyookulekela kuti umujane.”—1 Makani 28:9; Intembauzyo 119:2; Johane 17:3.

•   Amwiiye kujatikizya Leza kwiinda mukulanga-langa buumi bwa Jesu. Akaambo kakuti Jesu cakulondoka wakatondezya bube bwa Bausyi, Jehova Leza, wakali kukonzya kwaamba kuti: “Kufwumbwa ooyo wandibona wamubona awalo Taata.”—Johane 14:9.

•   Amube abukkale bukkomanisya Leza, akubona mbwakonzya kumugwasya. Jesu wakaamba kuti: “Balikkomene aabo basalala mumoyo, nkaambo bayoomubona Leza.” Mbuli mbutwabona kale, bamwi akati kabaabo ibamukkomanisya Leza bayoobusyigwa kutegwa bakapone kujulu aboobo “bayoomubona Leza.”—Matayo 5:8; Intembauzyo 11:7.

 Zibalo izitondezya mbuli kuti Bbaibbele lyaamba kuti bantu bakamubona ameso Leza, makani amwi aazingulukide atondezya kuti Leza wakali kwiimininwa amungelo naa wakalibonya kwiinda mucilengaano.

Bangelo.

Kaindi, Leza wakatuma bangelo kuba baiminizi bakwe kutegwa balibonye kubantu akwaamba muzina lyakwe. (Intembauzyo 103:20) Mucikozyanyo, ciindi cimwi Leza wakaambaula a Musa kuzwa mucitewo icakali kuyaka mulilo, alimwi Bbaibbele lyaamba kuti “Musa wakalivwumba kumeso nkaambo wakali kuyoowa kulanga Leza mwini-mwini.” (Kulonga 3:4, 6) Musa tanaakamubona ameso Leza, nkaambo cibalo citondezya kuti wakabona “mungelo wa Jehova.”—Kulonga 3:2.

 Mbubwenya buyo, Bbaibbele nolyaamba kuti Leza “wakabandika mulomo mpande a Musa,” caamba kuti Leza wakabandika a Musa cabulongwe. (Kulonga 4:10, 11; 33:11) Mubwini Musa tanaakabona busyu bwa Leza, nkaambo mulumbe ngwaakatambula kuzwa kuli Leza “wakapegwa abangelo.” (Bagalatiya 3:19; Milimo 7:53) Nokuba boobo, lusyomo ndwaakajisi Musa muli Leza lwakali luyumu kapati cakuti Bbaibbele limupandulula kuti cakali mbuli kuti “wakalimubwene ooyo uutalibonyi.”—Bahebrayo 11:27.

 Mbubwenya mbwaakaambaula a Musa, Leza wakabandika a Abrahamu kubelesya bangelo. Nokuba boobo, kwiile kulibala caatala-tala Bbaibbele inga calibonya mbuli kuti Abrahamu wakamubona ameso Leza. (Matalikilo 18:1, 33) Pele cibalo citondezya kuti “baalumi botatwe” ibakaboola kuli Abrahamu mubwini bakali bangelo ibakatumwa a Leza. Abrahamu wakazyiba kuti bakali baiminizi ba Leza alimwi wakali kubandika ambabo mbuli kuti wakali kubandika a Jehova cacigaminina.—Matalikilo 18:2, 3, 22, 32; 19:1.

Zilengaano.

Leza alimwi wakalibonya kubantu kwiinda muzilengaano. Mucikozyanyo, ciindi Bbaibbele nolyaamba kuti Musa alimwi abana Israyeli bamwi “bakamubona Leza wa Israyeli,” caamba kuti “bakabona cilengaano ca Leza mwini-mwini.” (Kulonga 24:9-11) Mbubwenya buyo, zimwi ziindi Bbaibbele lyaamba kuti basinsimi ‘bakabona Jehova.’ (Isaya 6:1; Daniele 7:9; Amosi 9:1) Mubukkale bumwi abumwi, cibalo citondezya kuti bakabona cilengaano ca Leza muciindi cakumubona ameso.—Isaya 1:1; Daniele 7:2; Amosi 1:1.