Sena Leza Ulajanika Koonse?

AMULIZYE

Bwiinguzi bwamu Bbaibbele

Leza ulakonzya kubona zintu zyoonse alimwi akubweza ntaamu kufwumbwa kubusena nkwayanda. (Tusimpi 15:3; Bahebrayo 4:13) Nokuba boobo, Bbaibbele taliyiisyi kuti Leza ulajanika koonse, nkokuti ikujanika muzintu zyoonse. Muciindi caboobo, liyiisya kuti muntu alimwi akuti ulijisi busena mpakkala.

Mbwabede Leza: Leza muntu wamuuya. (Johane 4:24) Bantu tabakonzyi kumubona. (Johane 1:18) Zilengaano izilembedwe mu Bbaibbele zimutondezya kuti ulijisi busena buya mpakkala. Kunyina naambwa kuti ulajanika kumasena koonse.—Isaya 6:1, 2; Ciyubunuzyo 4:2, 3, 8.
Busena nkwakkala Leza: Leza ukkala mubusena bwamuuya, ibwiindene kapati abusena bukkala zilenge izilibonya. Mubusena mbweena oobu, Leza ulijisi ‘busena nkwakkala kujulu.’ (1 Bami 8:30) Bbaibbele lilaamba ciindi cimwi zilenge zyamuuya ‘nizyakaboola kuzikwiima kumbele lya Jehova,’ a ikutondezya kuti, Leza kuli abusena aagaminide mpakkala.—Jobu 1:6.

Ikuti naa Leza tajaniki koonse, sena ulakonzya kundibikkila maano mebo kundigama?

Inzya. Leza ulamubikkila maano kapati muntu umwi aumwi kumugama. Nokuba kuti ukkala kujulu, Leza ulababona aabo ibakkala anyika ibayanda kumukkomanisya ncobeni alimwi ulabagwasya. (1 Bami 8:39; 2 Makani 16:9) Amubone Jehova mbwatondezya kuti ulababikkila maano bakombi bakwe basyomeka:

Ciindi nomupaila: Jehova ulakonzya kuumvwa mupailo wanu mbomwapailila buyo.—2 Makani 18:31.
Ciindi nomutyompedwe: “Jehova ulaafwaafwi abaabo batyompedwe mumoyo; aabo bapengede mumizeezo ulabafwutula.”—Intembauzyo 34:18.
Ciindi nomuyandika busolozi: Jehova ‘uyoomupa kuba amaano akumuyiisya’ kwiinda mu Jwi lyakwe Bbaibbele.—Intembauzyo 32:8.

Twaambo tutaluzi kujatikizya nkwakkala Leza

Kaambo kataluzi: Leza ulajanika muzilenge zyoonse.

Kaambo kamasimpe: Leza takkali anyika alimwi takkali mububumbo bulibonya. (1 Bami 8:27) Masimpe kuti nyenyeezi alimwi azilenge zimwi ‘zilaambilizya bulemu bwa Leza.’ (Intembauzyo 19:1) Nokuba boobo, Leza tajaniki muzilenge zyakwe mbubwenya sikuzekaula mbwatajaniki muzintu zyakwe zyazekaula. Pele cintu icakazekaulwa cilakonzya kutwaambila zinji kujatikizya sikuzekaula ooyo iwakacipanga. Mbubwenya buyo, zintu nzyotubona zilatwaambila kujatikizya ‘bube butalibonyi,’ mbwajisi Mulengi mbuli nguzu, busongo, alimwi aluyando.—Baroma 1:20.

Kaambo kataluzi: Leza weelede kuti kajanika koonse kutegwa kakonzya kuzyiba zintu zyoonse alimwi akuba singuzuzyoonse.

Kaambo kamasimpe: Muuya uusalala wa Leza, naa nguzu zyakwe, ncitondezyo canguzu zya Leza. Kwiinda mumuuya wakwe uusalala, Leza ulakonzya kuzyiba cintu cili coonse alimwi akucita cintu cili coonse, kubusena buli boonse, aciindi cili coonse kakunyina kujanika kubusena ooko.—Intembauzyo 139:7.

Kaambo kataluzi: Lugwalo lwa Intembauzyo 139:8 luyiisya kuti Leza ulajanika koonse kwiinda mukwaamba kuti: “Ino nkuli nkondikonzya kuunka kuti nditije muuya wako, alimwi ino inga ndatijila kuli kuzwa kubusyu bwako?”

Kaambo kamasimpe: Lugwalo oolu talwaambi kujatikizya nkwakkala Leza. Pele lubelesya majwi aakweema ikuyiisya kuti kunyina busena ibuli kulamfwu kapati kwalo Leza nkwatakonzyi kutugwasya.

a Jehova ndezina lya Leza kweelana ambolyaamba Bbaibbele.