Kutegwa tuzyibe ciindi nyika eeyi noiyoomana, cilayandika kuzyiba mbolibelesyedwe mu Bbaibbele bbala lyakuti “nyika.” Ibbala yamuci Giriki lyakuti kosmos, kanji-kanji lipandulula “nyika,” alimwi zimwi ziindi inga lipandulula ciinga cabantu bali munyika, kwaambisya aabo batamuyandi Leza alimwi akuyanda kwakwe. (Johane 15:18, 19; 2 Petro 2:5) Zimwi ziindi, bbala lyakuti kosmos lipandulula bukkale bwabantu.​—1 Bakorinto 7:​31; 1 Johane 2:​15, 16. a

Ino “kumana kwanyika” ncinzi?

 Mabala aakuti “kumana kwanyika,” alo aajanika kwaziindi zili mbozibede mu Bbaibbele manji, alakonzya kupandulula “mamanino abweende bwazintu,” naa “mamanino aazyalani limwi.” (Matayo 24:3) Aaya mabala taambi kunyonyoonwa kwanyika iini naa bantu boonse pe, pele aamba mamanino aabukkale bwabantu.​—1 Johane 2:​17.

 Ibbaibbele lyaamba kuti “bantu babi bayoonyonyoonwa” kutegwa bantu bali kabotu bakakkomane abuumi bubotu anyika. (Intembauzyo 37:​9-​11) Oolu lunyonyooko luyoocitwa ‘lyamapenzi mapati,’ alo ayootobelwa ankondo ya Amagedoni.​—Matayo 24:21, 22; Ciyubunuzyo 16:14, 16.

Ino nyika iyoomana lili?

 Jesu wakaamba kuti: “Kujatikizya buzuba oobo alimwi aciindi kunyina uuzyi pe, nobaba bangelo kujulu naba Mwana, pele buyo Taata alikke.” (Matayo 24:36, 42) Wakayungizya kuti ciindi nyika noiyoomana tacizizilwe, “aciindi ncomutayeeyeli.”​—Matayo 24:44.

 Nokuba kuti tatuzyi ciindi cini naa buzuba, Jesu wakaamba “citondezyo,” naa mulongo wazintu, iziyootondezya ciindi cisololela kumamanino aanyika. (Matayo 24:​3, 7-​14) Bbaibbele lyaamba ciindi eeci kuti ‘nciindi camamanino,’ alimwi akuti ‘mazuba aamamanino.’​—Daniele 12:4; 2 Timoteyo 3:​1-5.

Sena kuli ciyoocaala akwiinda mamanino aanyika?

 Inzya. Inyika inoociliko, nkaambo Bbaibbele lyaamba kuti “kunyina noiyoogwisyigwa abusena bwanjiyo lyoonse alyoonse, mane kukabe kutamani.” (Intembauzyo 104:5) Alimwi nyika iyoozula abantu, mbubwenya Bbaibbele mbolisyomezya kuti: “Balulami bayookona nyika, alimwi bayookkala alinjiyo lyoonse mane kukabe kutamani.” (Intembauzyo 37:29) Leza uyoopilusya bukkale mbwaakakanzide kuzwa kumatalikilo:

•   Paradaiso.​—Isaya 35:1; Luka 23:43.

•   Kuliiba alimwi alusumpuko.​—Mika 4:4.

•   Kukkutila alimwi akucita milimo iikatalusya.​—Isaya 65:21-​23.

•   Kumana malwazi alimwi abucembele.​—Jobu 33:25; Isaya 33:24.