Bbaibbele kunyina mpolyaamba kujatikizya Halloween. Nokuba boobo, mboyakatalika alimwi azilengwa zijatikizyidwe mazuba aano mukusekelela Halloween zitondezya kuti kusekelela ooku kuyeeme anjiisyo zyakubeja kujatikizya bafwide amyuuya iitalibonyi naa madaimona.—Amubone aalembedwe kuti  “Matalikilo aa Halloween Azilengwa Zyanjiyo”

 Bbaibbele licenjezya kuti: “Kutajanwi akati kanu . . . sibusangu, naba sibamooba, naba muntu uubuzya makani kubafu.” (Deuteronomo 18:10-​12) Nokuba kuti bantu bamwi babona kuti Halloween nkulikondelezya kuli buyo kabotu, Bbaibbele litondezya kuti zilengwa zijatikizyidwe tazili kabotu. Mulugwalo lwa 1 Bakolinto 10:20, 21, Bbaibbele lyaamba kuti: “Mebo tandiyandi kuti nywebo kamuyanzana amadaimona pe. Tamukonzyi kunoonywida munkomeki ya Jehova amunkomeki yamadaimona.”

 Matalikilo aa Halloween Azilengwa Zyanjiyo

1.   Samhain : Bbuku limwi lyaamba kuti Halloween yakatalikila “kumapobwe aakaindi aabantu batakombi Leza aakali kusekelelwa abantu bategwa Celtic myaka iili 2,000 yainda. Bantu aaba bakali kusyoma kuti aciindi capobwe bafwide bakali kweendeenda akati kabantu baumi. Aciindi eeci cakusekelela Samhain, bantu baumi bakali kuswaya antoomwe abantu bafwide.” Pele Bbaibbele cakusalazya liyiisya kuti “bafwide tabezi cintu niciba comwe.” (Mukambausi 9:5) Aboobo tabakonzyi kubandika abantu baumi.

2.   Zyakusama, maswiiti alimwi abucenjezu ciindi ca Halloween: Kweelana abbuku limwi, bantu bategwa Celtic bamwi bakali kusama basyaamankwamu kutegwa myuuya mibi ibayeeyele kuti bali antoomwe, alimwi akuti itabanyonganyi. Bamwi bakali kwiipa maswiiti myuuya kutegwa baikkomanisye. Basololi baba Katolika ku Europe bakatalisya zilengwa zitali kabotu alimwi akwaambila basikubatobela kuti kabaunka kuŋanda aŋanda kumwi kabasamide basyaamankwamu akulombelela zipego. Kulubazu lumwi, Bbaibbele talizumizyi kuvwelanya zilengwa zyabukombi bwakubeja abukombi bwakasimpe.​—⁠2 Bakolinto 6:​17.

3.   Zyeelo, kusanduka kuba cinyama abalozi: Kuzwa kaindi, eezyi zibeleka amyuuya mibi yanyika. (Halloween Trivia) Bbaibbele lilaamba cakusalazya kuti tweelede kwiikazya myuuya mibi, kutali kusekelela anjiyo.​—⁠Baefeso 6:​12.

4.   Zitende zya Halloween: Ku Britain, “basikupaila bakali kuunka kuŋanda aŋanda kabayaabulomba zyakulya bamana kupailila bafwide,” alimwi bakali kunyamuna malampi aakali mbuli tunkuli aakajisi nkendulu zyakali kwiiminina muuya wasinkilwa mubusena bwamyuuya yabantu bafwide ibwiitwa kuti purgatory.” (Halloween​—From Pagan Ritual to Party Night) Bamwi baamba kuti malampi akali kubelesyegwa kutanda myuuya mibi. Mumyaka yakuma 1800 ku North America, zitende zyakanjila mubusena bwamalampi aakali mbuli tunkuli akaambo kakuti zyakali zinji alimwi tiizyakali kukatazya kupanga. Zintu izibapa kusekelela cilengwa eeci​—kusyoma kuti buumi tabufwi, busena bwamyuuya yabantu bafwide, alimwi amipailo iijatikizya bafwide​—taziyeeme aa Bbaibbele.​—⁠Ezekieli 18:4.