Bantu banji ibakalifwide-fwide baamba kuti aciindi eeco bakaandanizyigwa amubili wabo naa kubona mumuni uumweka naa busena bubotu kapati. Bbuku limwi lyaamba kuti, ‘Bamwi babona kuti kucitikilwa cintu cili boobu ncoolwe cakubona nyika iimbi.’ Nokuba kuti Bbaibbele talyaambi zyakuluula zili boobo zyabantu ibakalifwide-fwide, pele lilaamba kaambo kamasimpe katondezya kuti takuli kuti babona nyika iimbi.

 Bafwide kunyina ncobazyi.

Bbaibbele lyaamba kuti bafwide “tabezi cintu niciba comwe.” (Mukambausi 9:5) Ciindi notwafwa, tatuunki kunyika iimbi kuyoozumanana kupona pele tulazita. Njiisyo yakuti kuli cibeela cizumanana kupona twafwa taiko mu Bbaibbele. (Ezekiele 18:4) Aboobo, zyakuluula nzyobaamba bantu ibakalifwide-fwide tazitondezyi mbokubede kujulu, kuhelo, naa kuzumanana kupona kunyika iimbi.

 Ino Lazaro wakaamba nzi kujatikizya kuzumanana kupona kunyika iimbi?

Cibalo camu Bbaibbele icaamba zya Lazaro caamba lufwu lwakacitika ncobeni: Jesu wakamubusya Lazaro nikwakainda mazuba one kafwide. (Johane 11:​38-​44) Ikuti Lazaro naakali kupona buumi bukkomanisya kunyika iimbi, nilwakali lunya kuli Jesu kumubusya alimwi anyika. Pele mu Bbaibbele takulembedwe kuti kuli ncaakaamba Lazaro kujatikizya kupona kunyika iimbi. Cakutadooneka, Lazaro naakaamba kujatikizya kupona buumi kunyika iimbi ikuti naakajanika mubukkale buli boobo. Aboobo, Jesu wakaamba kujatikizya lufwu lwa Lazaro kuti luli mbuli koona, kutondezya kuti Lazaro naakafwide kunyina ncaakazyi.​—Johane 11:​11-​14.