Bulondo bulayandika kutegwa kauka kakacikonzya kuuluka, kutanta aazintu, akuzyiba zicitika mpokabede. Mucikozyanyo, kuti meja aakauka kaajisi tombe, inga kasweeka nkokaya, inga tiikacikonzya kukwabana atweenzinyina, naa kununkizya. Aboobo, syaazibwene mulwiiyo lwabanyama Alexander Hackmann wakaamba kuti, “tamukonzyi kujana kauka kajisi tombe. Tulicizyi kulisalazya kuti naa twaba atombe.”

Amulange-lange: Hackmann abeenzinyina bakaiya nzila njotubelesya tuuka tutegwa carpenter ant kusalazya meja aantuto. Bakajana kuti tuuka tulagusya tombe kweelana ambolili lipati kwiinda mukukoba keja akuulu kuvwungidwe mpoonya akukasakula keja. Tombe lipati lilaangila akuloka kucisakulo cijisi myaako mipati. Tombe lyansaizi lilagusyigwa acisakulo cijisi myaako yansaizi. Mpoonya tombe lisyoonto kapati alyalo lilagusyigwa acisakulo cijisi myaako misyoonto kapati.

Amweebelele kauka aaka mbokasalazya meja aankako

Hackmann abeenzinyina basyoma kuti nzila njotubelesya tuuka ootu kutegwa meja aantuto kaanyina tombe ilakonzya kubelesyegwa mumincini. Mucikozyanyo, nzila iikozyenye inga yagwasya mukubamba bulondo ciindi nokupangwa mincini iitayandiki tombe naaceya.

Ino muyeeya buti: Sena kucikonzya kulisalazya kwakauka aaka kwakabako akaambo kakusanduka naa kwakalengwa buya?