Buk Song 69:1-36
Tok i go long dairekta; singim long nek ol i kolim “Ol Plaua Lili.”* Singsing bilong Devit.
69 O God, yu mas kisim bek mi, long wanem, wara i mekim na klostu mi lusim laip bilong mi.+
2 Mi sink i go daun long graun malumalum long hap we graun i no strong inap long mi sanap long en.+
Mi go insait long wara i dip tru,Na strong bilong wara i karim mi i go.+
3 Mi singaut i go na strong bilong mi i pinis;+Nek bilong mi i drai.
Ai bilong mi i no inap lukluk gut moa taim mi wetim God bilong mi i stap.+
4 Ol man i heitim mi nating+Ol i planti tru winim namba bilong ol gras i stap long het bilong mi.
Ol man i laik pinisim mi,Em ol birua i laik mekim nogut long mi,* ol i kamap planti.
Mi no bin stilim wanpela samting, tasol ol i fosim mi na mi givim ol samting bilong mi long ol.
5 O God, yu save olsem mi gat ol pasin kranki,Na ol sin bilong mi i stap ples klia long ai bilong yu.
6 O Nambawan Bikpela, Jehova, bosman bilong bikpela lain ami,*Yu no ken larim pasin bilong mi i mekim na ol man i bilip na wet long yu ol i sem.
God bilong lain Israel,Yu no ken larim pasin bilong mi i mekim na ol man i wok long painim yu, i sem.
7 Mi bihainim yu, olsem na ol man i tok nogut long mi;+Mi sem nogut tru.+
8 Ol brata bilong mi i lukim mi olsem wanpela man ol i no save long em,Na ol brata bilong mi i lukim mi olsem wanpela man bilong narapela ples.+
9 Pasin bilong laikim tumas haus bilong yu i pulap tru long mi,+Na ol tok nogut bilong ol man i tok nogut long yu, ol dispela tok i pundaun antap long mi.+
10 Taim mi daunim mi yet na mi tambu long kaikai,*Ol i tok nogut long mi.
11 Taim mi werim klos bilong sori,Mi kamap samting em ol i tok bilas long en.
12 Ol man i sindaun long geit bilong taun ol i stori long mi,Na ol spakman i save singsing long mi.
13 O Jehova, mi bai prea long yu,Long taim stret yu makim na orait long en.+
O God, gutpela pasin laikim* bilong yu i bikpela tru,Olsem na yu mas bekim prea bilong mi na kisim bek mi.+
14 Kisim bek mi long tais;No ken larim mi i sink i go daun.
Kisim bek mi long han bilong ol man i nolaik tru long mi
Na long wara i dip tru.+
15 Yu no ken larim wara i tait i karim mi i go,+Na yu no ken larim wara i dip i daunim mi,Na yu no ken larim mi i go daun long hul* na em i karamapim mi.+
16 O Jehova, gutpela pasin laikim* bilong yu i gutpela tumas, olsem na yu mas bekim singaut bilong mi.+
Pasin marimari bilong yu i bikpela moa yet, olsem na yu mas helpim mi,+
17 Na yu no ken haitim pes bilong yu long mi wokman bilong yu.+
Mi gat bikpela hevi, olsem na yu mas hariap na bekim singaut bilong mi.+
18 Kam klostu long mi na kisim bek mi;Kisim bek* mi long han bilong ol birua bilong mi.
19 Yu save long olgeta tok nogut na sem mi kisim.+
Yu lukim olgeta birua bilong mi.
20 Tok nogut bilong ol i bagarapim stret bel bilong mi, na i no gat wanpela samting inap long stretim dispela.
Mi ting wanpela bai sori long mi, tasol i no gat wanpela,+Na mi ting sampela bai mekim gut bel bilong mi, tasol i no gat.+
21 Ol i no givim kaikai long mi, nogat, ol i givim posin* long mi,+Na nek bilong mi i drai na ol i givim mi wain i pait long dring.+
22 Larim tebol bilong ol i kamap olsem trap bilong ol,Na olgeta gutpela samting bilong ol i ken kamap olsem umben bilong holim ol.+
23 Larim ai bilong ol i kamap tudak na bai ol i no ken lukluk,Na mekim hips bilong ol i guria oltaim.
24 Kapsaitim belhat bilong yu antap long ol,Na belhat bilong yu i ken daunim ol.+
25 Ples ol i stap long en i ken i stap nating;No ken larim wanpela man i stap long haus sel bilong ol.+
26 Ol i ran bihainim man em yu bin paitim,Na ol i wok long stori stori long pen, em ol manmeri yu bin givim hevi long ol, i karim.
27 Larim hevi bilong sin bilong ol i kamap long ol,Na no ken lukim ol olsem ol i stretpela man.
28 Rausim nem bilong ol long buk bilong laip,+Na no ken raitim nem bilong ol i stap wantaim nem bilong ol stretpela man.+
29 Mi karim bikpela hevi na mi pilim pen.+
O God, yu mas kisim bek mi na lukautim mi.
30 Bai mi singim ol song bilong preisim nem bilong God,Bai mi tok tenkyu long em na givim biknem long em.
31 Dispela pasin bai mekim Jehova i amamas moa winim sakrifais bilong bulmakau man,Na winim tu sakrifais bilong yangpela bulmakau man.+
32 Na ol manmeri i gat pasin daun, ol bai lukim gutpela pasin bilong God na ol bai amamas.
Yupela ol man i lotu long God, yupela i ken kisim strong gen.
33 Jehova i save harim singaut bilong ol rabisman,+Na em bai tingim ol manmeri bilong em, em ol i stap kalabus.+
34 Heven na graun i ken preisim em,+Solwara na olgeta samting i stap insait long en tu i ken preisim em.
35 Long wanem, God bai kisim bek Saion+Na em bai wokim gen ol taun bilong Juda,Na ol manmeri bilong em bai sindaun long ol dispela hap na ol bai kisim dispela hap* olgeta.
36 Ol lain tumbuna pikinini bilong ol wokman bilong em bai kisim dispela graun,+Na ol man i laikim nem bilong em,+ bai sindaun long en.
Ol Futnot
^ Ating dispela i makim wanpela instramen i gat ol string, o wanpela stail bilong musik o tiun bilong singsing, tasol ol i no save long mining tru bilong dispela hap tok.
^ O, “ol man i birua nating long mi.”
^ Dispela i makim ol ami long heven.
^ O ating, “Taim mi krai na tambu long kaikai.”
^ O, “hulwara.”
^ Hib., “Baim bek.”
^ O, “wanpela plaua samting i gat posin.”
^ Dispela i makim graun.
