Buk Song 79:1-13

  • Wanpela beten taim ol kantri i banisim ol manmeri bilong God

    • ‘Ol lain i tok nogut long mipela’ (4)

    • ‘Tingim biknem bilong yu na helpim mipela’ (9)

    • ‘Yu mas bekim bek 7-pela taim pasin bilong lain i stap klostu long mipela’ (12)

Asap+ i raitim dispela song. 79  God, ol arapela kantri i kam insait long graun bilong yu;+Ol i mekim tempel holi bilong yu i kamap doti;+Ol i bagarapim Jerusalem nogut tru.+  2  Ol i givim bodi bilong ol wokman bilong yu i dai pinis long ol pisinNa bodi bilong ol man i stap gut long yu long ol wel animal.+  3  Ol i kilim ol i dai na blut bilong ol i kapsait na i ran olsem wara insait long Jerusalem,Na i no gat wanpela man i stap bilong planim bodi bilong ol.+  4  Ol lain i stap klostu long mipela ol i tok nogut long mipela;+Ol lain i stap klostu long mipela, ol i tok bilas na lap long mipela.  5  Jehova, hamas taim yet bai yu belhat long mipela? Ating yu bai belhat long mipela inap oltaim oltaim, a?+ Na belhat bilong yu bai i stap olsem paia i lait na i no inap i dai, a?+  6  Mobeta yu kapsaitim belhat bilong yu long ol lain manmeri i no laik luksave long yuNa long ol kantri i no save singaut long nem bilong yu.+  7  Ol dispela lain i bin kilim i dai ol lain tumbuna pikinini bilong JekopNa ol i bin bagarapim graun bilong ol.+  8  Yu no ken mekim save long mipela long pasin nogut bilong ol tumbuna bilong mipela.+ Yu mas marimari long mipela kwiktaim,+Long wanem, mipela i pilim nogut tru.  9  God, yu man bilong kisim bek mipela, yu mas helpim mipela,+Yu mas tingim nem bilong yu na mekim olsem;Yu mas tingim nem bilong yu na kisim bek mipela na lusim tingting long* ol sin bilong mipela.+ 10  Bilong wanem ol arapela lain i tok olsem: “God bilong ol i stap we?”+ Long ai bilong mipela, mipela i laik bai yu kamapim klia long ol arapela lain olsemBai yu bekim bek blut bilong ol wokman bilong yu i bin kapsait.+ 11  Yu mas harim krai bilong ol man i stap kalabus.+ Na yu mas mekim wok long bikpela strong* bilong yu bilong kisim bek* ol man em ol i tok long ol i mas i dai.+ 12  Jehova, ol i bin tok bilas long yu,+Olsem na yu mas bekim bek inap 7-pela taim pasin bilong ol lain i stap klostu long mipela.+ 13  Sapos yu mekim olsem, orait mipela ol manmeri bilong yu, mipela i olsem sipsip yu save lukautim,+Mipela bai tok tenkyu long yu oltaim oltaim;Na mipela bai tokaut long biknem bilong yu na ol lain tumbuna pikinini tu i kamap bihain bai mekim olsem.+

Ol Futnot

^ Hib., “karamapim.”
^ Hib., “han.”
^ O ating, “larim i go fri.”
NUPELA TAIM TRENSLESEN BILONG OL SKRIPSA HOLI
Buk Song 79
Tok Pisin
Ritim Baibel Long Intenet
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt p. 40