Kisim Bek 7:1-25
7 Na Jehova i tokim Moses olsem: “Harim, mi mekim yu i stap olsem God* long ai bilong Fero. Na brata bilong yu Aron bai stap olsem profet bilong yu.+
2 Yu mas tokim Aron long olgeta samting mi tokim yu na em bai tokim Fero. Na Fero bai larim ol Israel i go lusim kantri bilong em.
3 Tasol mi bai larim het bilong Fero i kamap strong.+ Na mi bai wokim planti bikpela wok na planti mirakel long kantri Isip.+
4 Tasol Fero bai i no inap harim tok bilong yutupela. Na long han bilong mi, bai mi bagarapim ol Isip na bringim bikpela lain bilong mi,* ol manmeri bilong mi, em ol Israel, i go lusim Isip. Na bai mi mekim save long ol Isip.+
5 Na ol Isip bai save olsem mi Jehova+ taim mi mekim wok long han bilong mi long mekim save long ol. Na bai mi bringim lain Israel i go lusim Isip.”
6 Moses na Aron i mekim olsem Jehova i tokim ol. Tupela i bihainim olgeta tok bilong em.
7 Moses i gat 80 krismas na Aron i gat 83 krismas taim tupela i toktok long Fero.+
8 Jehova i tokim Moses na Aron olsem:
9 “Sapos Fero i tokim yutupela olsem, ‘Yutupela wokim wanpela mirakel.’ Orait yu mas tokim Aron olsem, ‘Tromoi stik wokabaut bilong yu i go daun long graun long ai bilong Fero.’ Na stik bai tanim i kamap wanpela bikpela snek.”+
10 Orait Moses na Aron i go lukim Fero na mekim olsem Jehova i bin tokim tupela. Aron i tromoi stik wokabaut bilong em i go daun long graun long ai bilong Fero na ol wokman bilong em, na stik i tanim i kamap bikpela snek.
11 Tasol Fero i singautim ol saveman na ol posinman, na ol pris bilong Isip+ em ol i save wokim ol kain kain mejik. Na ol i mekim wankain samting long mejik bilong ol.+
12 Na olgeta wan wan bilong ol i tromoi stik wokabaut bilong ol i go daun na ol stik i tanim i kamap ol bikpela snek. Tasol snek* bilong Aron i kaikai na daunim ol snek bilong ol.
13 Tasol het bilong Fero i strong,+ na em i no harim tok bilong tupela, olsem Jehova i bin tok.
14 Na Jehova i tokim Moses olsem: “Het bilong Fero i strong+ na em i no laik larim ol manmeri i go.
15 Yu mas go long Fero long moningtaim. Lukim! Em bai go long wara! Na yu mas go sanap arere long Wara Nail bilong bungim em. Na yu mas kisim tu dispela stik wokabaut i go wantaim yu, em dispela stik i bin tanim i kamap snek.+
16 Na yu mas tokim Fero olsem, ‘Jehova, em God bilong ol Hibru, em i salim mi i kam long yu+ na em i tok: “Larim ol manmeri bilong mi i go na bai ol i ken lotuim* mi long ples nating.” Tasol i kam inap long nau, yu no bin harim tok.
17 Na nau Jehova i tok olsem: “Yu bai lukim ol samting mi bai mekim na yu bai save olsem mi Jehova.+ Mi bai paitim Wara Nail long dispela stik wokabaut na wara bai tanim i kamap blut.
18 Na ol pis i stap long Wara Nail bai i dai na Wara Nail bai smel nogut tru. Na ol manmeri bilong Isip bai i no inap dringim dispela wara.”’”
19 Na Jehova i tokim Moses: “Yu mas tokim Aron olsem, ‘Kisim stik wokabaut bilong yu na makim ol wara bilong Isip,+ ol bikpela wara, ol baret wara,* wara bilong ples tais,+ na ol raunwara. Na olgeta dispela wara bai tanim i kamap blut.’ Na olgeta wara long Isip na olgeta wara i stap long ol dis ol i wokim long plang na dis ol i wokim long ston, ol dispela wara bai tanim i kamap blut.”
20 Orait Moses na Aron i mekim ol samting olsem Jehova i tokim tupela long mekim. Na long ai bilong Fero na ol wokman bilong em, Aron i apim stik wokabaut na paitim Wara Nail. Na wara i tanim i kamap blut.+
21 Na ol pis i stap long Wara Nail i dai+ na wara i smel nogut tru. Na ol Isip i no inap dringim dispela wara.+ Na olgeta wara long Isip i pulap long blut.
22 Tasol ol pris bilong Isip em ol i save wokim ol kain kain mejik, ol tu i mekim wankain samting long mejik bilong ol.+ Olsem na het bilong Fero i strong yet na em i no harim tok bilong tupela olsem Jehova i bin tok.+
23 Na Fero i go bek long haus bilong em. Na em i no wari long ol dispela samting i kamap.
24 Na ol manmeri bilong Isip i no inap dringim wara bilong Wara Nail, olsem na ol i digim graun arere long Wara Nail bilong kisim wara long dring.
25 Jehova i tanim Wara Nail i kamap blut na em i stap olsem inap 7-pela de.
Ol Futnot
^ Hib., “mekim yu God.”
^ Hib., “lain ami bilong mi.”
^ Hib., “stik.”
^ Hib., “mekim wok bilong.”
^ Em ol baret wara long Wara Nail.
