ATENDEN Ol atendan i stap bilong helpim yu. Plis bihainim gut tok bilong ol taim ol i tok long putim kar we, wokabaut we, makim sia na ol arapela samting.

BAPTAIS Ol manmeri i laik kisim baptais ol i mas sindaun long ol sia ol i makim bilong ol long fran bilong pletfom. Ol lain bilong kisim baptais i mas sindaun long hap mipela i makim bilong ol long Sarere moning paslain long tok bilong baptais i kirap. Ol i mas kisim i kam taul bilong ol na klos bilong waswas i stret long pasim.

DONESEN Yumi lusim bikpela mani tru bilong redim ol hap bilong sindaun, saun sistem, ol samting bilong vidio, na planti narapela samting bilong mekim kibung i kamap gutpela na bilong helpim yumi long i go klostu moa long Jehova. Ol donesen bilong yupela i helpim yumi long baim ol dispela samting, na i helpim tu wok bilong autim tok long olgeta hap. Mipela i makim gut ol bokis kontribiusen na sanapim long ples klia long ol hap bilong kibung. Yu ken givim kontribiusen tu long rot bilong go long donate.dan124.com. Mipela i amamas tru long olgeta donesen yupela i givim. Gavening Bodi i laik tok tenkyu long yupela long helpim wok bilong Kingdom.

FES EID Plis tingim, dispela dipatmen i bilong imejensi tasol.

SAMTING I LUS Sapos yu painim wanpela samting i lus na i no bilong yu, orait kisim i go long Dipatmen Bilong Ol Samting i Lus. Sapos wanpela samting bilong yu i lus, go long dispela dipatmen na sekim. Sapos sampela pikinini i lusim papamama na ol i no inap painim papamama, bringim ol i go long dispela dipatmen. Tasol plis lukautim gut ol pikinini bilong yu, na bai dispela i no givim hatwok long ol narapela.

PLES SINDAUN Plis tingim gut ol narapela man. Tingim, yu ken kisim tasol sia bilong ol wanfamili bilong yu, ol man i kam wantaim yu long kar, ol lain i stap wantaim yu long seim haus, o ol man yu save stadi wantaim ol long Baibel. Plis no ken putim nating ol samting bilong yu long ol narapela sia.

WOK VOLANTIA Sapos yu laik helpim wok bilong stretim ples kibung, orait yu ken go long Dipatmen Bilong Infomesen na Volantia.

Skul Bilong Ol Kingdom Evanselis Ol painia em krismas bilong ol i namel long 23 na 65 em ol i laik mekim bikpela wok moa bilong autim tok, ol i ken kam long dispela miting bilong Skul Bilong Ol Kingdom Evanselis long Sande apinun. Toksave bai kamap long taim na ples bilong mekim dispela miting.