Sapta 26

Em i Go Bek Long Kaperneam

STORI bilong ol wok Jisas i mekim i go kamap long planti hap, na planti man i go painim em long hap em i stap long en. Em i stap sampela de na em i go bek long Kaperneam, klostu long raunwara Galili. I no longtaim na ol manmeri i harim olsem em i stap long haus na planti ol i kam bung. Sampela Farisi na tisa bilong lo tu i kam. Sampela ol i kam longwe. Ol i lusim Jerusalem na i kam.

Ol manmeri i pulap long haus na ples i pas na i no gat rot bilong i go insait. Nau wanpela bikpela samting tru i kamap. Em i bikpela samting, long wanem em i helpim yumi long save Jisas i gat strong bilong tekewe as bilong sik na pen na oraitim skin bilong olgeta man em i laik helpim ol.

Jisas i wok long autim tok long ol man na nau 4-pela man i karim wanpela sikman i kam, bun bilong em i dai olgeta. Ol i laik bai Jisas i oraitim bek skin bilong poroman bilong ol, tasol ol man i pas pas insait long haus na ol i no inap bringim em i go klostu long Jisas. Sori tru! Tasol ol i painim narapela rot​—ol i tekewe hap rup bilong dispela haus Jisas i stap long en, na ol i kisim bet i gat sikman i slip long en na slekim bet i go daun.

Olsem wanem? Jisas i kros? Nogat tru! Em i lukim bilip bilong ol na em i tokim sikman, “Mi lusim pinis ol sin bilong yu.” Tasol yu ting Jisas inap tekewe sin? Ol saveman bilong lo na ol Farisi i ting em i no inap mekim. Long bel bilong ol ol i tingting olsem: “I no gat wanpela man em inap long lusim sin. Em i wok bilong God wanpela tasol.”

Jisas i save long tingting bilong ol, na em i tokim ol: “Wanem tok em i isi long mi mekim long dispela man? Em i isi long mi tok, ‘Mi lusim ol sin bilong yu,’ o em i isi long mi tok, ‘Yu kirap na kisim bet bilong yu na wokabaut’?”

Nau Jisas i wokim wanpela mirakel bambai dispela bikpela lain ol i ken save em i gat namba long lusim sin bilong man, na tru tumas, em i nambawan man tru i bin i stap long graun, winim olgeta narapela man. Orait, Jisas i tanim na tokim dispela sikman: “Yu kirap na kisim bet bilong yu, na yu go long haus bilong yu.” Olsem na wantu dispela man i kirap, na long ai bilong olgeta manmeri em i kisim bet bilong em na wokabaut i go. Olgeta man i kirap nogut tru na ol i tok: “Bipo mipela i no lukim kain samting olsem. Nogat tru.”

Taim Jisas i tok long oraitim sik, em i tok long tekewe sin. Olsem na yumi save, sin i mas tekewe bambai skin bilong man i ken orait bek. Baibel i stori olsem: Namba wan tumbuna papa bilong yumi, em Adam, em i bin mekim sin na long dispela rot olgeta samting nogut sin i kamapim, olsem sik na i dai, dispela i kisim yumi. Tasol taim Kingdom bilong God i bosim graun, bai Jisas i tekewe sin bilong olgeta manmeri i givim bel long God na mekim wok bilong Em, na bai olgeta sik i pinis. Em gutpela tru, a? Mak 2:​1-12; Luk 5:​17-26; Matyu 9:​1-8; Rom 5:​12, 17-19.

▪ Jisas i stap we na bihain em i wokim wanpela mirakel?

▪ Dispela sikman, bun bilong em i dai olgeta, olsem wanem em i kamap long Jisas?

▪ Olsem wanem na yumi olgeta i gat sin? Tasol Jisas i mekim wanem na yumi ken bilip olsem sin bilong yumi inap tekewe na bai skin bilong yumi i kamap gutpela olgeta?