Yu ting em isi long bihainim tok bilong papamama long olgeta taim?— Sampela taim i hatwok long mekim olsem. Yu ting Jisas i save bihainim tok bilong Jehova na papamama bilong en?— Gutpela eksampel bilong em i ken helpim yu long bihainim tok bilong papamama maski i hatwok. Yumi ken kisim sampela save moa long dispela.

Paslain long Jisas i kam long graun, em i stap wantaim Papa bilong em, Jehova long heven. Tasol Jisas i gat papamama long graun tu. Nem bilong tupela em Josep na Maria. Yu save hau ol i kamap papamama bilong en?—

Jehova i kisim laip bilong Jisas na putim insait long bel bilong Maria na bai Jisas i ken bon na stap long graun. Em wanpela mirakel! Jisas i go bikpela insait long bel bilong Maria wankain olsem ol narapela bebi. Na bihain long 9-pela mun, Jisas i bon. Em hau Maria na Josep i kamap papamama bilong Jisas.

Taim Jisas i gat 12 krismas, em i soim olsem em i laikim tru Papa bilong em, Jehova. Jisas i kamapim dispela taim em na famili bilong en i wokabaut inap longwe tru bilong i go long Jerusalem bilong mekim Pasova. Taim ol i wokabaut i go bek long ples, Josep na Maria i luksave olsem Jisas i no stap wantaim ol. Yu save em i stap we?—

Josep na Maria i go bek hariap long Jerusalem na ol i wok long painim Jisas. Ol i wari bikos ol i no inap painim em. Tasol bihain long 3-pela de, ol i painim em long tempel! Yu save wai Jisas i stap long tempel?— Bikos long dispela hap em bai kisim save long Papa bilong em, Jehova. Em i laikim tru Jehova na em i laik save long hau em i ken amamasim em. Maski Jisas i bikpela man pinis, oltaim em i bihainim tok bilong Jehova. Na sampela taim em i mas karim hevi. Yu ting Jisas i bihainim tok bilong Josep na Maria tu?— Yes, Baibel i tok em i mekim olsem.

Yu kisim wanem skul long stori bilong Jisas?— Yu mas bihainim tok bilong papamama, maski i hatwok long mekim olsem. Bai yu bihainim tok bilong ol?—