1-3. (a) Bilong wanem mama i stretim ol samting na bai pikinini i klin na ol klos bilong em i stret? (b) Bilong wanem Jehova i laik bai ol wokboi bilong em i stap klin? Wanem samting i kirapim laik bilong yumi long i stap klin?

 MAMA i redim liklik pikinini man bilong em bilong i go long sampela hap. Em i stretim ol samting na bai pikinini i waswas na klos bilong em i klin na i stret. Em i save olsem pasin bilong i stap klin i bikpela samting long helt bilong pikinini. Na tu, em i save olsem lukluk bilong pikinini inap litimapim o bagarapim nem bilong papamama.

² Jehova, em Papa bilong yumi long heven, em i laik bai ol wokboi bilong em i stap klin. Baibel i tok: “Sapos wanpela  man i bihainim klinpela pasin, orait yu save soim em klinpela pasin bilong yu.” a (Song 18:26) Jehova i laikim yumi tru; em i save olsem pasin bilong i stap klin bai helpim tru yumi. Yumi stap olsem ol Witnes bilong em, olsem na em i laik bai lukluk na pasin bilong yumi i litimapim nem bilong em. Tru tumas, klinpela skin na gutpela pasin bilong yumi bai givim glori long Jehova na nem holi bilong em, na i no daunim em.​—Esekiel 36:22; 1 Pita 2:12.

³ Taim yumi save olsem God i laikim ol klinpela manmeri, dispela i save kirapim yumi long i stap klin. Yumi laikim em, olsem na yumi laik bai wokabaut bilong yumi i litimapim nem bilong em. Na tu, yumi laik i stap insait yet long pasin laikim bilong em. Orait nau yumi ken skelim ol dispela samting: I gat wanem as na yumi mas i stap klin, wanem mining bilong dispela tok, na yumi ken mekim wanem bilong i stap klin. Taim yumi skelim ol dispela samting, dispela bai helpim yumi long luksave long ol samting yumi mas stretim.

4, 5. (a) Wanem samting i nambawan as na yumi mas i stap klin? (b) Olsem wanem pasin bilong Jehova long i stap klin i kamap ples klia long ol samting em i bin wokim?

⁴ Wanpela rot bilong Jehova long stiaim yumi em long pasin bilong em yet. Tok bilong Em i kirapim yumi long “bihainim ol pasin [God] yet i save mekim.” (Efesus 5:1) Nambawan as na yumi mas i stap klin em olsem: Jehova, dispela God yumi lotuim, em i klin na holi olgeta long olgeta samting.​—Wok Pris 11:​44, 45.

⁵ Pasin bilong Jehova long i stap klin, olsem planti arapela pasin bilong em, i kamap ples klia long ol samting em  i bin wokim. (Rom 1:20) Em i wokim graun bilong i stap klinpela ples we ol manmeri i ken sindaun gut long en. Jehova i bin putim ol samting long graun bilong klinim win na wara. Graun i narakain tru, em inap klinim em yet. Em nau, pasin bilong i stap klin em i bikpela samting long Man i bin “wokim graun na skai.” (Jeremaia 10:12) Em i mas i stap bikpela samting long yumi tu.

6, 7. Olsem wanem Lo Bilong Moses i kamapim klia olsem ol man i lotuim Jehova, ol i mas i stap klin?

⁶ Narapela as na yumi mas i stap klin em olsem: Jehova, King bilong yumi, em i laik bai ol man i lotuim em ol i mas i stap klin. Aninit long Lo em Jehova i bin givim long lain Israel, pasin bilong i stap klin na wok lotu i poroman wantaim. Lo i tok, long Bikpela De Bilong God i Tekewe Sin Bilong Ol Manmeri, hetpris i mas waswas inap tupela taim. (Wok Pris 16:​4, 23, 24) Taim ol pris i mekim wok, ol i mas wasim han na lek bilong ol paslain long ol i givim ofa long Jehova. (Kisim Bek 30:​17-21; 2 Stori 4:6) Lo i kolim 70 narapela narapela samting i mekim na man i no stap klin. Taim wanpela man Israel i stap doti, em i no inap mekim wok lotu​—sampela taim lo i tok man inap i dai sapos em i mekim wok lotu taim em i stap doti. (Wok Pris 15:31) Sapos wanpela i no laik bihainim pasin bilong mekim em yet i kamap klin olsem lo i tok, na waswas na wasim klos bilong em, em “i no inap i stap moa insait long lain manmeri bilong [God].”​—Namba 19:​17-20.

⁷ Maski yumi no stap aninit long Lo Bilong Moses, dispela lo i helpim yumi long save long tingting bilong God long ol samting. Lo i kamapim klia olsem ol man i lotuim God, ol i mas i stap klin. Jehova i no senisim tingting bilong em. (Malakai 3:6) Wok lotu yumi mekim i mas “klin na i no gat doti” na bai God i ken orait long en. (Jems 1:​27, NW ) Olsem na yumi mas save long God i laik bai yumi mekim wanem long dispela samting.

8. Jehova i laik bai yumi stap klin long wanem ol samting?

⁸ Long Baibel, pasin bilong i stap klin i no makim tasol pasin bilong i stap klin long skin. Nogat. Olgeta samting long laip bilong yumi i insait long pasin bilong i stap klin long ai bilong God. Jehova i laik bai yumi stap klin long 4-pela bikpela samting​—long lotu, pasin bilong yumi, tingting bilong yumi, na skin bilong yumi. Orait nau yumi ken skelim dispela 4-pela samting.

9, 10. Stap klin long lotu i makim wanem samting? Ol Kristen tru i sakim wanem samting?

⁹ Stap klin long lotu. Yumi ken tok, bilong i stap klin long lotu i makim olsem yumi no bungim lotu i tru wantaim lotu giaman. Taim lain Israel i lusim Babilon na i go bek long Jerusalem, ol i mas bihainim dispela tok: “Lusim Babilon na i kam. Na lukaut gut, nogut yupela i pas long ol samting i no klin . . . Yupela olgeta i mas i stap klin na i kam.” (Aisaia 52:11) Lain Israel i go bek long ples bambai ol i ken kamapim bek lotu bilong Jehova. Dispela lotu i mas i stap klin​—ol tok i bagarapim nem bilong God, na ol pasin na kastam bilong lotu Babilon i no ken i stap long en.

¹⁰ Long nau, yumi ol Kristen tru i mas was gut, nogut lotu giaman i mekim yumi kamap doti. (1 Korin 10:21) Em i bikpela samting long mekim olsem, long wanem, ol samting bilong lotu giaman i stap long olgeta hap. Long planti kantri, kain kain pasin tumbuna na ol narapela pasin i insait long ol bilip giaman bilong lotu, kain olsem bilip long yumi gat wanpela spirit i no save dai. (Saveman 9:​4-6, 10) Ol Kristen tru i sakim ol pasin em bilip giaman bilong ol lotu i insait long en. b Bai yumi no larim ol narapela i subim yumi long brukim ol lo bilong Baibel long klinpela pasin bilong lotu.​—Aposel 5:29.

11. Bilong i stap klin long pasin bilong yumi, yumi mas mekim wanem? Bilong wanem em i bikpela samting long i stap klin long pasin bilong yumi?

 ¹¹ Stap klin long pasin. Bilong i stap klin long pasin bilong yumi, dispela i makim olsem yumi mas sakim olgeta kain pasin pamuk. (Efesus 5:5) Em i bikpela samting long yumi stap klin long pasin bilong yumi. Olsem yumi bai lukim long sapta i kamap bihain long dispela, bilong i stap insait yet long pasin laikim bilong God, yumi mas “ranawe long pasin pamuk.” Ol man i mekim pasin pamuk na i no tanim bel, ol “bai i no inap go insait long kingdom bilong God.” (1 Korin 6:​9, 10, 18, NW ) Long ai bilong God, ol kain man olsem em ol man “i mekim ol kain kain pasin nogut tru.” Sapos ol i no stap klin long pasin bilong ol, “ol bai i go long . . . namba 2 dai.”​—KTH 21:8.

12, 13. Olsem wanem tingting bilong yumi na pasin bilong yumi i poroman wantaim? Olsem wanem yumi inap stap klin long tingting?

¹² Stap klin long tingting. Ol tingting i save kirapim yumi long mekim ol samting. Sapos yumi larim ol tingting nogut i stap long tingting na bel bilong yumi, bihain bai yumi mekim ol pasin i no klin. (Matyu 5:28; 15:​18-20) Tasol sapos yumi tingim ol samting i klin, dispela inap kirapim yumi long bihainim pasin i klin. (Filipai 4:8) Olsem wanem yumi ken i stap klin long tingting? Wanpela rot em olsem: Yumi mas sakim olgeta kain amamas em ol inap mekim tingting bilong yumi i kamap doti. c Na tu, yumi ken tingim ol klinpela samting long rot bilong stadi oltaim long Tok Bilong God.​—Song 19:​8, 9.

¹³ Bilong i stap insait yet long pasin laikim bilong God, em i bikpela samting long yumi stap klin long lotu, long pasin, na long tingting. Sampela narapela sapta bilong dispela buk bai skelim gut moa ol dispela samting. Orait nau yumi ken skelim namba 4 samting​—stap klin long skin.

14. Bilong wanem yumi no ken ting pasin bilong i stap klin em samting bilong yumi yet?

¹⁴ Bilong i stap klin long skin, bodi na haus samting bilong yumi i mas i stap klin. Yu ting dispela em i samting bilong yumi yet na ol narapela i no ken mekim sampela tok long en? Ol man i lotuim Jehova ol i no ken ting olsem. Olsem yumi tok pinis, pasin bilong yumi long i stap klin long skin i bikpela samting long Jehova, long wanem, dispela i mekim sampela samting long nem bilong em, na tu, pasin bilong i stap klin i helpim yumi. Tingim tok piksa i stap long kirap bilong dispela sapta. Sapos yu lukim wanpela pikinini i doti long olgeta taim o i no bilas gut, dispela bai kirapim yu long tingting long em i gat wanem kain papamama. Yumi no laik bai lukluk bilong yumi o wokabaut  bilong yumi i bagarapim nem bilong Papa bilong yumi long heven o daunim tok yumi autim. Baibel i tok: “Mipela i no laik bai ol man i tok nogut long dispela wok bilong mipela, olsem na mipela i no save mekim wanpela samting i save sutim lek bilong ol dispela man na ol i pundaun. Nogat. Mipela i stap wokman bilong God, olsem na oltaim mipela i save soim gutpela pasin bilong mipela long olgeta manmeri.” (2 Korin 6:​3, 4) Orait olsem wanem yumi inap i stap klin long skin?

15, 16. Pasin bilong lukautim gut skin i makim wanem samting? Ol klos bilong yumi i mas wanem kain?

¹⁵ Klinpela skin na lukluk bilong yumi. Maski pasin bilong ol man na sindaun bilong ol i no wankain long olgeta kantri, yumi inap painim sop na wara bilong waswas long olgeta de na mekim ol samting bambai yumi yet na ol pikinini bilong yumi i stap klin. Pasin bilong lukautim gut skin i makim olsem yumi mas wasim han long wara wantaim sop paslain long yumi kaikai o holim kaikai, bihain long yumi go long toilet, na bihain long yumi wasim bebi na senisim nepi bilong em. Pasin bilong wasim han long wara wantaim sop inap helpim ol man long abrusim sik na helpim ol long i stap laip tu. Dispela pasin inap stopim ol vairas na binatang jem long kalap long ol narapela man, na helpim ol long abrusim ol kain sik olsem pekpek wara. Long ol kantri we planti haus i no gat ol toilet paip samting, ol man inap wokim hul long graun na putim ol pipia long en, olsem ol i bin mekim long Israel bilong bipo.​—Lo 23:​12, 13.

¹⁶ Oltaim yumi mas wasim tu ol klos bilong yumi na bai klos i klin na i luk nais. I no olsem ol klos bilong Kristen i mas bihainim ol nupela stail o i gat bikpela pe bilong en, nogat, ol i mas klin na i stret. (1 Timoti 2:​9, 10) Maski yumi stap we we, yumi laik bai lukluk bilong yumi i “givim biknem long dispela tok yumi save autim, em tok tru bilong God, em Man bilong kisim bek yumi.”​—Taitus 2:10.

17. Bilong wanem haus na ol samting bilong yumi i mas i stap klin na i stap stret?

 ¹⁷ Haus na ol samting bilong yumi. Ating haus bilong yumi i no stail tumas, tasol sapos inap, haus i mas i stap klin na ol samting i mas i stap stret. Na olsem tasol, sapos yumi save yusim ka bilong i go long ol miting na wok autim tok, yumi mas klinim insait na ausait bilong ka, na tu, beg bilong autim tok i mas i stap klin. Yumi no ken lusim tingting olsem taim haus na ol samting bilong yumi i stap klin, dispela bai tokaut long God yumi lotuim. Yumi save tokim ol man olsem Jehova em i klinpela God, na em bai “bagarapim ol man i bin bagarapim graun,” na klostu nau Kingdom bilong em bai mekim dispela graun i kamap wanpela paradais. (KTH 11:18; Luk 23:​43, NW ) Yumi laik bai haus na ol samting bilong yumi i soim ol narapela olsem yumi wok long kisim ol klinpela pasin i stret long sindaun bilong nupela taim.

18. Olsem wanem yumi ken soim rispek long Haus Kingdom bilong yumi?

¹⁸ Ples bilong yumi long mekim lotu. Pasin bilong yumi long laikim tru Jehova i kirapim yumi long soim rispek long Haus Kingdom bilong yumi, em ples bilong mekim lotu i tru long hap bilong yumi. Taim ol nupela man i kam long Haus Kingdom, yumi laik bai ol i kisim gutpela tingting long ples bung bilong yumi. Em i bikpela samting long yumi mas klinim oltaim na stretim ol samting i bruk na bai Haus Kingdom i luk nais inap longpela taim. Yumi soim rispek long Haus Kingdom bilong yumi long rot bilong mekim ol samting yumi inap mekim bilong klinim na lukautim gut dispela haus. Em i wanpela gutpela samting tru long givim taim bilong yumi long helpim wok bilong klinim na “stretim” haus lotu bilong yumi. (2 Stori 34:10) Yumi mas bihainim wankain pasin taim yumi bung long Haus Kibung o long narapela haus bilong mekim kibung.

19. Bilong i stap klin long skin, yumi mas sakim wanem samting? Olsem wanem Baibel i helpim yumi long mekim olsem?

¹⁹ Bilong i stap klin long skin, yumi mas sakim ol pasin i mekim yumi i kamap doti, olsem smok, dring planti tumas alkohol, na kisim kain kain drak. Baibel i no kolim stret nem bilong olgeta pasin doti ol man i save bihainim long nau, tasol Baibel i gat ol stiatok i helpim yumi long save long tingting bilong Jehova long ol dispela samting. Yumi save long tingting bilong Jehova long ol samting, olsem na pasin bilong yumi long laikim em i kirapim yumi long bihainim ol pasin em i laikim. Orait nau yumi ken skelim 5-pela stiatok bilong Baibel.

20, 21. Jehova i laik bai yumi no insait long wanem ol pasin? I gat wanem gutpela as na yumi mas bihainim dispela laik bilong God?

²⁰ “Yumi kisim pinis ol dispela promis bilong God. Olsem na yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God. Na yumi mas pret na aninit long God na yumi mas givim yumi yet olgeta long God na bihainim tru pasin holi oltaim.” (2 Korin 7:1) Jehova i laik bai yumi no insait long ol pasin i mekim bodi i kamap doti na i bagarapim spirit bilong yumi, olsem tingting bilong yumi. Olsem na yumi mas sakim ol pasin yumi inap kalabus long en na i save bagarapim skin na tingting.

²¹ Baibel i kamapim gutpela as tru na yumi mas “rausim olgeta pasin doti.” Long kirap bilong 2 Korin 7:​1, i gat dispela tok: “Yumi kisim pinis ol dispela promis bilong God.” Wanem ol promis? Olsem ol ves paslain long dispela i kamapim, Jehova i tok promis olsem: “Bai mi yet mi kisim yupela na bai mi stap Papa bilong yupela.” (2 Korin 6:​17, 18) Tingim: Jehova i promis long lukautim yu na laikim yu olsem papa i save laikim pikinini man o pikinini meri bilong em. Tasol Jehova bai truim ol dispela tok promis sapos  yu sakim olgeta kain pasin doti bilong ‘bodi na spirit.’ Em bai longlong pasin tru long larim wanpela pasin doti i bagarapim gutpela pasin bilong yumi long pas gut wantaim Jehova!

22-25. Wanem ol stiatok bilong Baibel inap helpim yumi long abrusim ol pasin doti?

²² “Yu mas laikim Jehova, God bilong yu. Yu mas laikim em long bel olgeta bilong yu na long laip olgeta bilong yu na long tingting olgeta bilong yu.” (Matyu 22:​37, NW ) Jisas i tok dispela lo i nambawan bikpela lo. (Matyu 22:38) I stret yumi laikim Jehova olsem. Bilong laikim em long bel olgeta, laip olgeta, na tingting olgeta bilong yumi, yumi mas abrusim ol pasin em ol inap sotim laip bilong yumi o mekim na yumi no inap wokim gut tingting.

²³ “[God] i save givim laip na win na olgeta samting long olgeta manmeri.” (Aposel 17:​24, 25) Laip em i presen i kam long God. Yumi laikim tru dispela Man Bilong Givim ol samting, olsem na yumi laik soim rispek long dispela presen. Yumi sakim olgeta kain pasin em ol inap bagarapim helt bilong yumi. Yumi save olsem ol dispela kain pasin i soim olsem yumi no rispek long laip em yumi bin kisim olsem presen.​—Song 36:9.

²⁴ “Yu mas laikim ol narapela man olsem yu laikim yu yet.” (Matyu 22:​39, NW ) Ol pasin doti i save bagarapim man i mekim ol dispela pasin, na i bagarapim tu ol man i stap klostu long em. Olsem: Sapos ol man i no save smok i pulim win bilong smok bilong narapela man, dispela inap bagarapim ol. Man i bagarapim ol man i stap klostu long em, em i brukim lo bilong God i tok long yumi mas laikim ol arapela man. Na tu, pasin bilong em i soim olsem em i giaman taim em i tok em i laikim God.​—1 Jon 4:​20, 21.

²⁵ ‘Stap aninit long ol king na ol gavman, na bihainim tok bilong ol.’ (Taitus 3:1) Long planti kantri, sapos man i holim ol drak o em i yusim ol drak, em i brukim lo. Yumi ol Kristen  tru, yumi no save holim o yusim ol drak.​—Rom 13:1.

26. (a) Bilong i stap insait yet long pasin laikim bilong God, yumi mas mekim wanem? (b) Bilong wanem pasin bilong i stap klin long ai bilong God i nambawan gutpela rot bilong bihainim?

²⁶ Bilong i stap insait yet long pasin laikim bilong God, yumi mas i stap klin long olgeta samting na i no long sampela samting tasol. Ating i hatwok long sakim na lusim tru ol pasin doti, tasol yumi inap mekim olsem. d Dispela em i nambawan gutpela rot bilong bihainim, long wanem, oltaim Jehova i save skulim yumi long bihainim rot i helpim yumi long i stap gut. (Aisaia 48:17) Na bikpela samting tru, long rot bilong i stap klin yumi inap stap belgut, long wanem, yumi save olsem yumi litimapim nem bilong dispela God yumi laikim tru, na long dispela rot yumi stap insait yet long pasin laikim bilong em.