Long wanem taim na bilong wanem meri Kristen i mas karamapim het bilong em taim em i mekim ol samting bilong lotu? Yumi ken skelim tok em holi spirit i bin kirapim aposel Pol long raitim long dispela samting. Em i kamapim ol stiatok yumi nidim bilong wokim ol gutpela disisen, em ol disisen i givim biknem long God. (1 Korin 11:​3-16) Pol i  kamapim 3-pela samting bilong skelim: (1) ol wok we meri i mas karamapim het na mekim, (2) long wanem kain taim em i mas mekim olsem, na (3) astingting bilong bihainim dispela lo.

Ol wok. Pol i kolim tupela wok: prea na autim tok profet. (Ves 4, 5) Prea em wanpela pasin bilong lotuim Jehova na toktok wantaim em. Long nau, wok bilong autim tok profet inap makim olgeta kain wok em Kristen i mekim bilong skulim ol man long Baibel. Tasol yu ting Pol i laik tok olsem oltaim meri i mas karamapim het bilong em taim em i prea na skulim ol narapela long tok i tru bilong Baibel? Nogat. Long wanem kain taim meri i prea o skulim ol narapela, dispela bai makim olsem i stret em i mas karamapim het o nogat.

Long wanem kain taim. Tok bilong Pol i kamapim tupela kain taim, o hap we yumi mekim ol wok bilong lotu​—insait long famili na long kongrigesen. Em i tok: “Het bilong meri em man bilong en, . . . na sapos wanpela meri i no karamapim het bilong en na i mekim prea o i autim tok profet, em tu i semim het bilong en.” (Ves 3, 5) Insait long famili, Jehova i bin makim man bilong meri long stap olsem het bilong em. Sapos em i no soim rispek long man bilong em olsem het bilong famili, em bai semim man bilong em sapos em i mekim ol wok em Jehova i bin givim long man. Olsem, sapos meri i mas mekim wanpela Baibel stadi taim man bilong em i stap, em bai karamapim het bilong soim olsem em i daun long man bilong em. Em bai mekim olsem maski man i baptais pinis o nogat, long wanem, man em het bilong famili. a Sapos meri i prea o skulim narapela taim yangpela pikinini man bilong em husat i baptais pinis em i stap, orait em bai karamapim het. I no olsem pikinini man em het bilong famili, nogat. Meri bai karamapim het, long wanem,  pikinini man i baptais pinis na em i wanpela brata insait long kongrigesen Kristen.

Pol i toktok long samting i kamap long kongrigesen, olsem: “Sapos wanpela man i laik tok pait long yumi mas bihainim narapela pasin, yumi save yumi no gat narapela pasin. Na ol kongrigesen bilong God tu i no gat narapela pasin.” (Ves 16, NW) Insait long kongrigesen Kristen, ol man i baptais pinis ol i go pas long mekim wok. (1 Timoti 2:​11-14; Hibru 13:17) Ol man tasol inap kamap elda na kongrigesen sevan na mekim wok God i bin givim bilong lukautim lain sipsip bilong em. (Aposel 20:28) Tasol sampela taim, sampela samting i kamap na meri Kristen i mas mekim sampela wok em ol brata i baptais pinis i save mekim. Olsem, ating em i mas lukautim grup bilong wok autim tok, long wanem, i no gat wanpela brata i baptais pinis i stap bilong mekim dispela wok. O em inap mekim Baibel stadi wantaim wanpela em i bin pasim tok wantaim long mekim stadi na wanpela brata i baptais pinis i stap wantaim em. Ol kain wok olsem ol i hap wok bilong kongrigesen Kristen long skulim ol man, olsem na em i mas karamapim het bilong kamapim klia olsem em i mekim wanpela wok ol man i save mekim.

Tasol i gat planti wok bilong lotu we sista i no gat wok long karamapim het. Olsem, em i no gat wok long mekim olsem taim em i bekim tok long ol miting Kristen, o autim tok long ol haus wantaim man bilong em o narapela brata i baptais pinis, o taim man bilong em i no stap na em i stadi o prea wantaim ol pikinini bilong em husat i no baptais. Tru, sampela narapela askim long dispela samting inap kamap, na sapos sista i no kliagut long em bai mekim wanem, orait  em i ken mekim sampela moa wok painimaut. b Sapos em i gat tupela tingting yet long wanem pasin i stret long mekim na sapos maus bilong bel i kirapim em long karamapim het, orait i no gat rong long em i mekim olsem, olsem piksa long pes 241 i soim.

Astingting. Long ves 10 (NW), yumi lukim tupela as na meri Kristen i mas karamapim het: “Meri i mas karamapim het bilong en bilong makim olsem em i daun long man bilong en, bai ol ensel i ken lukim.” Namba wan, lukim dispela tok “makim olsem em i daun long man bilong en.” Taim meri i karamapim het, em i soim olsem em i save long namba em Jehova i bin givim long ol man i baptais pinis insait long kongrigesen. Olsem na em i kamapim klia pasin bilong em long laikim God Jehova na stap gut long em. Namba tu as i stap long dispela tok “bai ol ensel i ken lukim.” Taim meri i karamapim het, dispela i mekim wanem samting long ol strongpela ensel?

Ol ensel i laik lukim olsem olgeta insait long oganaisesen bilong Jehova​—long heven na long graun​—ol i daun long God. Taim ol man i gat sin i bihainim dispela lo, ol i stap olsem gutpela piksa long ol ensel. Ol tu i mas daun long ol pasin Jehova i bin putim​—em samting planti ensel long bipo i no bin mekim. (Jut 6) Long nau, ol ensel inap lukim wanpela meri Kristen husat i gat bikpela save na i smat long tingting, winim brata i baptais pinis insait long kongrigesen, tasol dispela meri Kristen i daun long brata. Sampela meri em ol Kristen God i bin makim na bihain ol bai mekim wok king wantaim Krais long heven. Ol kain meri olsem bai kisim namba i winim namba bilong ol ensel. Pasin bilong ol i stap olsem gutpela piksa ol ensel i ken lukim long nau! Tru tumas, em i gutpela samting tru long olgeta sista i ken mekim pasin daun na bihainim tok long rot bilong gutpela pasin bilong ol long daunim ol yet long ai bilong planti milion gutpela ensel!