I no gat planti narapela samting i givim bikpela pen long yumi olsem long taim wanpela wanblut o gutpela pren i raus long kongrigesen, long wanem, em i mekim sin na i no tanim bel. Pasin bilong yumi long bihainim tok bilong Baibel long dispela samting inap kamapim klia olsem yumi laikim tru God na yumi bai stap gut long ol pasin em i putim o nogat. a Tingim sampela askim i save kamap long dispela samting.

Yumi mas mekim wanem kain pasin long rauspela man? Baibel i tok: “Lusim pasin bilong poroman wantaim wanpela man yupela i save kolim brata, husat i save mekim pasin pamuk, o pasin gridi, o lotuim imis, o tok nogutim narapela, o spak, o stil. Yupela i no ken kaikai wantaim kain man olsem.” (1 Korin 5:​11, NW) Man husat “i no laik holimpas ol tok Krais i bin skulim ol man long en,” Baibel i tok yumi “no ken kisim em i go insait long haus bilong [yumi] o tok gude long em. Long wanem, man i tok gude long em, em i poromanim em long ol wok nogut bilong em.” (2 Jon 9-11, NW) Yumi no poroman wantaim o toktok wantaim ol rauspela man long ol samting bilong spirit. Wastaua bilong Februeri 1, 1982, pes 17, i tok: “Sapos yumi givim gude long wanpela man, ating bihain bai yumi kirap long toktok wantaim em na bai yumi pren wantaim em. Olsem na nogut yumi givim gude long man i raus pinis na bihain dispela i pulim yumi long pren wantaim em, a?”

Yu ting yumi mas strong long abrusim rauspela man? Yes, i gat planti as bilong dispela. Namba wan, em i kamapim klia pasin bilong yumi long stap gut long God na Tok bilong em. Yumi bihainim tok bilong Jehova long olgeta  taim, long taim em i isi long bihainim na long taim i hatwok long bihainim. Pasin bilong laikim tru God i kirapim yumi long bihainim olgeta tok bilong em, yumi save olsem em i gat stretpela pasin na pasin laikim na ol lo bilong em i kamapim ol gutpela samting tasol. (Aisaia 48:17; 1 Jon 5:3) Namba tu, taim yumi stap longwe long man i mekim rong na i no tanim bel, dispela i lukautim yumi na ol arapela insait long kongrigesen na yumi no bagarap long ol samting bilong spirit na lusim stretpela pasin bilong yumi, na tu, dispela pasin i lukautim gutnem bilong kongrigesen. (1 Korin 5:​6, 7) Namba tri, pasin bilong yumi long strong long bihainim ol stiatok bilong Baibel inap helpim rauspela man tu. Taim yumi sapotim disisen bilong komiti bilong harim kot, man i mekim rong inap pilim dispela long bel; ating i kam inap long dispela taim em i no bin senisim pasin bilong em maski ol elda i bin traim long helpim em. Taim rauspela man i no inap poroman moa wantaim famili na ol pren, dispela inap helpim em long “kisim stretpela tingting,” na luksave olsem em i bin mekim bikpela rong, na em bai kirap mekim ol samting bilong kam bek long Jehova.​—Luk 15:17.

Olsem wanem sapos wanpela wanblut i raus? Long kain taim olsem, pasin bilong famili long pas gut wantaim inap traim tru pasin bilong yumi long stap gut long ol lo bilong Jehova. Yumi mas mekim wanem kain pasin long wanblut i raus? Long dispela buk, yumi no inap stori long olgeta samting inap kamap, tasol yumi ken stori long tupela samting.

Sampela taim, rauspela man i stap yet long haus wantaim papamama na ol bratasusa bilong em. Maski em i raus, em i stap yet olsem wanpela bilong famili, olsem na em i ken insait long ol samting famili i save mekim long olgeta wan wan de. Tasol em i bin makim rot nogut bilong bihainim, olsem na em i no inap pas moa wantaim famili long ol samting bilong spirit. Sapos famili i laik stap gut long Jehova, ol i no ken larim rauspela man i insait long ol samting ol i mekim bilong lotuim God. Olsem, sapos rauspela  man i stap taim famili i bung bilong stadi long Baibel, em i no ken insait long mekim sampela tok. Tasol sapos rauspela man i yangpela yet, papamama i gat wok yet long skulim na stretim em. Olsem na papamama inap stretim rot bilong stadi long Baibel wantaim dispela pikinini. b​—Sindaun 6:​20-22; 29:17.

Tasol sampela taim, wanblut i raus em i no stap moa long haus wantaim papamama na ol bratasusa. Ating wan wan taim tasol i gat as tru na famili i mas toktok wantaim em long sampela bikpela samting bilong famili, tasol no ken mekim olsem planti taim. Ol Kristen i stap gut long God, ol i no painim ol eskius bilong toktok wantaim wanblut i raus na i no stap moa wantaim famili. Nogat. Pasin bilong ol long stap gut long Jehova na oganaisesen bilong em i kirapim ol long bihainim ol tok bilong Baibel long pasin bilong rausim man. Dispela stretpela pasin bilong ol i bilong helpim man i bin mekim rong, na dispela inap mekim na strafe em i bin kisim bai helpim em. c​—Hibru 12:11.