1, 2. Bilong wanem yu ting beten em i wanpela spesel presen? Bilong wanem yumi mas kisim save long tok Baibel i mekim long beten?

TAIM yumi skelim ples antap wantaim graun bilong yumi, graun em i liklik tru. Taim Jehova i lukluk i kam daun long graun, olgeta manmeri bilong olgeta kantri i olsem liklik hap wara i pundaun long baket. (Song 115:15; Aisaia 40:15) Maski yumi liklik tru taim yumi skelim wantaim ples antap, Buk Song 145:18, 19 i tok: “Jehova i save stap klostu long ol manmeri i save singaut long em i helpim ol, em ol manmeri i save bihainim pasin i tru na i singaut long em. Em i save inapim laik bilong ol manmeri i save pret long em; em i save harim krai bilong ol long kisim helpim, na em i save kisim bek ol.” Man! Em wanpela gutpela samting tru yumi gat! Jehova, em Man Bilong Wokim olgeta samting, i laik stap klostu long yumi, na em i laik harim ol beten bilong yumi. Yes, beten em wanpela gutpela samting, em wanpela spesel presen i kam long Jehova long yumi olgeta wan wan.

² Tasol Jehova bai harim beten bilong yumi sapos yumi toktok long em long pasin we em i orait long en. Olsem wanem yumi inap mekim olsem? Orait yumi skelim tok Baibel i mekim long pasin bilong beten.

3. Bilong wanem yu mas beten long Jehova?

³ Jehova i laik yumi mas beten o toktok long em. Olsem wanem yumi save long dispela? Plis ritim Filipai 4:6, 7. Tingim dispela gutpela samting em i singautim yumi long mekim.  Nambawan King bilong heven na graun i tingim yu tru na em i laik yu tokim em long filings bilong yu na ol hevi yu karim.

4. Olsem wanem pasin bilong beten long olgeta taim long Jehova bai strongim pasin pren bilong yu wantaim em?

⁴ Pasin bilong beten i helpim yumi long pas gut moa wantaim Jehova. Taim ol pren i save toktok wantaim narapela narapela long tingting, wari, na filings bilong ol, pasin pren bilong ol i save kamap strong moa. Dispela i wankain long pasin bilong beten long Jehova. Long rot bilong Baibel, em i tokim yu long tingting na filings bilong em, na long ol samting em bai mekim long bihain. Yu inap tokim em long ol tingting i stap insait tru long bel bilong yu long rot bilong beten long olgeta taim. Taim yu mekim olsem, pasin pren bilong yu wantaim em bai kamap strong moa.—Jems 4:8.

5. Olsem wanem yumi save Jehova i no save harim olgeta beten?

⁵ Yu ting Jehova i save harim olgeta beten? Nogat, em i no save harim olgeta beten. Long taim bilong profet Aisaia, Jehova i tokim ol Israel olsem: “Maski yupela i mekim planti  prea, mi no laik harim; han bilong yupela i pulap long blut.” (Aisaia 1:15) Olsem na sapos yumi no was gut, yumi inap mekim sampela pasin em Jehova i no laikim, na dispela inap mekim na God i no inap harim beten bilong yumi.

6. Bilong wanem bilip i bikpela samting? Olsem wanem yu soim olsem yu gat bilip?

⁶ Sapos yumi laik bai Jehova i harim ol beten bilong yumi, orait yumi mas bilip long em. (Mak 11:24) Aposel Pol i tok: “Man i no gat bilip em i no inap mekim God i amamas long em. Long wanem, man i laik i go klostu long God em i mas bilip olsem God i stap na God i save givim gutpela pe long ol man i wok strong long painim em.” (Hibru 11:6) Tasol pasin bilong tok yumi gat bilip, dispela samting tasol i no inap. Yumi mas kamapim klia bilip bilong yumi long rot bilong bihainim tok bilong Jehova long olgeta de.—Ritim Jems 2:26.

7. (a) Bilong wanem yumi mas daunim yumi yet na mekim pasin rispek taim yumi beten long Jehova? (b) Olsem wanem yumi soim olsem yumi pilim tru ol tok taim yumi beten?

⁷ Taim yumi beten long Jehova, yumi mas daunim yumi yet na i gat pasin rispek. Bilong wanem? Sapos yumi toktok wantaim wanpela king o presiden, bai yumi toktok long pasin rispek. Jehova em God i Gat Olgeta Strong olsem na yumi mas mekim moa yet pasin rispek na pasin daun taim yumi toktok long em, a? (Stat 17:1; Song 138:6) Na tu, taim yumi beten long Jehova, yumi mas pilim tru ol tok yumi mekim na givim bel long mekim, na i no kolim nating ol wankain tok gen na gen.—Matyu 6:7, 8.

8. Taim yumi beten na askim long wanpela samting, yumi mas mekim wanem ol samting?

⁸ Na tu, taim yumi beten long wanpela samting, yumi mas wok strong long mekim olgeta samting i stret wantaim beten bilong yumi. Olsem, sapos yumi beten long Jehova long ol samting yumi nidim long olgeta de, orait yumi no inap stap tasol na wetim Jehova long givim yumi olgeta samting sapos yumi yet inap long mekim wok bilong  kisim ol dispela samting. Yumi mas wok strong na mekim wanem wanem wok yumi inap long mekim. (Matyu 6:11; 2 Tesalonaika 3:10) O sapos yumi beten askim Jehova long helpim yumi long lusim wanpela pasin kranki, orait yumi mas abrusim ol samting we inap kirapim yumi long mekim dispela pasin nogut. (Kolosi 3:5) Orait nau, yumi ken skelim sampela askim long pasin bilong beten.

9. Yumi mas beten long husat? Jon 14:6 i givim wanem skul long yumi long beten?

⁹ Yumi mas beten long husat? Jisas i lainim ol disaipel bilong em long beten long “Papa bilong mipela long heven.” (Matyu 6:9) Em i tok tu olsem: “Mi yet mi rot na tok i tru na laip. I no gat man inap kam long Papa long narapela rot, nogat, long rot bilong mi tasol.” (Jon 14:6) Olsem na yumi mas beten long Jehova tasol long rot bilong Jisas. Dispela tok beten long rot bilong Jisas i makim wanem samting? Bilong Jehova i ken orait long beten bilong yumi, yumi mas soim rispek long namba Jehova i givim long Jisas. Olsem yumi lainim pinis, Jisas i kam long graun bilong kisim bek yumi long sin na dai. (Jon 3:16; Rom 5:12) Jehova i bin makim Jisas long i stap Hetpris na Jas.—Jon 5:22; Hibru 6:20.

10. Olsem wanem? Yumi mas mekim wanpela kain pasin olsem sanap o lindaun taim yumi beten? Stori long dispela.

¹⁰ Yumi mas mekim wanpela kain pasin, olsem sanap o lindaun taim yumi beten? Nogat. Jehova i no tokim yumi long nildaun, o sindaun, o sanap taim yumi beten. Baibel i tok yumi ken sindaun, daunim het, brukim skru, o sanap taim yumi beten long Jehova. (1 Stori 17:16; Nehemia 8:6; Daniel 6:10; Mak 11:25) Bikpela samting long Jehova em yumi toktok wantaim em long pasin rispek na yumi kamapim samting i stap long bel bilong yumi, i no hau yumi sindaun o brukim skru samting. Yumi ken opim maus na  beten bikpela o yumi ken beten long tingting maski yumi stap we we long san o long nait. Taim yumi beten long Jehova, yumi ken bilip tru olsem em bai harim, maski ol man i no luksave olsem yumi beten.—Nehemia 2:1-6.

11. Wanem sampela samting yumi ken beten long Jehova long en?

¹¹ Yumi inap beten long wanem ol samting? Yumi ken beten askim Jehova long olgeta kain samting i stret wantaim laik bilong em. Baibel i tok: “Maski wanem wanem samting yumi askim em long en na i stret wantaim laik bilong em, em bai harim yumi.” (1 Jon 5:14) Yu ting i stret yumi beten long ol samting yumi save tingting planti long en? Yes. Pasin bilong beten long Jehova i wankain olsem yumi toktok long wanpela gutpela pren. Yumi inap autim ol samting i stap long tingting na bel bilong yumi. (Song 62:8) Yumi ken beten askim God long givim holi spirit bilong em long yumi bilong helpim yumi long mekim ol samting i stret. (Luk 11:13) Yumi ken askim Jehova long givim yumi savetingting long mekim ol gutpela disisen, na yumi ken beten askim em long strongim yumi long karim ol hevi. (Jems 1:5) Yumi ken beten askim Jehova long lusim ol rong bilong yumi. (Efesus 1:3, 7) Yumi mas beten bilong helpim ol narapela, na ol famili bilong yumi, na ol bratasista long kongrigesen.—Aposel 12:5; Kolosi 4:12.

12. Wanem samting i mas i stap nambawan samting long beten bilong yumi?

¹² Wanem samting i mas i stap nambawan bikpela samting long beten bilong yumi? Jehova na laik bilong em. Long bel olgeta yumi mas tok tenkyu long em long olgeta samting em i mekim bilong helpim yumi. (1 Stori 29:10-13) Yumi save long dispela, long wanem, taim Jisas i stap long graun, em i lainim ol disaipel bilong em long pasin bilong beten. (Ritim Matyu 6:9-13.) Em i tok pastaim ol i mas beten olsem nem bilong God i mas i stap holi. Bihain Jisas i tok yumi mas beten long Kingdom Bilong God i mas  i kam na laik bilong Jehova i mas kamap long olgeta hap bilong graun. Bihain long Jisas i kolim ol dispela bikpela samting, em i tok yumi ken beten long ol samting yumi nidim. Taim yumi putim Jehova na laik bilong em i stap nambawan samting long beten bilong yumi, yumi kamapim klia wanem samting i bikpela samting long yumi.

13. Beten bilong yumi i mas longpela inap hamas minit?

¹³ Yumi mas beten inap hamas minit? Baibel i no mekim wanpela tok long dispela. Yumi ken mekim ol sotpela beten o longpela beten i stret long samting yumi mekim.  Olsem, ating yumi bai mekim sotpela beten paslain long yumi kaikai, tasol ating yumi beten longpela taim long taim yumi kamapim tenkyu bilong yumi long Jehova o long taim yumi kamapim ol samting yumi tingting planti long en. (1 Samuel 1:12, 15) Yumi no laik mekim ol longpela beten bilong pulim ai bilong ol narapela, olsem sampela manmeri long taim bilong Jisas i bin mekim. (Luk 20:46, 47) Jehova i no save laikim ol dispela kain beten. Bikpela samting long Jehova em taim yumi beten yumi mas pilim tru long bel.

14. Yumi mas beten hamas taim? Dispela i skulim yumi olsem wanem long Jehova?

¹⁴ Yumi mas beten hamas taim? Jehova i singautim yumi long toktok wantaim em olgeta taim. Baibel i tokim yumi long “beten oltaim,” na “oltaim holim strong pasin bilong beten.” (Matyu 26:41; Rom 12:12; 1 Tesalonaika 5:17) Oltaim Jehova i redi long harim beten bilong yumi. Yumi ken tok tenkyu long em long pasin laikim bilong em na pasin bilong  em long givim yumi ol samting. Yumi ken askim em long stiaim, strongim, na mekim gut bel bilong yumi. Sapos yumi amamas tru olsem yumi ken beten long Jehova, bai yumi painim planti rot bilong beten long em.

15. Bilong wanem yumi mas tok “amen” long pinis bilong beten?

¹⁵ Wai na yumi mas tok “amen” long pinis bilong beten? Dispela tok “amen” i makim “i tru,” o “mi wanbel long dispela tok.” Taim yumi mekim dispela tok, yumi kamapim klia olsem yumi pilim ol tok long bel bilong yumi. (Song 41:13) Baibel i tok i stret yumi tok “amen,” long bel o long maus, long pinis bilong beten em narapela i mekim bilong soim olsem yumi wanbel wantaim ol tok bilong dispela beten.—1 Stori 16:36; 1 Korin 14:16.

16. Tru tru Jehova i save harim ol beten bilong yumi? Stori long dispela.

¹⁶ Olsem wanem? Tru tru Jehova i save harim ol beten bilong yumi? Yes, em i save harim. Baibel i tok em i “Man Bilong Harim ol prea.” (Song 65:2) Jehova i save harim beten bilong planti milion manmeri i gat gutpela bel na em i save mekim olsem long kain kain rot.

17. Olsem wanem Jehova i yusim ol ensel na ol wokman bilong em long graun long bekim ol beten bilong yumi?

¹⁷ Jehova i save yusim ol ensel bilong em na ol wokman bilong em long graun bilong helpim ol man i beten long em. (Hibru 1:13, 14) I gat planti ekspiriens bilong ol man i bin beten askim God long helpim ol long kliagut long tok bilong Baibel, na bihain liklik wanpela Witnes Bilong Jehova i bungim dispela man. Dispela i kamapim klia olsem ol ensel i save stiaim wok bilong ‘autim gutnius’ long olgeta hap bilong graun. (Ritim Revelesen 14:6.) Na tu, planti bilong yumi i bin beten askim Jehova long helpim yumi long wanpela hevi yumi karim o yumi beten  long kisim helpim na wanpela brata o sista Kristen i kam helpim yumi.—Provep 12:25; Jems 2:16.

18. Olsem wanem Jehova i yusim holi spirit na Baibel long bekim beten bilong yumi?

¹⁸ Jehova i save yusim holi spirit bilong helpim yumi taim yumi beten long em. Taim yumi beten askim em long helpim yumi long karim wanpela hevi, em inap stiaim na strongim yumi long rot bilong holi spirit bilong em. (2 Korin 4:7) Long rot bilong Baibel Jehova i bekim ol beten bilong yumi na helpim yumi long wokim ol gutpela disisen. Taim yumi ritim Baibel, yumi inap painim ol skripsa i helpim yumi. Jehova inap kirapim wanpela long bekim tok long miting na kamapim sampela tok em yumi mas harim o em inap kirapim wanpela elda long kongrigesen long kamapim sampela tok bilong Baibel long yumi.—Galesia 6:1.

19. Olsem wanem sampela taim i luk olsem Jehova i no harim beten bilong yumi?

¹⁹ Tasol sampela taim ating yumi tingting olsem, ‘Wai na Jehova i no hariap long harim beten bilong mi?’ Tingim, em i save long taim i stret long mekim na long wanem rot em bai mekim. Em i save long ol samting yumi sot long en. Ating yumi mas wok yet long beten inap longpela taim bilong soim olsem yumi tingting tru long dispela samting yumi beten long en na yumi bilip tru long Jehova. (Luk 11:5-10) Sampela taim Jehova inap mekim ol samting bilong helpim yumi long rot yumi no luksave hariap long en. Olsem, ating yumi beten askim em long helpim yumi long wanpela hevi, tasol em i no rausim dispela hevi, em i strongim yumi long karim dispela hevi.—Ritim Filipai 4:13.

20. Bilong wanem yumi mas beten olgeta taim long Jehova?

²⁰ Em i wanpela gutpela samting tru long yumi inap beten long Jehova! Yumi ken bilip tru olsem em i save harim beten bilong yumi. (Song 145:18) Na sapos yumi beten olgeta taim long Jehova, pasin pren bilong yumi wantaim em bai kamap strong moa.