1. Yumi inap kisim save we long ol samting bai kamap bihain?

OLSEM WANEM? Nius yu lukim long TV o harim long redio i kirapim yu long askim olsem, ‘Wanem samting bai painim dispela graun?’ Sampela man i ting yumi stap klostu long pinis, long wanem, i gat planti hevi na pasin nogut i save kamap. Olsem wanem? Dispela samting i tru? I gat rot long yumi save long wanem ol samting bai kamap long bihain? Yes i gat rot. Ol man i no inap save long wanem samting bai kamap bihain, tasol God Jehova i save long ol samting bai kamap long bihain. Long Baibel em i tokim yumi long ol samting bai painim yumi long bihain na long ol samting bai kamap long graun.—Aisaia 46:10; Jems 4:14.

2, 3. Ol disaipel bilong Jisas i laik save long wanem samting? Na Jisas i bekim olsem wanem?

² Taim yumi ritim tok bilong Baibel long pinis, dispela i no makim olsem Graun bai pinis, nogat, em makim ol pasin nogut bai pinis. Jisas i skulim ol man olsem Kingdom Bilong God bai bosim dispela graun. (Luk 4:43) Ol disaipel bilong em i laik save long wanem taim Kingdom Bilong God bai kamap na ol i askim em olsem: “Wanem taim bai ol dispela samting i kamap? Na wanem sain bai kamap bilong soim olsem yu kam i stap na pinis bilong dispela taim i kamap pinis?” (Matyu 24:3) Jisas i no tokim ol long wanem taim stret dispela samting bai kamap, tasol em i tokim ol long wanem ol samting bai kamap paslain long pasin bilong dispela graun i pinis. Ol samting em i bin tok bai kamap i wok long kamap long nau.

³ Long dispela sapta bai yumi skelim ol samting i soim olsem yumi stap klostu long pinis bilong pasin bilong  dispela graun. Pastaim, yumi ken skelim wanpela pait i kamap long heven, na bai yumi ken kliagut long wai na ol samting long graun i go nogut.

4, 5. (a) Wanem samting i kamap long heven bihain liklik long Jisas i kamap King? (b) Olsem Revelesen 12:12 i tok, wanem samting i kamap long graun bihain long ol i tromoi Satan i kam daun?

⁴ Long Sapta 8 yumi kisim save olsem Jisas i kamap King long heven long yia 1914. (Daniel 7:13, 14) Buk Revelesen i stori long samting i bin kamap: “Woa i kamap long heven: Maikel [em makim Jisas] na ol ensel bilong em i pait wantaim dispela traipela snek [Satan], na traipela snek wantaim ol ensel bilong em i pait long ol.” * Satan na ol spirit nogut bilong em i lus long pait na ol i tromoi ol i kam daun long graun. Tingim amamas ol ensel i pilim! Tasol olsem wanem long ol manmeri bilong graun? Baibel i tok hevi bai kamap long ol manmeri bilong graun. Wai? Long wanem, Devil i belhat nogut tru, “em i save em i gat sotpela taim tasol bilong i stap.”—Revelesen 12:7, 9, 12.

⁵ Devil i kamapim planti hevi long graun. Em i belhat, long wanem, em i gat sotpela taim tasol bilong i stap na bai God i pinisim ol wok bilong em long graun. Yumi ken skelim ol samting Jisas i tok bai kamap long taim bilong las de.—Lukim Futnot long pes 220.

6, 7. Olsem wanem tok bilong Jisas long ol woa na bikpela hangre i kamap tru long nau?

⁶ Woa. Jisas i tok: “Wanpela kantri bai pait long narapela kantri na wanpela kingdom bai pait long narapela kingdom.” (Matyu 24:7) Planti manmeri i bin dai long ol  pait long taim bilong yumi winim ol arapela taim. Ripot bilong wanpela lain (Worldwatch Institute) i kamapim olsem, kirap long 1914 na i kam, winim 100 milion manmeri i bin dai long ol pait. Namba bilong ol manmeri i dai long ol pait long yia 1900 i go inap 2000 i winim tripela taim namba bilong ol man i dai long ol pait i bin kamap long 1,900 yia i go pinis. Tingim bikpela bel hevi na pen em planti milion manmeri i karim bikos long ol pait!

⁷ Hangre. Jisas i tok: “Bai i gat taim bilong ol bikpela hangre.” (Matyu 24:7) Long nau maski i gat planti kaikai winim long bipo, tasol planti manmeri i no gat inap kaikai. Bilong wanem i olsem? Bikos ol i no gat inap mani bilong baim kaikai o ol i no gat graun bilong planim kaikai long en. Planti bilion manmeri i gat liklik mani tasol bilong baim kaikai long olgeta de. Lain Wol Helt Oganaisesen i tok planti milion pikinini i dai long olgeta yia, long wanem, ol i no kisim gutpela kaikai.

8, 9. Wanem samting i soim olsem ol tok profet bilong Jisas long ol guria na bikpela sik i bin kamap tru?

⁸ Guria. Jisas i tok profet olsem:  “Bai i gat ol bikpela guria.” (Luk 21:11) Long olgeta yia bai i gat ol bikpela guria. Kirap long 1990 na i kam, ol guria i bin kilim i dai winim 2 milion manmeri. Na maski ol saientis i kisim nupela save long ol samting bilong lukautim ol man long taim bilong guria, planti manmeri i dai yet long taim guria i kamap.

⁹ Sik. Jisas i tok profet olsem bai i gat ol “bikpela sik.” Ol bikpela sik i go bikpela na kilim i dai planti manmeri. (Luk 21:11) Maski ol dokta i kisim nupela save long stretim ol sik, i gat ol sik we i no gat marasin bilong pinisim. Wanpela ripot i tok long olgeta yia, planti milion manmeri i dai long ol sik kain olsem, TB, malaria, na kolora. Na i no dispela tasol, ol dokta i painimaut 30 nupela sik na sampela bilong ol i no gat rot bilong stretim.

10. Olsem wanem tok bilong 2 Timoti 3:1-5 i kamap tru long nau?

¹⁰ Long 2 Timoti 3:1-5, Baibel i tok olsem: “Long taim bilong las de, taim nogut bai kamap na  dispela bai givim hatwok long ol man.” Aposel Pol i stori long pasin planti man bai bihainim long taim bilong las de. Em i tok ol manmeri bai

• laikim ol yet tasol

• laikim tumas mani

• sakim tok bilong papamama

• givim baksait long ol pasin bilong God

• i no save long pasin bilong i stap pren

• i no bosim laik bilong bodi

• pait na bagarapim ol man

• laikim tumas ol kain kain pasin bilong amamas na i no laikim God

• bihainim pasin bilong God long skin tasol

11. Song 92:7 i tok wanem samting bai painim ol man nogut?

¹¹ Olsem wanem? Planti manmeri i gat ol dispela pasin long hap yu stap long en? Long olgeta hap i gat planti manmeri i mekim olsem. Tasol klostu nau God bai mekim sampela samting long dispela. Em i tok promis olsem: “Maski ol man nogut i  kamap planti olsem ol gras nogut na ol man bilong mekim pasin nogut i kisim planti samting na i stap gut, ol bai pinis olgeta.”—Song 92:7.

12, 13. Jehova i skulim yumi long wanem samting long taim bilong las de?

¹² Baibel i tok olsem long taim bilong las de, dispela graun bai pulap long pen na hevi. Tasol Baibel i tok tu olsem ol gutpela samting bai kamap.

¹³ Kliagut long tok bilong Baibel. Profet Daniel i stori long ol samting bai kamap long las de. Em i tok: “Stretpela save bai kamap bikpela tru.” (Daniel 12:4) God bai helpim ol manmeri bilong em long kliagut moa long ol tok bilong Baibel. Kirap long 1914 Jehova i bin mekim olsem. Olsem, em i skulim yumi long nem bilong em i bikpela samting, na ol samting em i tingting pinis long mekim long graun, na ofa bilong baim bek ol man, na wanem samting i painim yumi taim yumi dai, na kirap bek. Yumi bin kisim save olsem Kingdom Bilong God tasol bai stretim ol hevi bilong yumi. Na tu, yumi kisim save long olsem wanem yumi inap stap amamas na wanem samting yumi inap mekim bilong amamasim God. Ol wokman bilong God i mekim wanem long save ol i kisim? Narapela tok profet i bekim dispela askim.—Lukim Futnot long pes 216 na pes 221.

14. Ol i autim gutnius bilong Kingdom long wanem ol hap? Husat i autim dispela tok?

¹⁴ Autim tok long olgeta hap bilong graun. Jisas i stori long las de olsem: “Ol bai autim dispela gutnius bilong Kingdom long olgeta hap bilong graun.” (Matyu 24:3, 14) Ol i autim gutnius bilong Kingdom long 240 kantri na winim 900 tokples. Yes, long olgeta hap bilong graun, ol Witnes Bilong Jehova “bilong olgeta kantri na olgeta traib” i helpim ol  manmeri long kliagut long Kingdom em i wanem samting na em bai mekim wanem ol samting bilong helpim ol man. (Revelesen 7:9) Ol i save mekim dispela wok, na i no gat pe. Maski planti man i no laikim ol na mekim nogut long ol, i no gat wanpela samting bai pasim wok bilong autim tok olsem Jisas i bin tok profet long en.—Luk 21:17.

15. (a) Yu bilip olsem yumi stap long taim bilong las de? Bilong wanem yu bilip olsem? (b) Wanem samting bai painim ol man i daun long Jehova na wanem samting bai painim ol man i no laik mekim olsem?

¹⁵ Yu wanbel long tok olsem yumi stap long taim bilong las de? Planti tok profet bilong Baibel i wok long kamap tru long nau. Klostu nau Jehova bai stopim wok bilong autim gutnius na “pinis” bai kamap. (Matyu 24:14) Wanem taim pinis bai kamap? Long Armagedon, taim God i pinisim pasin nogut. Jehova bai mekim wok long Jisas na ol strongpela ensel bilong pinisim olgeta lain i no laik daun long Em na Pikinini bilong em. (2 Tesalonaika 1:6-9) Bihain long dispela, Satan na ol spirit nogut bilong em bai i no giamanim moa ol manmeri. Na ol manmeri i amamas long bihainim tok bilong God na daun long wok bos bilong Kingdom bilong em, ol bai lukim ol tok promis bilong God i kamap tru.—Revelesen 20:1-3; 21:3-5.

16. Pinis i kam klostu, olsem na i gutpela long yu mekim wanem?

¹⁶ Klostu nau pasin nogut bilong dispela graun bilong Satan bai pinis. Olsem na em i bikpela samting long askim yumi yet olsem, ‘Mi mas mekim wanem?’ Jehova i laik bai yu mas kisim save moa long Baibel. Yu mas givim bel long stadi. (Jon 17:3) Ol Witnes Bilong Jehova i save mekim ol miting long olgeta wik long helpim ol manmeri long kliagut long Baibel. Yu mas traim long go long ol dispela miting olgeta taim. (Ritim Hibru 10:24, 25.) Sapos yu kisim save olsem yu mas mekim ol senis long laip bilong yu, orait  no ken pret long mekim olsem. Taim yu mekim olsem, pasin pren bilong yu wantaim Jehova bai kamap strong moa.—Jems 4:8.

17. Bilong wanem planti man bai kirap nogut taim pinis i kamap?

¹⁷ Aposel Pol i tok olsem bagarap bilong ol man nogut bai kamap long taim we ol man i no ting em bai kamap “olsem wanpela stilman i kam long nait.” (1 Tesalonaika 5:2) Jisas i tok profet olsem planti bai i no laik luksave long ol samting i soim olsem yumi stap long taim bilong las de. Em i tok: “Pasin ol man i bin mekim long taim bilong Noa, wankain pasin bai i kamap long taim Pikinini bilong man i kam i stap. Paslain long Bikpela Tait, ol i wok long kaikai na dring, na ol man i marit, na ol manmeri i givim ol pikinini meri bilong ol long marit. Ol i mekim olsem i go inap long taim Noa i go insait long sip. Ol i no luksave long ol samting i wok long kamap, i go inap long taim Bikpela Tait i kam na karim ol i go. Em bai wankain tasol long taim Pikinini bilong man i kam i stap.”—Matyu 24:37-39.

18. Jisas i givim wanem tok lukaut long yumi?

¹⁸ Jisas i tok lukaut olsem yumi no ken larim “pasin bilong kaikai planti tumas na dring planti na ol wari bilong laip” i pulim nabaut tingting bilong yumi. Em i tok pinis bai kamap wantu tasol “olsem wanpela trap i holimpas animal.” Em i tok tu olsem “dispela de bai kamap long olgeta manmeri i stap long graun.” Na em i tok moa: “Olsem na yupela i mas was i stap, na oltaim yupela i mas beten strong bai yupela i ken abrusim ol dispela samting i mas kamap, na bai yupela i ken sanap long ai bilong Pikinini bilong man.” (Luk 21:34-36) Bilong wanem em i bikpela samting long putim yau long tok lukaut bilong Jisas? Long wanem, klostu nau pasin nogut bilong dispela graun em Satan i bosim bai pinis. Ol man em Jehova na Jisas i orait long ol, ol tasol bai abrusim bagarap na stap oltaim long nupela taim.—Jon 3:16; 2 Pita 3:13.