PLANTI yia i lus. Ol pikinini man bilong Noa i kamapim planti pikinini. Na ol dispela pikinini i go bikpela na ol tu i kamapim ol pikinini. I no longtaim na planti manmeri i pulap long graun.

Wanpela bilong ol em i tumbuna pikinini bilong Noa, nem bilong em Nimrot. Em i man nogut na em i save kilim i dai ol animal na ol man. Nimrot i mekim em yet i kamap king bambai em i ken bosim ol narapela man. God i no laikim Nimrot.

Long dispela taim bipo olgeta manmeri i gat wanpela tok ples tasol. Nimrot i laik bai olgeta i stap long wanpela hap tasol na bai em i ken bosim ol. Olsem na yu save em i mekim wanem? Em i tokim ol man long wokim wanpela taun na sanapim wanpela bikpela taua insait long en. Long piksa yu inap lukim ol man i wokim ol brik.

God Jehova i no amamas long dispela taua. God i laik bai ol man i mas go nabaut na sindaun long olgeta hap bilong graun. Tasol ol i tok: ‘Yumi wokim wanpela bikpela taun na wanpela taua i go antap long skai, na bai yumi kisim biknem!’ Ol manmeri i laik kisim biknem bilong ol yet, na ol i no laik givim biknem long God.

Olsem na God i pasim ol long wokim dispela taua. Yu save em i bin mekim wanem bilong pasim ol? Em i mekim na wantu ol man i mekim narapela narapela tok ples, ol i no mekim wanpela tok ples tasol. Narapela i no save long tok ples bilong narapela. Olsem na ol i kolim nem bilong dispela taun olsem Babel, o Babilon, na mining bilong en i olsem “Longlong Nabaut.”

Ol i kirap lusim Babel na i go nabaut. Ol lain manmeri bilong ol narapela narapela tok ples ol i go i stap long ol narapela narapela hap.