HAP 2
Stap Gut Long Poroman Marit
“Samting God i pasim pinis, man i no ken katim.”—Mak 10:9
Jehova i laik bai yu “mas i stap gut” long poroman marit. (Sindaun 5:15) Yu mas mekim olsem, long wanem, dispela bai helpim yutupela long trastim narapela narapela, na dispela bai strongim pasin laikim.
Long nau, planti marit lain i no stap gut long poroman marit. Sapos yutupela i laik lukautim marit bilong yutupela, orait yutupela i mas tingting strong long mekim 2-pela samting.
1 TINGIM MARIT OLSEM BIKPELA SAMTING
BAIBEL I TOK: “Skelim gut wanem ol samting i bikpela samting moa.” (Filipai 1:10) Marit bilong yu em i bikpela samting long laip bilong yu. Olsem na i stret long tingim gut marit bilong yu.
Jehova i laik bai yu tingim gut poroman marit na yutupela i stap “amamas.” (Saveman 9:9) Em i soim klia olsem yu mas tingim poroman marit na yutupela wantaim i mas painim rot bilong amamasim narapela narapela. (1 Korin 10:24) Soim klia long poroman marit olsem yu nidim em na yu amamas long em.
SAMTING YU KEN MEKIM:
-
Oltaim yu mas lusim sampela haptaim long stap wantaim poroman marit, na putim gut yau long em
-
Lain long yusim dispela tok, “yumi,” na no ken tok, “mi”
2 LUKAUTIM GUT TINGTING I STAP LONG BEL
BAIBEL I TOK: “Man husat i wok long lukluk long wanpela meri na aigris long em, long bel em i mekim pinis pasin adaltri.” (Matyu 5:28) Sapos tingting bilong man i stap long pasin doti, i olsem em i no stap gut long poroman marit.
Jehova i tok yu mas “was gut tru long tingting” i stap long bel bilong yu. (Sindaun 4:23; Jeremaia 17:9) Dispela i makim olsem yu mas lukaut long ol samting yu lukluk long en. (Matyu 5:29, 30) Bihainim pasin bilong bilipman Jop bilong bipo—em i mekim strongpela promis olsem em i no inap aigris long narapela meri. (Jop 31:1) Tingting strong olsem yu no ken tru lukim ponografi.. Pasim tok long bel olsem yu bai laikim tru poroman marit bilong yu, na yu no inap bel kirap long narapela man o meri.
SAMTING YU KEN MEKIM:
-
Soim klia long ol narapela olsem yu laikim tru poroman marit bilong yu
-
Tingim filings bilong poroman marit, na sapos yu save pas gut wantaim wanpela na poroman marit bilong yu i no amamas, orait yu mas lusim dispela narapela em i no poroman marit
Ating Yu Bai Laikim Tu
KIRAP!
Rot Bilong Strongim Tok Promis
Yu ting tok promis bilong marit i olsem wanpela sen i kalabusim yu o i olsem anka i strongim marit bilong yu?
