1. Planti man na sampela Kristen tru i gat wanem tingting?

 OLSEM WANEM? Jehova God i save laikim yu? Sampela i tok God i save laikim olgeta man, olsem Jon 3:16 i tok. Tasol ol i ting, ‘God i no inap laikim mi yet.’ Ol trupela Kristen tu inap kisim tupela tingting long dispela. Wanpela man i bel hevi, em i tok: “Mi hatwok long bilip olsem God i save tingim mi.” Olsem wanem? Sampela taim yu save tingting olsem?

2, 3. Husat i laik bai yumi ting Jehova i no save laikim yumi o ting yumi samting nating? Olsem wanem yumi ken daunim dispela tingting?

² Satan i laik bai yumi ting God Jehova i no save laikim yumi o ting yumi samting nating. Tru, planti taim Satan i grisim ol man long rot bilong pasin bilong ol long hambak na ting ol i samting tru. (2 Korin 11:3) Tasol em i save amamas tu long daunim ol man i no gat strong na bai ol i ting ol i samting nating tasol. (Jon 7:47-49; 8:13, 44) Em i save mekim moa yet nau long dispela “taim bilong las de” i gat planti hevi long en. Planti man long nau i go bikpela insait long ol famili “i no gat pasin laikim.” Sampela ol i karim hevi long stap namel long ol man i save pait na bagarapim ol man, tingim ol yet, na bikhet. (2 Timoti 3:1-5) Sapos planti yia narapela i bin mekim nogut long ol, o birua long ol, long wanem, ol i bilong narapela lain o skin, dispela inap mekim na ol i ting ol i samting nogut tasol o ol i no gutpela inap long narapela i laikim ol.

³ Sapos yu gat kain tingting olsem, yu no ken bel hevi. Planti bilong yumi i save kotim na skelim tumas yumi yet long sampela taim. Tasol tingim, Baibel i bilong “mekim ol samting i kamap stret” na bilong “daunim ol samting i gat strong.” (2 Timoti 3:16; 2 Korin 10:4) Baibel i tok: “Long ai bilong God, yumi ken bilip tru long bel bilong yumi olsem . . .  maski bel bilong yumi i kotim yumi long wanpela samting, God i winim tru bel bilong yumi na  em i save long olgeta samting.” (1 Jon 3:19, 20) Nau yumi ken skelim 4-pela rot em Baibel i helpim yumi long “bilip tru long bel bilong yumi olsem” Jehova i laikim yumi tru.

4, 5. Olsem wanem tok piksa bilong Jisas long ol liklik pisin i soim olsem Jehova i save tingim yumi?

⁴ Namba wan, Baibel i tokaut stret olsem God i lukim sampela gutpela samting long olgeta wan wan wokman bilong em. Jisas i tok: “Ol man i save salim tupela liklik pisin long koin i gat liklik pe. Tasol i no gat wanpela bilong ol dispela liklik pisin i save pundaun long graun na Papa bilong yupela i no save long dispela. Em i kaunim pinis olgeta gras long het bilong yupela. Olsem na yupela i no ken pret; yupela i winim tru ol dispela liklik pisin.” (Matyu 10:29-31) Long taim bilong Jisas, ol dispela tok i gat wanem mining long ol man i bin harim?

⁵ Ating yumi laik save long as na wanpela man i laik baim liklik pisin. Long taim bilong Jisas, pe bilong dispela kain pisin bilong kaikai i liklik tru. Long wanpela liklik koin, man inap baim tupela pisin. Tasol bihain Jisas i tok, sapos man i tromoi tupela liklik koin em bai kisim faipela pisin, i no fopela. Ol i givim wanpela pisin moa olsem dispela pisin em i samting nating. Ating ol man i ting kain pisin olsem em i samting nating, tasol Man Bilong Wokim olgeta samting i gat wanem tingting long ol? Jisas i tok: “God i no save lusim tingting long wanpela bilong ol dispela pisin [em i tingim dispela pisin tu ol i givim nating].” (Luk 12:6, 7) Dispela i helpim yumi long kliagut long tok Jisas i laik skulim yumi long en. Sapos Jehova i save tingim wanpela liklik pisin, yumi ken save em i tingim moa yet ol man! Olsem Jisas i tok, Jehova i save long olgeta liklik samting bilong yumi. Tingim, em i kaunim pinis olgeta gras long het bilong yumi!

6. Bilong wanem yumi ken bilip olsem Jisas i no tok nating taim em i tok God i kaunim gras bilong het bilong yumi?

⁶ Tru tru em i kaunim gras long het bilong yumi? Sampela inap ting Jisas i kolim nating dispela tok. Tasol tingim bilip bilong kirap bek. Jehova i mas save gut tru long yumi bilong em i ken wokim yumi gen! Em i tingim tru yumi na em i tingim olgeta samting bilong yumi, olgeta save i stap insait long ol jin na olgeta  samting yumi holim long tingting na olgeta samting i bin painim yumi. a Wok bilong kaunim namba bilong ol gras long het bilong man—em inap olsem 100,000—em i liklik samting tru taim yumi skelim wantaim wok bilong kirapim bek man.

7, 8. (a) Jehova i amamas taim em i lukim wanem ol pasin i stap long bel bilong man? (b) Wanem sampela wok yumi save mekim em Jehova i save laikim tru?

⁷ Namba tu samting, Baibel i skulim yumi long ol samting Jehova i save laikim long ol wokman bilong em. Em i save amamas long ol gutpela pasin bilong yumi na ol wok yumi save mekim. King Devit i bin tokim pikinini bilong em, Solomon: “Jehova i save skelim bel bilong olgeta man, na em i save long tingting bilong olgeta man.” (1 Stori 28:9) God i wok long skelim bel bilong planti bilion manmeri nau long dispela taim nogut bilong pait na birua, olsem na em i amamas tru taim em i lukim bel bilong wanpela man i laikim tumas bel isi, na tok i tru, na stretpela pasin! Orait, God i save mekim wanem taim em i lukim bel bilong wanpela man i save laikim em tru, na dispela man i laik kisim save long em na autim dispela save long ol narapela man? Jehova i tok, em i save tingim ol man i save tokim ol narapela man long em. Em i gat “buk i gat nem bilong ol man em i tingim ol, em ol man i pret long Jehova na ol man i tingim tingim nem bilong em.” (Malakai 3:16) Ol dispela pasin i gutpela samting tru long ai bilong em.

⁸ Wanem sampela gutpela wok Jehova i save laikim tru? Em i amamas tru long hatwok yumi mekim bilong bihainim pasin bilong Pikinini bilong em, Jisas Krais. (1 Pita 2:21) Wanpela bikpela wok God i tingim tru em wok bilong autim gutnius bilong Kingdom bilong em. Rom 10:15 i tok: “Ol man i autim gutnius long  ol gutpela samting, lek bilong ol i naispela tumas!” Ating yumi no save tingim lek bilong yumi i naispela tumas. Tasol long dispela ves lek i makim hatwok ol wokman bilong Jehova i save mekim bilong autim gutnius. Olgeta dispela wok i gutpela samting tru long ai bilong em.​—Matyu 24:14; 28:19, 20.

9, 10. (a) Bilong wanem yumi ken bilip olsem Jehova i save laikim tru pasin bilong yumi long sanap strong taim yumi karim kain kain hevi? (b) Jehova i no save kisim wanem tingting long ol wokman i stap gut long em?

⁹ Jehova i save tingim tu pasin bilong yumi long sanap strong na karim hevi. (Matyu 24:13) Tingim, Satan i laik bai yu givim baksait long Jehova. Olgeta wan wan de yu stap gut long Jehova, yu bin helpim Jehova long bekim tok giaman Satan i bin sutim long em. (Provep 27:11) Sampela taim i hatwok tru long sanap strong na karim hevi. Sik, hevi bilong mani, bel hevi, na ol narapela samting inap mekim na dispela i givim hatwok long yumi long olgeta wan wan de. Taim ol samting yumi bin wet long en i no kamap, dispela tu inap mekim na yumi bel hevi. (Provep 13:12) Jehova i save tingim tru pasin bilong yumi long sanap strong, maski yumi karim ol kain hevi olsem. Long dispela as, King Devit i askim Jehova long pulapim aiwara bilong em long wanpela “beg wara,” na em i tok moa: “Raitim dispela long buk bilong yu.”  (Buk Song 56:8) Yes, Jehova i save tingim tru krai bilong yumi na ol hevi yumi karim taim yumi wok long stap gut long em. Ol dispela samting tu i no liklik samting long ai bilong em.

¹⁰ Tasol taim bel bilong yumi i kotim na daunim yumi, yumi inap pilim olsem yumi no gutpela samting tru long ai bilong God. Ating oltaim yumi tingting olsem: ‘I gat planti manmeri i save mekim moa yet ol gutpela pasin, winim mi. Taim Jehova i skelim mi wantaim ol, ating em i no amamas liklik long mi!’ Tasol Jehova i no save skelim yumi wantaim ol narapela; na em i no mekim hatpela pasin long yumi. (Galesia 6:4) Em i save lukim gut bel bilong yumi, na em i save laikim tru olgeta gutpela pasin, maski ol i planti o liklik tasol.

11. Ol samting Jehova i mekim long Abiya i lainim yumi long wanem samting bilong Jehova?

¹¹ Namba tri, taim Jehova i skelim bel bilong yumi, em i wok long painim ol gutpela pasin bilong yumi. Olsem: Taim Jehova i tok ol i mas kilim i dai lain olgeta bilong King Jeroboam em ol i bin tromoi lotu i tru, Em i tok ol i mas planim gut wanpela pikinini man bilong king, em Abiya. I gat wanem as na em i tok olsem? “Long wanem, Jehova, God bilong Israel, i lukim olsem em wanpela tasol . . . i mekim gutpela pasin.” (1 King 14:1, 10-13) I olsem Jehova i skelim bel bilong dispela yangpela man na painim “gutpela pasin” long en. Maski dispela gutpela pasin i liklik tasol, Jehova i tingim em i gutpela samting inap long ol i ken raitim dispela long Baibel. Em i givim gutpela pe long dispela pasin, em i marimari long dispela man i bilong dispela lain i bin tromoi lotu i tru.

12, 13. (a) Olsem wanem stori bilong King Jehosafat i soim olsem Jehova i save lukim ol gutpela pasin bilong yumi, maski yumi mekim sin? (b) Taim yumi mekim ol gutpela wok na pasin, Jehova i mekim wanem olsem wanpela Papa i save laikim tru ol pikinini?

¹² Stori bilong gutpela King Jehosafat i kamapim klia moa dispela samting. Taim king i mekim wanpela longlong pasin, profet bilong Jehova i tokim em: “Yu bin mekim dispela kain pasin, olsem na Jehova i belhat long yu.” Em i wanpela strongpela tok! Tasol Jehova i laik mekim sampela tok moa. Em i tok: “Maski i  olsem, God i lukim ol gutpela samting long yu.” (2 Stori 19:1-3) Olsem na maski Jehova i kros long pasin nogut bilong Jehosafat, Em i luksave tu long gutpela pasin bilong em. Yumi ol man bilong graun i no save mekim olsem! Taim yumi kros long narapela, ating yumi no save lukim gutpela pasin bilong em. Na taim yumi mekim sin, yumi bel hevi, sem, na bel i kotim yumi, na dispela inap mekim na yumi no luksave long ol gutpela pasin bilong yumi yet. Tasol tingim, sapos yumi hevi long ol sin yumi mekim na tanim bel na wok strong long yumi no ken mekim gen, Jehova bai lusim rong bilong yumi.

¹³ Taim Jehova i skelim bel bilong yu, i olsem em i rausim ol kain sin olsem, wankain olsem man i painim gol em i save rausim ol ston nating. Olsem wanem long ol gutpela pasin na wok bilong yu? Ol i olsem ol liklik hap “gol” em i save holim i stap! Olsem wanem? Yu bin lukim ol papamama i lukautim gut piksa pikinini i bin droim o wanpela samting pikinini i bin wokim long skul? Sampela taim papamama i holim dispela samting inap planti yia bihain long ol pikinini i lusim tingting pinis long en. Jehova em i wanpela Papa i save tingim tru ol pikinini bilong em. Sapos yumi stap gut long em, em bai no inap lusim tingting long ol gutpela wok na pasin bilong yumi. Sapos em i lusim tingting long ol dispela samting, long tingting bilong em, i olsem em i  mekim pasin i no stret, na i no gat wanpela taim em i mekim pasin i no stret. (Hibru 6:10) Em i save skelim yumi long wanpela narapela rot tu.

14, 15. (a) Maski yumi gat ol pasin kranki, bilong wanem Jehova inap luksave yet long ol gutpela pasin bilong yumi? Stori long dispela. (b) Jehova bai mekim wanem long ol gutpela pasin em i lukim i stap long yumi? Em i ting olsem wanem long ol manmeri bilong em i stap gut long em?

¹⁴ Maski yumi gat ol pasin kranki, Jehova i save tingim tu ol samting yumi inap long mekim. Olsem: Ol man husat i save laikim ol piksa ol man i bin wokim, ol bai mekim bikpela wok bilong stretim bek ol piksa o ol narapela samting olsem i bin bagarap. Long wanpela haus (National Gallery) long London, Inglan, i gat ol naispela piksa, na wanpela man i sut long sotgan na bagarapim piksa em Leonardo da Vinci i bin wokim, pe bilong piksa em inap olsem 120 milion kina. I no gat wanpela man i tok long ol i mas tromoi dispela piksa, long wanem, em i bagarap nau. Nogat. Wantu tasol ol i kirap stretim dispela piksa i bin i stap inap 500 yia pinis. Bilong wanem ol i mekim olsem? Long wanem, em i gutpela samting tru long ai bilong ol man i save laikim tru ol piksa ol man i bin wokim. Yu ting yu gutpela samting tru, winim wanpela piksa man i bin wokim long pensil samting? God i ting olsem—maski sin i mekim na yu no gutpela olgeta. (Buk Song 72:12-14) God Jehova, em Man Bilong Wokim ol man, em bai mekim ol samting em i mas mekim na bai ol man i pilim gutpela pasin sori bilong em ol inap kamap gutpela olgeta.​—Aposel 3:21; Rom 8:20-22.

¹⁵ Jehova i save lukim ol gutpela pasin bilong yumi em yumi yet i no luksave long en. Na taim yumi mekim wok bilong em, em bai mekim ol dispela gutpela pasin i kamap strong i go inap long yumi kamap gutpela olgeta. Maski ol man bilong graun bilong Satan i bin mekim wanem long yumi, Jehova i ting ol wokman i stap gut long em ol i dia tumas.​—Hagai 2:7.

16. Wanem nambawan samting i kamapim klia olsem Jehova i laikim tru yumi? Olsem wanem yumi ken save dispela presen em i samting bilong yumi yet?

¹⁶ Namba foa, Jehova i mekim planti samting bilong kamapim  klia em i laikim tru yumi. Ofa bilong Krais bilong baim bek ol man i bekim tru tok giaman bilong Satan, olsem yumi samting nating o ol narapela i no inap laikim yumi. Yumi no ken lusim tingting long bikpela pen Jisas i karim long diwai pos na bihain em i dai, na bikpela pen moa em Jehova i pilim taim em i lukim Pikinini em i laikim tumas i dai, dispela samting i kamapim klia pasin bilong tupela long laikim tru yumi. Sori tru, planti man i hatwok long bilip olsem dispela presen em i samting bilong ol yet i ken kisim. Ol i ting ol i no gutpela inap long ol i ken kisim dispela samting. Tingim, aposel Pol i bin birua long ol disaipel bilong Krais. Tasol em i tok: “Pikinini Bilong God.  . . i bin laikim mi tumas na givim em yet bilong helpim mi.”​—Galesia 1:13; 2:20.

17. Long wanem ol rot Jehova i pulim yumi i go long em na long Pikinini bilong em?

¹⁷ Jehova i helpim yumi wan wan long kisim ol gutpela samting ofa bilong Krais i kamapim na long dispela rot em i soim olsem em i laikim tru yumi. Jisas i tok: “I no gat man inap kam long mi sapos Papa, husat i bin salim mi i kam, i no kirapim em long kam long mi.” (Jon 6:44) Yes, Jehova yet i pulim yumi i go long Pikinini bilong em na long laip i stap gut oltaim. Olsem wanem em i mekim dispela? Long rot bilong wok autim tok—em ol i bin autim tok long yumi wan wan—na long rot bilong holi spirit, em Jehova i mekim wok long en bilong helpim yumi long save gut long tok i tru na bihainim, maski yumi gat sin na strong bilong yumi i gat mak bilong en. Olsem na Jehova inap tok long yumi olsem em i bin tok long lain Israel: “Oltaim mi bin laikim yu tumas. Olsem na mi mekim yu i kam klostu long mi long rot bilong gutpela pasin laikim.”​—Jeremaia 31:3.

18, 19. (a) Long wanem rot yumi ken pilim moa yet olsem Jehova i save laikim tru yumi? Wanem samting i soim olsem dispela em i samting bilong em yet? (b) Olsem wanem Baibel i kamapim klia olsem Jehova i save pilim hevi bilong man i toktok long em?

¹⁸ Tasol ating long rot bilong beten yumi ken pilim moa yet olsem Jehova i save laikim tru yumi. Baibel i tokim yumi long “beten oltaim” long God. (1 Tesalonaika 5:17) Em i save putim yau. Em i “Man Bilong Harim ol prea.” (Buk Song 65:2) Em i no givim namba bilong mekim dispela wok long wanpela narapela, na  em i no givim long Pikinini bilong em tu. Tingim dispela: Man Bilong Wokim heven na graun i tokim yumi long go klostu long em long rot bilong beten, na kamapim bel bilong yumi. Na taim em i putim yau long beten bilong yumi, yu ting em i olsem man i no save tingim narapela o i no wari long em? Nogat tru.

¹⁹ Jehova i save pilim hevi bilong man. Dispela pasin bilong pilim hevi bilong narapela em i wanem kain pasin? Wanpela gutpela lapun Kristen i tok: “Em pasin bilong pilim pen bilong yu long bel bilong mi.” Yu ting Jehova i save pilim tru pen bilong yumi? Baibel i stori long ol hevi lain bilong em, lain Israel i bin karim: “Long taim ol i stap bel hevi, dispela i mekim em tu i bel hevi.” (Aisaia 63:9) Jehova i luksave long ol hevi bilong ol, na tu, em i pilim hevi bilong ol. Tok Jehova yet i mekim long ol wokman bilong em i kamapim klia em i pilim tru hevi bilong ol, em i tok: “Man i tatsim yupela em i tatsim ai kiau bilong mi.” b (Sekaraia 2:8) Dispela bai givim bikpela pen tru! Em nau, Jehova i pilim hevi bilong yumi. Taim yumi pilim pen, em tu i pilim.

20. Yumi mas sakim wanem tingting i no stret sapos yumi laik bihainim tok i stap long Rom 12:3?

²⁰ Kristen i gat gutpela tingting em i no inap ting pasin bilong God long laikim na tingim em tru i as na em i ken hambak o ting em i gutpela samting tru. Aposel Pol i tok: “Long rot bilong bikpela pasin helpim God i bin mekim long mi, mi tok long olgeta man wan wan i stap namel long yupela, yu no ken ting yu nambawan tru. Tasol yupela i mas wokim tingting long pasin i soim olsem yupela i gat gutpela tingting, na yupela wan wan i mas mekim olsem inap long mak bilong bilip em God i bin givim yupela.” (Rom 12:3) Narapela Baibel i tanim dispela ves olsem: “Mi laik tokim yupela olgeta long yupela i no ken ting yupela i samting tru, yupela i mas skelim gut yupela yet na kisim stretpela tingting.” (A Translation in the Language of the People, em Charles B. Williams i wokim) Yumi amamas long Papa bilong yumi long  heven i save laikim tru yumi, tasol yumi mas bihainim stretpela tingting na tingim olsem pasin bilong yumi i no mekim na God i mas laikim tru yumi, nogat.​—Luk 17:10.

21. Oltaim yumi mas wok long sakim wanem ol tok giaman bilong Satan? Yumi mas wok long strongim bel bilong yumi long rot bilong wanem tok i tru bilong Baibel?

²¹ Gutpela sapos yumi olgeta i mekim olgeta samting yumi inap mekim bilong sakim olgeta tok giaman bilong Satan, kain olsem dispela tok, yumi samting nating o ol narapela i no inap laikim yumi. Sapos ol samting long laip bilong yu i bin givim tingting long yu olsem yu nogut pinis na God i no inap tru long laikim yu, o ol gutpela wok yu mekim i samting nating na God i no lukim, maski em inap lukim olgeta samting, o ol sin bilong yu i bikpela tumas na i dai bilong gutpela Pikinini bilong em i no inap tekewe ol dispela sin, orait dispela tingting i giaman tru. Sakim tru ol dispela tok giaman! Yumi mas wok long strongim bel bilong yumi long rot bilong wanpela tok i tru em Pol i raitim: “Mi bilip tru olsem dai, laip, ol ensel, ol gavman, ol samting nau i stap, ol samting bai kamap bihain, ol samting i gat strong, ol samting bilong antap, ol samting bilong daunbilo, na ol arapela samting God i bin wokim, olgeta dispela samting i no inap tekewe yumi long pasin laikim bilong God, em dispela pasin i stap long Krais Jisas, Bikpela bilong yumi.”​—Rom 8:38, 39.