1, 2. Bilong wanem yumi ken tok King Devit i save long olsem wanem man i pilim taim narapela i no stap gut long em?

 KING DEVIT i save man i pilim olsem wanem taim narapela i no stap gut long em. Wok king bilong em i gat planti hevi, wanpela taim ol wantok bilong em i painim rot bilong rausim em. Na tu, sampela man em yumi ting ol i gutpela pren bilong em, ol i givim baksait long em. Tingim Mikal, namba wan meri bilong Devit. Pastaim, em i “laikim tumas Devit,” na ating em i strongim Devit long mekim wok king bilong em. Tasol bihain, em i “bel nogut long Devit,” na em i ting Devit “i mekim pasin olsem wanpela longlong man!”​—1 Samuel 18:20; 2 Samuel 6:16, 20.

² Na edvaisa bilong Devit, em Ahitofel. Ol man i ting tok bilong em i olsem tok Jehova yet i autim. (2 Samuel 16:23) Tasol bihain, dispela man Devit i bin bilip long em, em i no stap gut moa long Devit na em i joinim ol man i bikhet long Devit. Na husat i kirapim ol man long insait long wok bilong rausim Devit? Em Apsalom, pikinini man bilong Devit yet! Dispela man i gat tingting nogut em i “pulim tingting bilong ol man Israel long laikim em,” em i laik kisim ples bilong king. Dispela pasin bikhet i kamap bikpela tru, olsem na King Devit i mas ranawe, nogut ol man i kilim em i dai.​—2 Samuel 15:1-6, 12-17.

3. Devit i save long wanem samting?

³ Olsem wanem? I no gat wanpela man i stap gut long Devit? Taim em i karim ol hevi bilong em, Devit i save i gat wanpela man i stap gut long em. Em husat? Em Jehova God tasol. Devit i tok long Jehova olsem: “Man i save stap gut long narapela, yu save stap gut long em.” (2 Samuel 22:26) Pasin bilong stap gut long narapela em wanem samting, na olsem wanem Jehova i stap olsem nambawan gutpela piksa long dispela pasin?

4, 5. (a) Pasin bilong “stap gut long narapela” em wanem samting? (b) Yumi inap bilip long ol samting i no gat laip bai mekim wok bilong ol, tasol olsem wanem dispela i narapela kain long pasin bilong stap gut long narapela?

⁴ Dispela tok “stap gut long narapela” olsem i stap long Ol Skripsa Hibru, em i makim pasin bilong laikim tru na givim bel long wanpela samting na i stap olsem i go inap long taim dispela samting i mekim pinis wok bilong en. Man i stap gut long narapela i gat pasin laikim. a Man bilong raitim song i tok long mun, “olsem wanpela witnes i stap gut long wok bilong em long skai,” mun i save kamap long olgeta nait. (Buk Song 89:37, Futnot) Olsem na yumi inap bilip long mun bai mekim wok bilong en. Tasol mun i no inap stap gut long narapela olsem man inap mekim. Bilong wanem? Long wanem, pasin bilong man long stap gut long narapela i kamapim pasin laikim bilong em—ol samting i no gat laip i no inap mekim dispela samting.

⁵ Long Baibel, pasin bilong stap gut long narapela em pasin bilong mekim gut long man. Man i stap gut long narapela i kamapim olsem em i pas gut wantaim man em i stap gut long em. Dispela pasin bilong stap gut long narapela i no samting man i  mekim long sampela taim na long narapela taim, nogat. Em i no olsem biksi bilong solwara em win i sakim nabaut. Pasin bilong stap gut long narapela o gutpela pasin laikim i gat bikpela strong na em inap stap yet maski bikpela hevi i kamap.

6. (a) Olsem wanem long pasin bilong stap gut long narapela? Baibel i tok wanem long dispela samting? (b) Wanem rot i nambawan gutpela rot bilong kisim save long pasin bilong stap gut long narapela? Bilong wanem yu tok olsem?

⁶ Tru, i no gat planti man long nau i gat kain pasin bilong stap gut long narapela. Planti taim, ol pren “i redi long bagarapim narapela narapela.” Na yumi harim planti stori long ol man na meri marit i lusim poroman marit bilong ol. (Provep 18:24; Malakai 2:14-16) Pasin bilong mekim nogut long narapela i bikpela tru, olsem na ating yumi mekim wankain tok olsem profet Maika: “Man i gat pasin bilong stap gut long narapela, em i no stap moa long graun.” (Maika 7:2) Maski planti man i no save kamapim pasin bilong i stap gut long narapela, dispela gutpela pasin em i wanpela bikpela pasin bilong Jehova. Nambawan gutpela rot bilong kisim save long pasin bilong stap gut long narapela, em yumi ken skelim olsem wanem Jehova i kamapim dispela gutpela pasin em wanpela hap bilong pasin laikim.

7, 8. Olsem wanem yumi ken tok Jehova wanpela tasol i save stap gut long narapela?

⁷ Baibel i tok long Jehova olsem: “Yu wanpela tasol yu save stap gut long ol manmeri bilong yu!” (Revelesen 15:4) Olsem wanem dispela tok i stret? Sampela man na ol ensel i bin stap gut long God. (Jop 1:1; Revelesen 4:8) Na olsem wanem long Jisas Krais? Em i nambawan “man i stap gut long [God],” a? (Buk Song 16:10) Orait olsem wanem yumi ken tok Jehova wanpela tasol i save stap gut long narapela?

⁸ Pastaim yumi mas tingim olsem pasin bilong stap gut long narapela em i wanpela hap bilong pasin laikim. “God em i pasin laikim”—em i makim tru dispela pasin—olsem na i no gat narapela man inap kamapim gut pasin bilong stap gut long narapela olsem Jehova. (1 Jon 4:8) Tru, ol ensel na ol man inap kamapim ol pasin bilong God, tasol Jehova em i nambawan piksa tru bilong i  stap gut long narapela. Jehova em i “Man Bilong Bipo Bipo Yet,” na em i bin kamapim pasin bilong i stap gut long narapela inap longtaim tru, winim olgeta lain long heven na graun. (Daniel 7:9) Olsem na Jehova i stap gutpela piksa tru long pasin bilong i stap gut long narapela. Em i kamapim dispela pasin long rot em ol narapela man i no inap kamapim. Tingim sampela rot olsem.

9. Olsem wanem Jehova i “stap gut long olgeta wok em i mekim”?

⁹ Jehova “i save stap gut long olgeta wok em i mekim.” (Buk Song 145:17) Olsem wanem em i mekim olsem? Buk Song 136 i bekim dispela askim. Dispela song i kamapim planti stori long Jehova i bin kisim bek ol man, olsem taim em i kisim bek lain Israel long Solwara Retsi. Long pinis bilong olgeta ves bilong dispela song i gat tok: “Gutpela pasin laikim bilong em i save stap oltaim oltaim.” Dispela song i stap tu long hap bilong “ Ol Askim Bilong Skelim Long Bel” long pes 289. Taim yu ritim ol dispela ves, bai yu kirap nogut long planti rot we Jehova i bin mekim gutpela pasin laikim long lain bilong em. Yes, Jehova i harim krai bilong ol gutpela wokman bilong em taim ol i laik kisim helpim na em i mekim ol samting long taim stret, na long dispela rot em i kamapim pasin bilong stap gut long narapela. (Buk Song 34:6) Jehova bai mekim gutpela pasin laikim long ol wokman bilong em sapos ol i stap gut long em.

10. Olsem wanem Jehova i soim olsem em i stap gut long ol lo bilong em?

¹⁰ Na tu, Jehova i stap gut long ol wokman bilong em long rot bilong bihainim ol lo bilong em. Jehova i no olsem sampela man em tingting bilong ol i save senis senis, na ol i larim bel na tingting nating i stiaim ol. Tingting bilong Jehova long wanem samting i stret na wanem samting i no stret i no save senis. Kirap long bipo yet na i kam inap nau, tingting bilong em long wok bilong ol spirit nogut, lotuim ol god giaman, na kilim man i dai, i no senis. Long rot bilong profet Aisaia em i tok: “I go inap yupela i kamap lapun, mi bai stap wankain tasol.” (Aisaia 46:4) Olsem na yumi ken bilip tru olsem pasin bilong bihainim ol lo bilong stretpela pasin i stap long Baibel em bai helpim tru yumi.​—Aisaia 48:17-19.

11. Olsem wanem yumi save Jehova i save inapim ol tok promis bilong em?

¹¹ Jehova i soim tu pasin bilong stap gut long narapela long rot bilong inapim ol tok promis bilong em. Taim em i tok profet long  wanpela samting, dispela i save kamap tru. Jehova i tok: “Tok i lusim maus bilong mi bai . . . i no inap kam bek nating long mi, nogat, em bai kamapim wanem wanem samting mi gat laik long mekim, na em bai mekim tru olgeta samting olsem mi salim em long mekim.” (Aisaia 55:11) Jehova i save truim tok bilong em, na long dispela rot em i stap gut long lain bilong em. Jehova i no mekim na ol i mas tingting planti na wet nating long ol samting em i no gat tingting long kamapim. Jehova i gat gutpela nem tru long pasin bilong truim tok bilong em, olsem na wokman bilong em Josua i tok: “Jehova i truim olgeta promis em i bin mekim long ol Israel na i no gat wanpela promis bilong em i popaia; olgeta i kamap tru.” (Josua 21:45) Olsem na yumi save tru olsem bai yumi no inap bel hevi, long wanem, Jehova i save inapim ol tok promis bilong em.​—Aisaia 49:23; Rom 5:5.

12, 13. Long wanem ol rot gutpela pasin laikim bilong Jehova i stap oltaim oltaim?

¹² Olsem yumi stori pinis, Baibel i tok gutpela pasin laikim bilong Jehova “i save stap oltaim oltaim.” (Buk Song 136:1) Olsem wanem i olsem? Wanpela samting em Jehova i save lusim tru ol rong bilong man. Olsem yumi skelim pinis long Sapta 26, taim Jehova i lusim pinis wanpela rong, em i no save kamapim gen dispela samting long bihain. “Olgeta man i bin mekim sin na ol i sot long kamapim ol gutpela pasin bilong God,” olsem na yumi olgeta i mas amamas tru long gutpela pasin laikim bilong Jehova i save stap inap oltaim oltaim.​—Rom 3:23.

¹³ Tasol gutpela pasin laikim bilong Jehova bai stap oltaim long wanpela narapela rot tu. Baibel i tok, ol stretpela man “i olsem diwai ol i planim klostu long wara, em i save karim kaikai long taim stret bilong em, na ol lip bilong em i no save drai. Na olgeta samting em i mekim i save kamap gutpela.” (Buk Song 1:3) Tingim wanpela gutpela diwai em lip bilong em i no save drai! Olsem tasol, sapos yumi amamas tru long Tok Bilong God, i stap bilong yumi bai i gat bel isi long en, ol gutpela samting bai kamap, na bai yumi stap longpela taim. Ol blesing Jehova i save givim long ol wokman i stap gut long em, ol i no inap pinis. Tru tumas, long nupela taim i gat stretpela pasin em Jehova bai kamapim, ol man i bihainim tok ol bai pilim gutpela pasin laikim bilong em inap oltaim oltaim.​—Revelesen 21:3, 4.

14. Olsem wanem Jehova i soim olsem em i amamas long pasin bilong ol wokman bilong em long stap gut long em?

¹⁴ Planti taim tru Jehova i bin kamapim pasin bilong em long stap gut long narapela. Ol pasin bilong Jehova i no save senis liklik, olsem na pasin bilong em long stap gut long ol gutpela wokman bilong em i no inap pinis. Man bilong raitim song i tok: “Bipo mi yangpela na nau mi lapun pinis, tasol mi no bin lukim God i givim baksait long stretpela man, na mi no bin lukim ol pikinini bilong em i sot long kaikai. Jehova i save laikim stretpela pasin, na em bai i no inap givim baksait long ol man i stap gut long em.” (Buk Song 37:25, 28) I stret yumi mas lotuim Jehova, long wanem, em i Man Bilong Wokim olgeta samting. (Revelesen 4:11) Tasol Jehova i gat pasin bilong stap gut long narapela, olsem na em i tingim tru ol gutpela wok yumi mekim.​—Malakai 3:16, 17.

15. Stori long olsem wanem pasin Jehova i mekim long lain Israel i kamapim klia pasin bilong em long stap gut long narapela.

¹⁵ Gutpela pasin laikim bilong Jehova i mekim na em i save helpim lain bilong em taim hevi i painim ol. Man bilong raitim song i tok: “Em i save lukautim ol man i save stap gut long em; em i save kisim bek ol long han bilong ol man nogut.” (Buk Song 97:10) Tingim pasin em i mekim long lain Israel. Bihain long ol i abrusim bagarap long Solwara Retsi, ol Israel i singsing long Jehova: “Yu mekim gutpela pasin laikim long ol manmeri yu bin kisim bek na yu bringim ol i go.” (Kisim Bek 15:13) Pasin bilong Jehova long kisim bek ol long Solwara Retsi i kamapim gutpela pasin laikim bilong Jehova. Olsem na Moses i tokim ol Israel: “Yupela i no bikpela lain manmeri winim ol arapela lain na Jehova i laikim yupela na makim yupela. Nogat. Yupela i liklik lain tru namel long olgeta lain manmeri. Tasol Jehova i laikim yupela tumas na em i bihainim dispela tok tru antap em i bin mekim long ol tumbuna papa bilong yupela, olsem na long strongpela han bilong Jehova, em i kisim yupela na bringim yupela i kam. Em i mekim olsem bilong kisim bek yupela long ples yupela i bin stap sleiv aninit long strong bilong Fero, king bilong Isip.”​—Lo 7:7, 8.

16, 17. (a) Lain Israel i no pilim wanem samting? Olsem wanem Jehova i soim olsem em i sori long ol? (b) Planti Israel i mekim wanem bilong soim olsem “ol i no gat rot bilong kamap orait”? Dispela i givim wanem tok lukaut long yumi?

 ¹⁶ Lain Israel i no soim olsem ol i pilim gutpela pasin laikim bilong Jehova. Bihain long Jehova i kisim bek ol, “ol i wok long mekim sin long [Jehova]” na ol i “bikhet long God Antap Tru.” (Buk Song 78:17) Insait long planti handet yia, ol i bikhet planti taim, ol i givim baksait long Jehova na lotuim ol god giaman na insait long ol pasin haiden em ol dispela samting i mekim na ol i kamap doti. Tasol Jehova i no brukim kontrak bilong em wantaim lain Israel. Nogat. Long rot bilong profet Jeremaia, Jehova i kirapim lain bilong em: “Bikhet Israel, yu mas kam bek,”. . . Mi no ken belhat moa long yu, long wanem, mi save stap gut long narapela.” (Jeremaia 3:12) Olsem Sapta 25 i stori pinis long en, planti Israel i no laik senisim pasin bilong ol. Tru tumas, “ol i wok long tok bilas long ol man i bringim tok bilong God tru i go long ol, na ol i no laikim tru tok bilong God na ol i rabisim ol profet bilong em.” Wanem samting i kamap? Bihain, “belhat bilong Jehova i kamap long ol manmeri bilong em, na i go inap long ol i no gat rot bilong kamap orait.”​—2 Stori 36:15, 16.

¹⁷ Dispela i lainim yumi olsem: Pasin bilong Jehova long stap gut long narapela i no mekim na em i no luksave long pasin tru bilong man o bilip nating long em. Tru, Jehova i “pulap tru long gutpela pasin laikim” na em i amamas long marimari long man taim i gat as bilong mekim olsem. Tasol Jehova i save mekim wanem taim man i mekim rong i no laik senisim pasin nogut bilong em? Long kain taim olsem, Jehova i bihainim ol stretpela lo bilong em na mekim save long man. Olsem Moses i tok, Jehova “bai mekim save long ol man i gat asua.”​—Kisim Bek 34:6, 7.

18, 19. (a) Taim Jehova i givim strafe long ol man nogut, bilong wanem dispela tu i kamapim pasin bilong em long stap gut long narapela? (b) Olsem wanem Jehova bai kamapim pasin bilong em long stap gut long ol wokman bilong em, em ol man i bin birua na kilim ol i dai?

¹⁸ Taim God i givim strafe long ol man nogut, dispela tu i kamapim pasin bilong em long stap gut long narapela. Olsem wanem yumi tok olsem? Yumi ken tingim tok Jehova i givim long sevenpela ensel long Buk Revelesen, em i tok: “Yupela i mas kisim  dispela 7-pela dis i gat belhat bilong God long en na go kapsaitim long graun.” Taim namba 3 ensel i kapsaitim dis bilong em “long ol wara na ol hulwara,” ol i tanim kamap blut. Orait, ensel i tokim Jehova: “Yu Man husat i stap nau na husat i stap bipo, yu dispela Man i save stap gut long ol manmeri bilong yu, yu save bihainim stretpela pasin, olsem na yu bin tok orait long ol dispela samting i mas kamap. Long wanem, ol i kapsaitim blut bilong ol manmeri holi na ol profet, na yu bin givim blut long ol long dringim; olsem na i stret ol dispela samting i kamap long ol.”​—Revelesen 16:1-6.

¹⁹ Taim ensel i mekim dispela toksave long kot bai painim ol man, ensel i tok long Jehova olsem em i “dispela Man i save stap gut long” ol manmeri bilong em. Bilong wanem em i tok olsem? Long wanem, taim Jehova i bagarapim ol man nogut, em i soim olsem em i stap gut long ol wokman bilong em, em ol man i bin birua long planti bilong ol na kilim ol i dai. Ol dispela man i stap long tingting bilong Jehova. Em i gat bikpela laik tru long lukim gen ol dispela man i bin stap gut long em, na Baibel i tok em i tingting pinis long givim gutpela pe long ol, em kirap bek. (Jop 14:14, 15) Tasol maski sampela gutpela wokman bilong Jehova i dai pinis, em i no lusim tingting long ol. Nogat. “Long tingting bilong em olgeta i stap laip.” (Luk 20:37, 38) Jehova i tingting pinis long kirapim bek ol man i stap long tingting bilong em, na  dispela i wanpela bikpela samting i kamapim klia pasin bilong em long stap gut long narapela.

20. Ol “sospen bilong kisim marimari” ol i husat? Olsem wanem Jehova i stap gut long ol?

²⁰ Kirap long bipo yet i kam inap long nau, Jehova i bin stap gut long ol man i stap gut long em. Inap planti tausen yia, Jehova “i no les kwik long ol sospen bilong kisim pe nogut, em ol i bilong kisim bagarap.” Bilong wanem em i mekim olsem? “Em i bin mekim olsem bilong kamapim klia bikpela glori bilong em long ol sospen bilong kisim marimari, em ol sospen em i bin redim bipo yet bilong kisim glori.” (Rom 9:22, 23) Ol “sospen bilong kisim marimari” em ol Kristen i gat gutpela bel na God i bin makim ol long holi spirit long mekim wok king wantaim Krais long Kingdom bilong em. (Matyu 19:28) Taim Jehova i opim rot long ol dispela  sospen bilong kisim marimari i ken abrusim bagarap, Jehova i stap gut long Abraham, em i bin givim dispela tok promis long em: “Long rot bilong pikinini bilong yu olgeta lain bilong graun bai kisim blesing, long wanem, yu bin bihainim tok bilong mi.”​—Stat 22:18.

21. (a) Olsem wanem Jehova i soim olsem em i stap gut long “bikpela lain manmeri” em ol inap winim taim bilong “traipela hevi tru”? (b) Pasin bilong Jehova long stap gut long narapela i kirapim yu long mekim wanem?

²¹ Jehova i stap gut tu long “bikpela lain manmeri” em ol inap winim taim bilong “traipela hevi tru” na stap oltaim long Paradais long graun. (Revelesen 7:9, 10, 14) Maski ol wokman bilong Jehova i no gutpela olgeta, em i stap gut long ol na opim rot long ol i ken stap oltaim long Paradais long graun. Em i mekim olsem wanem? Long rot bilong pe bilong baim bek man—em i nambawan bikpela samting Jehova i mekim bilong soim pasin bilong em long stap gut long narapela. (Jon 3:16; Rom 5:8) Pasin bilong Jehova long stap gut long narapela i kirapim ol man em bel bilong ol i laikim tru stretpela pasin. (Jeremaia 31:3) Jehova i bin stap gut long lain bilong em na em bai stap olsem long bihain tu, ating dispela i mekim na yu pilim olsem yu stap klostu moa long em, a? Yumi gat laik long go klostu long God, olsem na yumi mas pilim pasin laikim bilong em na strongim tingting bilong yumi long stap gut long em na mekim wok bilong em.