1, 2. Wanem kain bagarap inap painim lain Israel taim ol i kam long hap bilong Sainai long 1513 B.C.E.? Jehova i tok wanem bilong strongim ol?

 BAGARAP inap painim lain Israel taim ol i kam long hap bilong Sainai long kirap bilong 1513 B.C.E. Ol i mas wokabaut long wanpela hap ol i pret long en, em i “bikpela ples nating i narakain tru we i gat ol posin snek na ol skopion.” (Lo 8:15) Na ol lain man i birua long ol inap kam pait long ol. Jehova i bin mekim na lain bilong em i bungim dispela hevi. Em i God bilong ol, olsem na yu ting em inap lukautim ol na bagarap i no ken painim ol?

² Jehova i mekim gutpela tok bilong strongim ol: “Yupela yet i bin lukim ol samting mi mekim long ol Isip. Na long olsem wanem mi bin kisim yupela i kam olsem tarangau i karim ol pikinini bilong en long wing bilong en.” (Kisim Bek 19:4) Jehova i kirapim lain bilong em long tingim olsem em i bin kisim bek ol long Isip, i olsem em i mekim wok long ol tarangau bilong karim ol i go long ples ol i ken stap gut long en. Tasol i gat ol narapela as na “wing bilong [tarangau]” i gutpela tok piksa bilong makim pasin bilong God long lukautim lain bilong em.

3. Bilong wanem “wing bilong [tarangau]” i gutpela tok piksa bilong makim pasin bilong God long lukautim ol man?

³ Tarangau i no save mekim wok long bikpela na strongpela wing bilong em bilong flai tasol. Nogat. Long taim san i hat tru, mama tarangau i save taitim tupela wing bilong em na wokim olsem ambrela—tupela wing i op wantaim i olsem 2 mita—bilong kamapim ples hait ol liklik pikinini bilong em i ken hait aninit long en long bikpela san. Long ol narapela taim em i save karamapim ol pikinini long tupela wing bilong em bilong lukautim ol na ol i no pilim kolwin. Olsem tarangau i save lukautim ol pikinini bilong em, Jehova tu i bin banisim na lukautim lain Israel i no strong yet. Long ples nating, lain bilong Jehova inap i go  yet long em na hait aninit long strongpela wing bilong em, sapos ol i stap gut long em. (Lo 32:9-11; Buk Song 36:7) Tasol olsem wanem? I stret long yumi ken ting God bai lukautim yumi long nau?

4, 5. Bilong wanem yumi ken bilip tru long tok promis bilong God long lukautim man?

⁴ Jehova inap tru long lukautim ol wokman bilong em. Em i “God i Gat Olgeta Strong”—dispela biknem i makim olsem em i gat bikpela strong. (Stat 17:1) I no gat wanpela samting inap sakim strong bilong Jehova, olsem man i no inap sakim haiwara long kam. Em inap mekim olgeta samting em i gat laik long mekim, olsem na yumi ken mekim dispela askim: ‘Em laik bilong Jehova long yusim strong bilong em long lukautim lain bilong em?’

⁵ Bekim bilong dispela askim, em yes! Jehova i tok promis olsem em bai lukautim lain bilong em. Buk Song 46:1 i tok: “God em i ples hait bilong yumi na em i save strongim yumi. Long taim hevi i painim yumi, em i save redi long helpim yumi.” God “i no inap giaman,” olsem na yumi ken bilip tru long tok promis bilong em long lukautim yumi. (Taitus 1:2) Nau yumi ken skelim sampela tok piksa Jehova i save mekim wok long en bilong stori long pasin bilong em long lukautim lain bilong em.

6, 7. (a) Long taim bilong ol man i bin raitim Baibel wasman i mekim wanem bilong lukautim ol sipsip bilong em? (b) Baibel i mekim wanem tok piksa bilong soim bikpela laik bilong Jehova long lukautim gut ol sipsip bilong em?

⁶ Jehova em i Wasman bilong yumi, na “yumi lain manmeri bilong em na yumi olsem ol sipsip em i save lukautim.” (Buk Song 23:1; 100:3) Planti animal inap lukautim ol yet, tasol ol sipsip i no inap mekim. Wasman bilong sipsip long taim bilong ol man i bin raitim Baibel em i mas i gat strongpela bel bilong lukautim ol sipsip long ol laion, wulf, bea, na ol stilman tu. (1 Samuel 17:34, 35; Jon 10:12, 13) Tasol sampela taim wasman i mas mekim gutpela pasin isi bilong lukautim ol sipsip. Taim sipsip i stap  longwe long lain sipsip na karim pikinini, wasman i was long mama long dispela taim we em i no inap lukautim em yet, na bihain wasman i apim dispela pikinini sipsip i no gat strong na karim i go long lain sipsip.

⁷ Taim Jehova i tok em i olsem wasman bilong sipsip, em i strongim yumi long bilip olsem em i gat laik tru long lukautim yumi. (Esekiel 34:11-16) Tingim tok Aisaia 40:11 i mekim long Jehova, em Sapta 2 bilong dispela buk i stori long en. Em i tok: “Olsem wanpela wasman bilong sipsip, em bai lukautim gut ol sipsip bilong em. Em bai bungim ol pikinini sipsip long han bilong em, na em bai karim ol long bros bilong em.” Olsem wanem liklik sipsip inap i stap long “bros” bilong wasman—olsem insait long klos bilong em klostu long bros? Ating sipsip i kam klostu long wasman na subim lek bilong em liklik. Tasol wasman yet i mas lindaun na apim pikinini sipsip long pasin isi na putim em gut long bros bilong em. Dispela i makim gut laik bilong Bikpela Wasman bilong yumi long banisim na lukautim yumi!

8. (a) God i tok promis long lukautim husat? Olsem wanem Provep 18:10 i kamapim dispela samting? (b) Yumi mas mekim wanem na bai nem bilong God i ken lukautim yumi?

⁸ Bilong God i ken truim tok promis bilong em long lukautim ol man, ol i mas mekim sampela samting—ol i mas i go klostu long em. Provep 18:10 i tok: “Nem bilong Jehova i olsem wanpela strongpela taua. Ol stretpela man i save ron i go insait long en na em i banisim ol.” Long taim bilong ol man i bin raitim Baibel, sampela taim ol man i wokim ol taua long ples nating bilong ol man i ken stap long en na ol i no kisim bagarap. Tasol man em bagarap i laik painim em, em wok bilong em yet long ran i go long kain taua olsem bilong em i ken stap gut. I wankain liklik long man i laik painim ples hait long nem bilong God. Tasol yumi no ken kolim tasol planti taim nem bilong God; dispela nem yet i no wanpela samting i wokim nating ol mirakel. Nogat. Yumi mas save na bilip long Man i gat dispela nem na bihainim pasin i stret wantaim ol stretpela lo bilong em. Jehova i mekim gutpela pasin tru na tokim yumi olsem sapos yumi bilip long em na askim em long helpim yumi, em bai stap olsem taua bilong lukautim yumi!

9. Jehova i tok promis long lukautim ol man, tasol em i bin mekim wanem samting moa?

⁹ Jehova i no tok promis tasol long lukautim ol man, em i mekim sampela samting moa. Long taim bilong ol man i bin raitim Baibel, em i wokim ol mirakel i soim olsem em inap long lukautim lain bilong em. Long taim bilong lain Israel, planti taim Jehova i yusim strongpela “han” bilong em long lukautim ol na ol birua i no inap bagarapim ol. (Kisim Bek 7:4) Tasol Jehova i yusim tu strong bilong em long lukautim wan wan man.

10, 11. Wanem ol stori bilong Baibel i soim olsem wanem Jehova i yusim strong bilong em long lukautim ol man wan wan?

¹⁰ Taim tripela yangpela Hibru—Satrak, Mesak na Abetnego—i no laik brukim skru long imis gol bilong King Nebukatnesar, king i kros nogut tru na i tok em bai tromoi ol i go insait long bikpela paia i hat nogut tru. Nebukatnesar i strongpela king tru i winim olgeta narapela king long graun, na em i tok bilas olsem: “Wanem god inap kisim bek yupela long han bilong mi?” (Daniel 3:15) Dispela tripela yangpela man i bilip tru long strong bilong God long lukautim ol, tasol ol i no gat tingting olsem em i mas mekim dispela samting. Olsem na ol i tok: “Sapos dispela samting i mas kamap, God bilong mipela em mipela i lotuim inap kisim bek mipela.” (Daniel 3:17) Tru tumas, maski ol i hatim dispela bikpela paia i hat nogut tru inap 7-pela taim moa, winim hat bilong paia long pastaim, dispela i no pasim God i gat olgeta strong. Em i lukautim ol dispela Hibru, na king i mas tokaut olsem: “I no gat narapela god we inap kisim bek man olsem dispela God.”​—Daniel 3:29.

¹¹ Jehova i kamapim klia strong bilong em long lukautim man taim em i putim laip bilong dispela wanpela Pikinini bilong em i go long bel bilong Maria em wanpela meri Juda husat i no bin slip wantaim man. Wanpela ensel i tokim Maria olsem em “bai gat bel na [em] bai karim wanpela pikinini man.” Ensel i tok: “Holi spirit bai i kam i stap long yu, na strong bilong God Antap Tru bai karamapim yu.” (Luk 1:31, 35) Long dispela taim i luk olsem ol samting inap bagarapim Pikinini Bilong God. Mama i gat sin na i no gutpela olgeta, yu ting dispela inap mekim na pikinini  i kisim sin? Satan inap bagarapim o kilim i dai dispela Pikinini paslain long mama i karim em? Nogat tru! I olsem Jehova i kamapim wanpela banis i raunim Maria na bai i no gat wanpela samting—olsem sin, ol samting nogut, man i laik kilim i dai pikinini, o spirit nogut—inap nogutim pikinini kirap long taim em i wok long kamap long bel. Jehova i wok yet long lukautim Jisas taim em i yangpela. (Matyu 2:1-15) I go inap long taim God i makim, i no gat wanpela man inap bagarapim gutpela Pikinini bilong em.

12. Long taim bilong ol man i bin raitim Baibel, bilong wanem Jehova i lukautim sampela man long rot bilong mirakel?

¹² Bilong wanem Jehova i lukautim sampela man long rot bilong mirakel? Planti taim Jehova i lukautim ol man, long wanem, em i tingim wanpela samting i bikpela samting tru: em wok bilong inapim ol samting em i tingting pinis long mekim. Olsem: Em i bikpela samting long bebi Jisas i mas i stap laip na bai em inap kamapim ol samting God i tingting pinis long mekim, em dispela samting bai helpim olgeta lain manmeri long bihain. Baibel i gat planti stori long God i mekim wok long strong bilong em long lukautim ol man, em ol stori “ol i bin raitim bilong skulim yumi. Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” (Rom 15:4) Yes, ol dispela stori i strongim yumi long bilip long God bilong yumi i gat olgeta strong. Tasol God bai lukautim yumi olsem wanem long nau?

13. Yu ting Jehova i mas wokim mirakel bilong helpim yumi? Stori long dispela.

¹³ Tok promis bilong God long lukautim man i no makim olsem Jehova i mas wokim ol mirakel bilong helpim yumi. God bilong yumi i no tok promis olsem laip bilong yumi long dispela taim bai no gat ol hevi bilong en. Planti wokman bilong Jehova i stap gut long em ol i karim ol bikpela hevi, olsem ol i stap rabis, ol i stap long hap i gat woa, ol i kisim sik, o dai. Jisas i tokim ol disaipel bilong em olsem bilip bilong ol inap mekim na ol man i kilim ol i dai. Olsem na Jisas i tok em i bikpela samting long ol  i mas sanap strong i go inap long pinis. (Matyu 24:9,13) Sapos olgeta taim Jehova i wokim mirakel bilong lukautim ol wokman bilong em na bagarap i no painim ol, Satan inap sutim tok long Jehova olsem yumi tingim yumi yet tasol na givim bel olgeta long God.​—Jop 1:9, 10.

14. Wanem ol stori i soim olsem Jehova i no save lukautim olgeta wokman bilong em long wankain pasin?

¹⁴ Long taim bilong ol man i bin raitim Baibel, Jehova i no yusim strong bilong em long lukautim olgeta wan wan wokman bilong em na ol i no ken i dai, nogat. Olsem: Herot i kilim i dai aposel Jems long 44 C.E. samting; tasol bihain liklik, ensel i kisim bek Pita “long han bilong Herot.” (Aposel 12:1-11) Na Jon, brata bilong Jems, i stap laip longpela taim, winim Pita na Jems. Em nau, yumi no ken ting God i mas lukautim olgeta wokman bilong em long wankain pasin. Na tu, “taim nogut na ol samting we man i no ting inap kamap” i save painim yumi olgeta. (Eklisiastis 9:11) Orait, olsem wanem Jehova i save lukautim yumi long nau?

15, 16. (a) Wanem samting i soim olsem Jehova i bin lukautim lain i lotuim em na dispela lain i no bagarap? (b) Bilong wanem yumi ken bilip tru olsem Jehova bai lukautim ol wokman bilong em long nau na long taim bilong “traipela hevi tru”?

¹⁵ Pastaim, tingim pasin bilong Jehova long lukautim yumi. Yumi save lotuim Jehova, olsem na yumi save em bai lukautim yumi olsem wanpela lain na dispela lain i no ken bagarap. Sapos em i no mekim olsem, em bai isi long Satan long bagarapim lain bilong yumi. Tingim dispela: Satan, em i “hetman bilong dispela graun” na em bai amamas tru long pinisim lotu i tru. (Jon 12:31; Revelesen 12:17) Sampela strongpela gavman bilong dispela graun i bin tambuim wok bilong yumi long autim tok na ol i bin traim long pinisim lain bilong yumi olgeta. Tasol lain bilong Jehova i bin sanap strong na ol i no bin lusim wok autim tok! Bilong wanem ol strongpela kantri i no inap pasim wok bilong dispela liklik lain Kristen i luk olsem ol i no gat helpim bilong lukautim ol? Long wanem, Jehova i bin lukautim yumi long strongpela wing bilong em!​—Buk Song 17:7, 8.

 ¹⁶ God bai lukautim yumi na bagarap i no inap painim yumi long taim bilong “traipela hevi tru” bai kamap bihain? Yumi no gat wok long pret long strafe God bai givim, long wanem, “Jehova i save long rot bilong kisim bek ol man i save givim bel tru long em taim traim i painim ol. Tasol em i makim ol man nogut bilong kisim bagarap long de bilong kot.” (Revelesen 7:14; 2 Pita 2:9) Yumi inap bilip long tupela samting. Namba wan, Jehova bai i no larim ol man i pinisim olgeta wokman bilong em i stap gut long em. Namba tu, ol man i stap gut long em ol bai kisim laip oltaim long nupela taim God bai kamapim—maski God i mas kirapim bek ol bilong ol i ken kisim dispela laip. Ol man i dai pinis ol i stap long tingting bilong God, em i nambawan gutpela hap bilong i stap long en.​—Jon 5:28, 29.

17. Olsem wanem Jehova i lukautim yumi long rot bilong Tok bilong em?

¹⁷ Long nau tu Jehova i save lukautim yumi long rot bilong “tok” bilong em, dispela tok i gat strong long mekim gut bel bilong ol man na kirapim ol long senisim pasin bilong ol. (Hibru 4:12) Pasin bilong bihainim ol stiatok bilong Baibel bai helpim yumi long abrusim sampela bagarap. Aisaia 48:17 i tok: “Mi Jehova, . . . mi save skulim yupela long ol samting we inap helpim yupela.” Tru tumas, pasin bilong bihainim Tok Bilong God inap mekim na yumi no sik planti na yumi ken stap longpela taim. Olsem: Yumi bihainim tok bilong Baibel long abrusim pasin pamuk na rausim olgeta pasin doti na kamap klin, olsem na yumi no insait long ol pasin doti na pasin nogut i save bagarapim laip bilong planti man husat i givim baksait long God. (Aposel 15:29; 2 Korin 7:1) Yumi tenkyu tru long Tok Bilong God i lukautim yumi!

18. Olsem wanem Jehova i lukautim pasin pren bilong yumi wantaim em?

¹⁸ Tasol bikpela samting tru, Jehova i save lukautim pasin pren bilong yumi wantaim em. Em i mekim olsem long rot bilong givim yumi ol samting yumi mas kisim bilong sanap strong long karim ol hevi na sakim ol samting inap bagarapim pasin pren bilong yumi wantaim em. Long dispela rot Jehova i mekim ol samting na bai yumi ken i stap laip inap oltaim oltaim na i no  sampela yia tasol. Tingim sampela samting God i givim yumi na bai yumi ken stap pren bilong em.

19. Olsem wanem spirit bilong Jehova inap helpim yumi long karim wanem wanem traim i painim yumi?

¹⁹ Jehova em i “Man Bilong Harim ol prea.” (Buk Song 65:2) Taim ol hevi bilong laip i laik daunim yumi, pasin bilong kamapim bel bilong yumi long em inap helpim yumi long stap bel isi. (Filipai 4:6, 7) Ating em i no wokim mirakel na rausim hevi bilong yumi, tasol bilong helpim yumi em inap givim savetingting long yumi na bai yumi inap karim hevi. (Jems 1:5, 6) Na tu, Jehova i givim holi spirit long ol man i askim em long en. (Luk 11:13) Dispela strongpela spirit inap helpim yumi long karim wanem wanem traim o hevi inap painim yumi. Em inap givim yumi “strong i winim strong bilong yumi ol man,” bilong yumi ken sanap strong i go inap long taim Jehova i rausim olgeta hevi long nupela taim klostu nau i laik kamap.​—2 Korin 4:7.

20. Olsem wanem Jehova i kamapim strong bilong em long lukautim yumi long rot bilong ol wanbilip?

²⁰ Sampela taim Jehova i kamapim strong bilong em long lukautim yumi long rot bilong ol wanbilip. Jehova i bin mekim lain bilong em i kamap wanpela lain “wanbilip” i stap long olgeta hap. (1 Pita 2:17; Jon 6:44) Insait long dispela lain i gat pasin bilong laikim narapela narapela, na ol i kamapim ples klia  strong bilong holi spirit bilong God long stiaim ol man long mekim gutpela pasin. Dispela spirit i kirapim yumi long mekim ol gutpela pasin, olsem pasin laikim, pasin helpim, na gutpela pasin. (Galesia 5:22, 23) Olsem na taim yumi gat hevi na wanpela wanbilip i laik givim gutpela tok bilong helpim yumi o tok bilong strongim yumi, yumi tenkyu long Jehova long ol dispela gutpela samting i soim olsem em i lukautim yumi.

21. (a) Long rot bilong “gutpela wokboi i gat savetingting,” Jehova i givim wanem ol kaikai bilong strongim bilip bilong yumi long taim stret? (b) Olsem wanem ol samting Jehova i givim bilong lukautim yumi i helpim yu yet?

²¹ Jehova i givim sampela narapela samting bilong lukautim yumi: kaikai, olsem ol samting bilong strongim bilip bilong yumi long taim stret. Bilong helpim yumi long kisim strong long Tok bilong em, Jehova i bin givim wok long “gutpela wokboi i gat savetingting” long givim ol kaikai bilong strongim bilip bilong yumi. Dispela gutpela wokboi i mekim wok long ol buk samting wantaim Wastaua na Kirap! na tu, websait bilong yumi jw.org, na ol miting na kibung bilong givim “kaikai long [yumi] long taim stret”—em i givim ol samting yumi mas kisim na long taim yumi mas kisim. (Matyu 24:45) Sampela taim long miting Kristen yu bin harim wanpela bekim, o tok, o beten i strongim tru bel bilong yu long taim stret? Wanpela stori long nius bilong yumi i bin mekim bikpela samting long laip bilong yu? Tingim, Jehova i givim olgeta dispela samting bilong lukautim yumi.

22. Oltaim Jehova i save yusim strong bilong em long mekim wanem? Olsem wanem dispela i helpim tru yumi?

²² Jehova i stap olsem hap plang bilong pait we “ol man i go long em bilong hait.” (Buk Song 18:30) Yumi save em i no yusim strong bilong em long lukautim yumi long olgeta hevi i save kamap long nau. Tasol oltaim em i save yusim dispela strong bilong kamapim ol samting em i tingting pinis long mekim. Dispela pasin bilong em bai kamapim ol gutpela samting bilong helpim tru lain bilong em. Sapos yumi go klostu long em na stap insait long laikim bilong em, Jehova bai givim yumi gutpela laip i stap inap oltaim oltaim. Taim yumi tingim dispela, yumi inap tru long ting ol hevi bilong nau “ol i bilong sotpela taim na ol i no bikpela tumas.”​—2 Korin 4:17.