1, 2. Yumi ken mekim wanem bilong stap yet insait long pasin laikim bilong God?

 YUMI olgeta i laik stap strong na helti. Olsem na yumi save kisim gutpela kaikai, eksasais long olgeta taim, na lukautim gut bodi. Maski yumi taitim bun long mekim, yumi amamas long gutpela samting i kamap, olsem na yumi no givap. Tasol yumi mas stap strong na helti tu long narapela samting.

² Yumi bin stat gut long kisim save long Jehova, tasol yumi gat wok yet long mekim pasin pren bilong yumi wantaim em i kamap strong moa. Taim Jut i kirapim ol Kristen long “Stap insait yet long pasin laikim bilong God,” em i stori tu long hau ol inap mekim olsem. Em i tokim ol: “Oltaim larim bilip holi bilong yupela i mekim yupela i kamap strong moa yet.” (Jut 20, 21) Olsem wanem yumi inap mekim bilip bilong yumi i kamap strong moa?

3-5. (a) Satan i laik bai yu kisim wanem tingting long ol lo bilong Jehova? (b) Yu pilim olsem wanem long ol lo na stiatok bilong Jehova?

³ Em i bikpela samting long yu yet i mas bilip tru olsem rot Jehova i makim em i bes rot long bihainim. Satan i laik bai yu ting ol lo bilong God i hatwok tumas long bihainim na yu bai stap amamas moa sapos yu yet i makim wanem  samting i stret na wanem samting i no stret. Kirap long gaden Iden na i kam, Satan i bin traim long kirapim ol manmeri long bilipim dispela tingting. (Stat 3:1-6) Na em i wok hat yet long mekim olsem long nau.

⁴ Olsem wanem? Tingting bilong Satan i stret? Yu ting ol lo bilong Jehova i pasim yumi tumas? Nogat. Yumi ken tok piksa olsem, tingim olsem yu wokabaut long wanpela naispela pak. Na yu lukim wanpela banis i antap tru na i blokim wanpela hap eria. Ating yu tingting, ‘Wai na dispela banis i pasim rot bilong mi?’ Tasol long dispela taim stret, yu harim laion i singaut strong long hapsait bilong banis. Bai yu pilim olsem wanem nau long dispela banis? Yu bai amamas olsem dispela banis i lukautim yu na yu no kamap abus bilong laion! Ol stiatok bilong Jehova i olsem dispela banis, na Devil i olsem dispela laion. Baibel i tok lukaut long yumi olsem: “Yupela i mas holimpas gutpela tingting na was i stap! Devil, dispela birua bilong yupela, em i raun olsem wanpela laion i singaut strong na i painim ol man bilong kaikai.”—1 Pita 5:8.

⁵ Jehova i laik bai yumi gat gutpela laip tru. Em i no laik bai Satan i giamanim yumi. Olsem na em i givim yumi ol lo na stiatok bilong banisim yumi na mekim yumi stap amamas. (Efesus 6:11) Jems i tok: “Man husat i save lukluk gut long dispela lo i gutpela olgeta na i mekim man i kamap fri, na em i save mekim long olgeta taim, . . . em bai amamas long samting em i mekim.”—Jems 1:25.

6. Wanem ol samting bai mekim na yumi bilip tru olsem rot Jehova i makim em bes rot long bihainim?

⁶ Taim yumi bihainim ol daireksen bilong Jehova, laip bilong yumi bai kamap gutpela moa na pasin pren bilong yumi wantaim em bai kamap strong moa. Olsem, taim yumi ekseptim invatesen bilong em long beten oltaim long em, dispela i save helpim yumi. (Matyu 6:5-8; 1 Tesalonaika 5:17) Yumi amamas taim yumi bihainim daireksen  bilong em long bung wantaim long lotuim em na strongim narapela narapela, na taim yumi givim bel olgeta long wok bilong autim tok na skulim ol man. (Matyu 28:19, 20; Galesia 6:2; Hibru 10:24, 25) Taim yumi tingim hau ol dispela samting i helpim yumi long strongim bilip bilong yumi, bai yumi bilip tru olsem rot Jehova i makim em bes rot long bihainim.

7, 8. Wanem samting bai helpim yumi na yumi no tingting planti long ol traim we inap painim yumi bihain?

⁷ Ating yumi tingting planti olsem bihain ol hevi bai traim bilip bilong yumi na bai yumi hatwok long winim. Sapos yu pilim olsem, orait tingim tok bilong Jehova: “Mi Jehova, mi God bilong yupela, mi tasol mi save skulim yupela long ol samting we inap helpim yupela, mi tasol mi save stiaim yupela long rot yupela i mas wokabaut long en. Sapos yupela i putim gut yau long ol lo bilong mi, orait bel isi bilong yupela bai kamap olsem wara i save ron na stretpela pasin bilong yupela bai kamap olsem ol weiv bilong solwara.”—Aisaia 48:17, 18.

⁸ Taim yumi bihainim tok bilong Jehova, bel isi bilong  yumi bai kamap olsem wara i save ron na i no inap drai, na stretpela pasin bilong yumi bai kamap olsem weiv bilong solwara i save bruk oltaim long nambis. Maski wanem samting i kamap long laip bilong yumi, yumi inap stap gut long God. Baibel i tok promis olsem: “Olgeta hevi yu karim, yu mas putim long han bilong Jehova, na em bai strongim yu. Em i no inap larim stretpela man i pundaun.”—Buk Song 55:22.

9, 10. Wanem insait bilong dispela tok kamap strong?

⁹ Taim yu wok long strongim pasin pren bilong yu wantaim Jehova, dispela bai helpim yu long “taitim bun na wok yet long kamap strong.” (Hibru 6:1) Wanem insait bilong dispela tok kamap strong?

¹⁰ Yumi no kamap strongpela Kristen bikos yumi winim bikpela krismas, nogat. Bilong kamap strong, yumi mas mekim Jehova i kamap bes Pren bilong yumi na kisim wankain tingting olsem bilong em long ol samting. (Jon 4:23) Pol i tok: “Ol man i bihainim ol laik bilong bodi, ol i tingting long ol samting bilong bodi. Tasol ol man i bihainim laik bilong holi spirit, ol i tingting long ol samting bilong holi spirit.” (Rom 8:5) Strongpela Kristen i no save putim amamas o mani kago i stap namba wan long laip bilong em. Em i save putim tingting long mekim wok bilong Jehova na mekim ol gutpela disisen long laip bilong em. (Provep 27:11; ritim Jems 1:2, 3.) Em i no save larim ol narapela samting i pulim em long mekim rong. Strongpela Kristen i save long wanem samting i stret na em i tingting strong long mekim dispela samting.

11, 12. (a) Pol i tok wanem long save bilong Kristen long “skelim ol samting”? (b) Olsem wanem pasin bilong kamap strongpela Kristen i wankain long pasin bilong kamap spots man?

¹¹ Man i mas taitim bun bilong kamap strongpela Kristen. Aposel Pol i tok: “Strongpela kaikai em bilong ol man  i bikpela pinis. Em ol man i bin yusim save bilong ol planti taim long skelim ol samting na long dispela rot ol i lainim gut tingting bilong ol long kliagut long wanem samting i stret na wanem samting i no stret.” (Hibru 5:14) Dispela tok “lainim” inap mekim yumi tingim samting ol spots man i save mekim.

¹² Taim yumi lukim wanpela hapman bilong spots i pilai, yumi save olsem sampela haptaim i mas lus na em i mas lain gut bambai em inap save gut long pilai spots. Em i no bon olsem wanpela spots man. Taim wanpela bebi i bon, em i no save long yusim tupela lek na han bilong em. Tasol bihain, em i lain long holim ol samting na lain long wokabaut. Taim em i wok long lain gut, em i ken kamap wanpela spots man. Olsem tasol, haptaim i mas lus na yumi mas lain gut bambai yumi ken kamap strongpela Kristen.

13. Wanem samting bai helpim yumi long kisim wankain tingting olsem bilong Jehova?

¹³ Long dispela buk, yumi bin skelim hau yumi inap kisim wankain tingting olsem bilong Jehova na pilim wankain olsem em i save pilim long ol samting. Yumi lain long tingim tru na laikim ol lo bilong Jehova. Taim yumi mekim ol disisen, yumi mas askim yumi yet olsem: ‘Wanem lo o stiatok bilong Baibel i stret long dispela samting? Olsem wanem mi ken bihainim dispela lo o stiatok? Jehova i laik bai mi mekim wanem?’—Ritim Provep 3:5, 6; Jems 1:5.

14. Yumi mas mekim wanem sapos yumi laik strongim bilip bilong yumi?

¹⁴ Yumi no ken stop long strongim pasin bilong yumi long bilip long Jehova. Pasin bilong kisim helti kaikai i save helpim yumi long strongim bodi, na olsem tasol pasin bilong kisim save long Jehova bai helpim yumi long strongim bilip. Taim yumi kirap long stadi long Baibel, yumi kisim save long ol as tok i tru bilong Jehova na ol pasin bilong em. Tasol bihain, yumi mas kliagut long ol bikpela samting. Pol i tingim dispela taim em i tok: “Strongpela  kaikai em bilong ol man i bikpela pinis.” Taim yumi bihainim ol tok yumi lainim, yumi kisim savetingting. Baibel i tokim yumi olsem: “Savetingting em i bikpela samting tru.”—Provep 4:5-7; 1 Pita 2:2.

15. Em i bikpela samting olsem wanem long yumi mas laikim Jehova na ol bratasista bilong yumi?

¹⁵ Ating wanpela man i gat strong na em i helti, tasol bilong stap olsem, em i save olsem em i mas wok yet long lukautim gut em yet. Long wankain pasin, strongpela Kristen i save olsem em i mas wok hat yet bilong strongim pasin pren bilong em wantaim Jehova. Pol i tokim yumi olsem: “Oltaim yupela i mas skelim yupela yet na bai yupela i ken save olsem yupela i holimpas bilip o nogat; oltaim yupela i mas skelim yupela yet na bai yupela i ken save olsem yupela i wanem kain man.” (2 Korin 13:5) Tasol i no olsem yumi mas i gat strongpela bilip na em tasol, nogat. Pasin bilong yumi long laikim Jehova na ol bratasista bilong yumi i mas go bikpela. Pol i tok: “Sapos mi kisim . . . save, na sapos mi gat strongpela bilip inap long mi ken surikim maunten i go long narapela hap, tasol mi no gat pasin laikim, orait mi olsem samting nating.”—1 Korin 13:1-3.

16. Satan i laik bai yumi pilim olsem wanem?

¹⁶ Satan i laik bai yumi pilim olsem yumi no gutpela inap long amamasim Jehova. Em i laik bai yumi pilim bel hevi na ting olsem i no gat rot bilong stretim ol hevi bilong yumi. Em i no laik bai yumi trastim ol wanbilip Kristen, na em i no laik bai yumi stap amamas. (Efesus 2:2) Satan i save ol tingting kranki inap bagarapim yumi na pasin bilong yumi long pas gut wantaim God. Tasol Jehova i givim samting we inap helpim yumi long daunim ol tingting kranki. Em i givim gutpela samting yumi ken bilip na wet long en.

17. Olsem wanem pasin bilong bilip na wet i bikpela samting?

 ¹⁷ Long 1 Tesalonaika 5:8, Baibel i tok ol samting yumi bilip na wet long en i olsem hat kapa we i save lukautim het bilong soldia long pait, na i kolim dispela hat kapa olsem “pasin bilong bilip na wetim God i kisim bek yumi.” Pasin bilong bilip na wetim ol tok promis bilong Jehova bai lukautim tingting bilong yumi na helpim yumi long sakim ol tingting kranki.

18, 19. Olsem wanem ol samting Jisas i bilip na wet long en i strongim em?

¹⁸ Ol samting Jisas i bilip na wet long en i bin strongim em. Long laspela nait bilong laip bilong em hia long graun, em i feisim kain kain hevi. Wanpela pren bilong em i putim em long han bilong ol birua. Narapela pren i tok em i no save long em. Ol arapela i lusim em na ranawe. Na ol wanples i birua long em na strong long em i mas dai long diwai pos. Wanem samting i helpim em long karim ol dispela bikpela hevi? “Em i tingim amamas em bai kisim na dispela i helpim em long sanap strong na karim hevi long diwai pos, na em i no  wari long sem em bai kisim. Na nau em i sindaun pinis long rait han bilong sia king bilong God.”—Hibru 12:2.

¹⁹ Jisas i save taim em i stap gut long God, em bai givim glori long Papa bilong em na pruvim olsem Satan em man bilong giaman. Samting em i bilip na wet long en i givim bikpela amamas long em. Em i save tu olsem i no longtaim em bai stap gen wantaim Papa bilong em long heven. Samting em i bilip na wet long en i helpim em long sanap strong na karim hevi. Olsem Jisas, yumi tu i mas putim tingting long ol samting yumi bilip na wet long en. Dispela bai helpim yumi long sanap strong na karim hevi maski wanem samting i kamap.

20. Wanem samting inap helpim yu long holim stretpela tingting?

²⁰ Jehova i lukim bilip na pasin bilong yu long sanap strong na karim hevi. (Aisaia 30:18; ritim Malakai 3:10.) Em i tok promis long “givim yu ol samting yu laikim tru.” (Buk Song 37:4) Olsem na putim tingting bilong yu long ol samting yu bilip na wet long en. Satan i laik bai yu ting  olsem no gat gutpela samting bai kamap, na tu, ol tok promis bilong Jehova i no inap kamap tru. Tasol no ken kisim dispela tingting kranki! Sapos yu pilim olsem ol samting yu bilip na wet long en i no stap strong moa, orait askim Jehova long helpim yu. Tingim tok bilong Filipai 4:6, 7: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yupela i beten strong, na long ol beten bilong tok tenkyu long God; na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela long rot bilong Krais Jisas.”

21, 22. (a) Jehova i tingting pinis long mekim wanem samting long dispela graun? (b) Yu tingting strong long mekim wanem?

²¹ Long olgeta taim, lusim haptaim long tingim tingim ol gutpela samting bai kamap bihain. Klostu nau, olgeta man i stap laip bai lotuim Jehova. (Revelesen 7:9, 14) Tingim laip long nupela taim. Em bai gutpela tru winim ol samting yumi inap piksaim long tingting! Satan, ol dimon, na olgeta pasin nogut bai i no stap moa. Yu no inap sik, na yu no inap dai. Olgeta wan wan de, bai yu kirap wantaim bikpela strong na bai yu amamas long stap laip. Olgeta man bai wok gut wantaim na mekim graun i kamap wanpela paradais. Olgeta man bai gat gutpela kaikai na seif ples long stap long en. Ol man i no inap mekim nogut o pait long narapela, nogat, ol bai mekim gutpela pasin long narapela narapela. Bihain olgeta man long graun bai amamas long “pasin bilong i stap fri i nambawan tru olsem bilong ol pikinini bilong God.”—Rom 8:21.

²² Jehova i laik bai yu mekim em i kamap bes Pren bilong yu. So mekim olgeta samting bilong bihainim tok bilong Jehova na go klostu long em long olgeta de. Yes, i gutpela yumi olgeta i stap yet insait long pasin laikim bilong God inap oltaim oltaim!—Jut 21.