Taim Jisas, Pita, Jems, na Jon i lusim maunten na i kam daun, ol i bungim bikpela lain manmeri. Ol i luksave olsem wanpela hevi i mas kamap, long wanem, ol saveman i sanap raunim olgeta disaipel na ol i tok pait wantaim ol. Ol manmeri i kirap nogut long lukim Jisas, na ol i ron i go bungim em, na em i askim ol: “Yupela i tok pait wantaim ol long wanem samting?”—Mak 9:16.

Wanpela man namel long ol manmeri i kam na i brukim skru klostu long Jisas na i tok: “Tisa, mi bringim pikinini man bilong mi i kam long yu, long wanem, wanpela spirit nogut i save mekim man i kamap mauspas i stap long em. Na taim spirit nogut i kisim pikinini, em i save tromoi em i go daun long graun. Na spet i kamap long maus bilong en na em i kaikaim tit na strong bilong en i pinis. Mi bin tokim ol disaipel bilong yu long rausim dispela spirit nogut, tasol ol i no inap.”—Mak 9:17, 18.

Ol disaipel i no inap oraitim dispela pikinini, olsem na ol saveman bilong lo i mekim ol tok bilong daunim ol, na ating ol i tok bilas long ol. Olsem na Jisas i no bekim tok long dispela tarangu papa, nogat, em i tokim ol manmeri olsem: “Yupela lain pipol bilong dispela taim, yupela i no bilip na yupela i kranki tru. Mi mas i stap wantaim yupela inap long wanem taim? Mi mas karim hevi long yupela inap long wanem taim?” Dispela strongpela tok i makim stret ol saveman bilong lo em ol i bin kirapim tok pait wantaim ol disaipel long taim Jisas i no stap. Nau Jisas i lukluk i go long dispela papa husat i bel hevi tru na em i tok: “Bringim dispela pikinini i kam long mi.”—Matyu 17:17.

Taim ol i bringim pikinini i go long Jisas, spirit nogut i stap long em i sakim em na em i pundaun long graun. Na mangi i tantanim nabaut long graun na spet i kamap long maus bilong en. Jisas i askim papa bilong dispela pikinini olsem: “Em i stap olsem inap hamas yia?” Papa i tok: “Kirap long taim em i liklik yet. Planti taim dispela spirit nogut i save tromoi em i go insait long paia na insait long wara,  bilong kilim em i dai. Sapos yu inap mekim sampela samting, plis sori long mipela na helpim mipela.”—Mak 9:21, 22.

Papa i strong tru long Jisas i helpim em, long wanem, ol disaipel i no inap mekim olsem. Jisas i mekim gutpela tok i strongim dispela man, na em i tok: “Bilong wanem yu tok, ‘Sapos yu inap’! Sapos man i gat bilip, orait olgeta samting inap kamap.” Wantu papa i singaut olsem: “Mi gat bilip! Mekim bilip bilong mi i kamap strong moa!”—Mak 9:23, 24.

Jisas i lukim bikpela lain manmeri i ran i kam long em. Ol i lukluk yet i stap na Jisas i krosim dispela spirit nogut na i tok: “Yu spirit nogut i save mekim man i kamap mauspas na yaupas. Mi tokim yu, lusim em na no ken go insait gen long em!” Taim spirit nogut i laik lusim dispela pikinini, em i mekim na pikinini i singaut strong na i guria planti taim. Na pikinini i slip long graun na i no muv. Planti manmeri i lukim dispela samting, na ol i tok: “Em i dai pinis!” (Mak 9:25, 26) Tasol Jisas i holim han bilong pikinini na em i kirap, na “long dispela taim stret dispela pikinini i kamap orait.” (Matyu 17:18) Ol manmeri i kirap nogut tru long samting Jisas i mekim.

Paslain long dispela, Jisas i bin salim ol disaipel i go bilong autim tok na ol i bin rausim sampela spirit nogut. Olsem na taim ol i go insait long haus na ol tasol i stap wantaim Jisas, ol i askim em: “Bilong wanem mipela i no inap rausim dispela spirit nogut?” Jisas i tokaut klia olsem ol i sot long bilip, em i tok: “Beten tasol em i rot bilong rausim dispela kain spirit nogut.” (Mak 9:28, 29) Ol i mas i gat strongpela bilip na beten askim God long givim strong long ol bambai ol inap rausim ol spirit nogut.

Na bihain Jisas i tok: “Mi tok tru long yupela: Sapos bilip bilong yupela i kain olsem sais bilong sid mastet, orait bai yupela i tokim dispela maunten, ‘Kirap na go long hap,’ na bai em i kirap na i go. Na bai yupela inap mekim olgeta samting.” (Matyu 17:20) Yes, bilip i gat bikpela strong tru!

Sampela taim yumi bungim ol hevi na yumi pilim olsem i hatwok long yumi mekim wok bilong Jehova. Tasol pasin bilong bilip bai helpim yumi long karim ol hevi, maski ol dispela hevi i bikpela tru olsem ol maunten.