Jisas i bin kam long Jerusalem long bikpela bung bilong tingim dedikesen bilong tempel, em ol i kolim Hanuka. Ol i save mekim dispela bung bilong tingim namba 2 taim ol i bin dediketim tempel. Winim 100 yia paslain, King bilong Siria, em Antiokus Namba 4 Epifanes, i bin wokim wanpela alta antap long bikpela alta long tempel bilong God. Bihain ol pikinini man bilong wanpela pris bilong Juda i pait na kisim bek Jerusalem na dediketim gen tempel long Jehova. Kirap long dispela taim, ol i save mekim dispela bung long olgeta yia long de namba 25 long mun Kislev, em kirap bilong laspela hap bilong Novemba i go inap long namba 1 hap bilong Disemba.

Em i taim bilong kol. Na Jisas i wokabaut long veranda bilong Solomon long tempel. Long dispela hap, ol Juda i kam raunim em na tok strong olsem: “Wanem taim bai yu tokaut klia long mipela? Sapos yu Krais, orait tok stret long mipela.” (Jon 10:22-24) Jisas bai bekim wanem tok? Em i tok: “Mi tokim yupela pinis, tasol yupela i no bilip.” Jisas i no tokaut stret long ol olsem em i Krais, olsem em i bin tokim meri Samaria long hulwara. (Jon 4:25, 26) Tasol bipo em i bin tokim ol, olsem: “Taim Abraham i no kamap yet, mi bin stap.”—Jon 8:58.

Jisas i laik bai ol manmeri yet i mas luksave olsem em i dispela Krais taim ol i skelim ol wok em i mekim wantaim ol samting em ol tok profet i tok Krais bai mekim. Em as na sampela taim em i tokim ol disaipel bilong em long ol i no ken tokim ol man olsem em i Mesaia. Tasol nau em i tokaut stret long ol dispela Juda, olsem: “Ol wok mi mekim long nem bilong Papa bilong mi, ol dispela wok i tokaut long mi. Tasol yupela i no bilip.”—Jon 10:25, 26.

Wai na ol i no bilip olsem Jisas em i Krais? Em i tok: “Yupela i no bilip, long wanem, yupela i no sipsip bilong mi. Ol sipsip bilong mi i save putim yau long nek bilong mi, na mi save long ol na ol i save bihainim mi. Na mi givim laip oltaim long ol, na ol bai i no bagarap, nogat tru, na i no gat man bai rausim ol long han bilong mi. Ol sipsip em Papa i givim mi i winim olgeta arapela samting.” Jisas i tokim ol long pasin bilong em long pas gut wantaim Papa bilong em, em i tok: “Mi na Papa i wanpela.” (Jon 10:26-30) Jisas i stap long graun na Papa bilong em i stap long heven, so tok em i mekim i no makim olsem em na Papa bilong em i wanpela bodi, nogat. Tupela i stap wanbel na ol i gat wankain tingting long samting ol i laik mekim.

Tok bilong Jisas i mekim ol Juda i belhat nogut tru na ol i kisim gen ol ston bilong kilim em i dai. Tasol Jisas i no pret. Em i tokim ol: “Mi bin soim yupela planti gutpela wok i kam long Papa. Orait wanem wok stret i kirapim yupela na yupela i laik stonim mi?” Ol i tok, “Gutpela wok i no as na mipela i laik stonim yu, nogat, mipela i laik stonim yu long tok nogut yu bin mekim. . . . Yu mekim olsem yu wanpela god.” (Jon 10:31-33) I no gat wanpela taim Jisas i bin tok em i wanpela god, so wai na ol i sutim dispela tok long em?

Jisas i tokaut long sampela strong em i holim, tasol ol Juda i bilip olsem God tasol i holim dispela kain strong. Olsem, Jisas i bin tok long ol “sipsip” olsem “mi givim laip oltaim long ol,” em samting ol man bilong graun i no inap mekim. (Jon 10:28) Ol Juda i no tingim olsem Jisas i bin tokaut long ples klia olsem em i bin kisim dispela namba long Papa bilong em.

Jisas i bekim tok bilong soim olsem ol i sutim tok giaman long em, na em i tok: “Lo bilong yupela i gat wanpela tok bilong God olsem [long Song 82:6], ‘Mi tok: “Yupela i god.”’ God i mekim dispela tok ‘yupela i god’ long ol man em tok bilong em i kotim ol . . . . Tasol mi, mi dispela man em Papa i makim na salim i kam long ol manmeri, orait olsem wanem yupela i tokim mi, ‘Yu tok nogut,’ long wanem, mi bin tok mi Pikinini bilong God?”—Jon 10:34-36.

Yes, Baibel tu i kolim sampela jas olsem “god” maski ol i no stretpela man. So i no gat as na ol dispela Juda i tok Jisas i mekim rong taim em i tok “mi Pikinini bilong God.” Nau em i toktok long samting we i mas kirapim ol long bilipim em, em i tok: “Sapos mi no mekim ol wok bilong Papa bilong mi, orait yupela i no ken bilipim mi. Tasol sapos mi mekim ol wok  bilong Papa bilong mi, orait maski yupela i no bilipim mi, yupela i mas bilip long ol dispela wok, bai yupela i ken kisim save na oltaim bilip olsem Papa i stap wanbel wantaim mi na mi stap wanbel wantaim Papa.”—Jon 10:37, 38.

Taim ol Juda i harim dispela tok, ol i laik holimpasim Jisas, tasol em i ranawe gen. Em i lusim Jerusalem na i go long hapsait bilong wara Jordan long hap we Jon i kirap long baptaisim ol manmeri klostu 4-pela yia i go pinis. I luk olsem dispela hap i klostu long hap saut bilong raunwara Galili.

Planti manmeri i kam long Jisas na ol i tok: “Tru tumas Jon i no bin wokim wanpela mirakel, tasol olgeta tok Jon i bin mekim long dispela man, olgeta i tru.” (Jon 10:41) Olsem na planti Juda i bilip long Jisas.