Taim Jisas i wok long skulim ol manmeri long Judia, em i stori long samting ol i save gut long en, em sipsip na banis sipsip. Tasol em i mekim olsem tok piksa. Ating ol Juda i tingim tok Devit i mekim, olsem: “Bikpela em i wasman bilong mi. Olsem na mi no inap sot long wanpela samting. Em i mekim mi i slip long gutpela gras.” (Song 23:1, 2) Long narapela song, Devit i bin tokim lain Israel olsem: “Bikpela i bin wokim yumi. . . . Yumi go klostu long em na brukim skru. Em yet i God bilong yumi. Em yet i save lukautim yumi manmeri bilong en olsem ol sipsip.” (Song 95:6, 7) Yes, lain Israel em ol i aninit long Lo, ol i olsem wanpela lain sipsip.

Ol manmeri bilong Israel i bin bon insait long lain we i stap aninit long kontrak bilong Lo Bilong Moses, na ol i olsem “ol sipsip” i bin stap insait long “banis bilong sipsip.” Lo i stap olsem banis na i lukautim ol na ol pasin nogut bilong ol manmeri em ol i no stap aninit long Lo i no ken kam insait. Tasol sampela Israel i mekim nogut long ol sipsip bilong God. Jisas i tok: “Tru tumas mi tokim yupela, Man i no go insait long dua bilong banis bilong sipsip, tasol em i kalapim banis long narapela hap na i go insait, dispela man em i wanpela stilman na raskol. Tasol man i save go insait long dua, em i wasman bilong ol sipsip.”—Jon 10:1, 2.

Ating ol manmeri bai tingim sampela man em ol i kolim ol yet olsem ol i dispela Mesaia o Krais. Ol dispela kain man i olsem ol stilman na ol raskol. Ol manmeri i no ken bihainim ol kain giaman man olsem, nogat. Ol i mas bihainim “wasman bilong ol sipsip,” em man Jisas i tok long em olsem:

“Wasman bilong dua i save opim dua long dispela man, na ol sipsip i save putim yau long nek bilong em. Na em i save kolim nem bilong ol sipsip bilong em yet na bringim ol i kam ausait. Taim em i kisim olgeta sipsip bilong en i kam ausait, em i save go pas long ol. Na ol sipsip i bihainim em i go, long wanem, ol i save long nek bilong en. Ol bai i no inap bihainim man ol i no save long en, nogat. Bai ol i ranawe long em, long wanem, ol i no save long nek bilong em.”—Jon 10:3-5.

Jon Bilong Baptais em i olsem wasman bilong dua, em i tok Jisas i dispela man em ol man husat i olsem sipsip i stap aninit long Lo, ol i mas bihainim em. Na sampela long Galili na hia long Judia, em ol i olsem sipsip, ol i luksave long nek bilong Jisas. Em bai “bringim ol i kam ausait” na kisim ol i go long wanem hap? Na wanem gutpela samting bai kamap long ol man i bihainim em? Sampela man i harim dispela tok piksa i tingting planti bikos “ol i no kliagut long mining bilong tok em i mekim long ol.”—Jon 10:6.

Jisas i stori gut long dispela na tok: “Tru tumas mi tokim yupela, Mi dua bilong ol sipsip. Olgeta man husat i bin kam na giaman na yusim nem bilong mi, ol i stilman na raskol. Tasol ol sipsip i no bihainim ol. Mi dispela dua. Husat man i kam insait long rot bilong mi, God bai kisim bek em. Na em bai go insait na kam ausait na stap long ples i gat gutpela gras.”—Jon 10:7-9.

Yes, Jisas i kamapim wanpela nupela samting. Ol man i putim yau i save olsem em i no dispela dua bilong kontrak bilong Lo we i bin stap inap planti handret yia pinis. So ating em i laik tok ol sipsip em i “bringim ol i kam ausait,” em bai kisim i go insait long narapela banis bilong sipsip. Sapos olsem, wanem samting bai kamap?

Jisas i stori moa long wok bilong em, na em i tok: “Mi kam bilong ol i ken kisim laip, na bilong laip i ken pulap tru long ol. Mi gutpela wasman bilong sipsip. Gutpela wasman i save lusim laip bilong en bilong helpim ol sipsip.” (Jon 10:10, 11) I no longtaim i go pinis, Jisas i bin strongim ol disaipel na tok: “Yupela liklik lain sipsip, yupela i no ken pret. Papa bilong yupela i orait long givim Kingdom long yupela.” (Luk 12:32) Tru tumas, ol manmeri em ol i insait long dispela “liklik lain sipsip,” Jisas bai bringim ol i go long nupela banis sipsip na bai ol i ken “kisim laip, na bilong laip i ken pulap tru long ol.” Man! Em gutpela blesing tru long kamap hap bilong dispela lain sipsip!

 Jisas i kamapim sampela moa tok, olsem: “Mi gat ol arapela sipsip, na ol i no bilong dispela banis. Mi mas bringim ol tu i kam, na ol bai putim yau long nek bilong mi. Na olgeta bai kamap olsem wanpela lain sipsip i gat wanpela wasman.” (Jon 10:16) Ol dispela “arapela sipsip,” ol i “no bilong dispela banis.” So i luk olsem i mas i gat narapela banis i stap, na dispela banis i no wankain long banis bilong “liklik lain sipsip” em ol bai kisim Kingdom. Narapela narapela samting bai painim ol sipsip i stap long dispela tupela banis. Maski i olsem, olgeta sipsip bai kisim helpim long wok Jisas i mekim. Em i tok: “Papa i laikim mi, long wanem, mi lusim laip bilong mi.”—Jon 10:17.

Planti manmeri i tok: “Em i gat wanpela spirit nogut na em i longlong.” Tasol sampela i soim olsem ol i gat laik tru long harim tok na ol i laik bihainim dispela Gutpela Wasman. Ol i tok: “Dispela em i no tok bilong wanpela man em spirit nogut i stap long em, nogat. Spirit nogut i no inap opim ai bilong ol aipas.” (Jon 10:20, 21) Ating ol i tingim samting Jisas i bin mekim long pastaim, em i oraitim man i bin bon aipas.