Ol Farisi i no laik bilip olsem Jisas i bin oraitim dispela man i bon aipas, olsem na ol i singautim papamama bilong em i kam. Papamama bilong em i save olsem ol Juda inap ‘rausim ol long sinagog.’ (Jon 9:22) Sapos dispela i kamap, ol i no inap bung moa wantaim ol Juda na dispela inap givim hevi long ol long sait bilong wok mani samting, na pasin bilong ol long pas gut wantaim ol narapela long komiuniti.

Ol Farisi i givim tupela askim, ol i tok: “Dispela em i pikinini bilong yutupela na yutupela i tok em i aipas taim mama i karim em, a? Orait olsem wanem na nau em inap lukluk?” Papamama i tok: “Mitupela i save olsem em i pikinini bilong mitupela na em i aipas taim mama i karim em. Tasol mitupela i no save olsem wanem na nau em inap lukluk, na mitupela i no save husat i opim ai bilong em.” Ating pikinini bilong tupela i bin tokim ol long samting i kamap, tasol tupela i skelim gut tok ol bai mekim na ol i tok: “Yupela askim em. Em i bikpela pinis. Em yet i mas toktok.”—Jon 9:19-21.

Olsem na ol Farisi i singautim dispela man i kam na ol i mekim ol tok bilong pretim em, ol i tok ol i gat evidens bilong kotim Jisas. Ol i tok: “Long ai bilong God, yu mas tok tru. Mipela i save olsem dispela man em i wanpela sinman.” Dispela man i no laik wanbel long tok bilong ol, olsem na em i tok: “Em i wanpela sinman o nogat, mi no save. Wanpela samting mi save long en i olsem, bipo mi aipas, tasol nau mi inap lukluk.”—Jon 9:24, 25.

Ol Farisi i laik sutim tok long Jisas, olsem na ol i tok: “Em i mekim wanem long yu? Olsem wanem em i opim ai bilong yu?” Dispela man i strongim bel na i tok: “Mi tokim yupela pinis, tasol yupela i no laik harim. Bilong wanem yupela i laik harim gen? Ating yupela tu i laik kamap disaipel bilong en, a?” Ol Farisi i belhat nogut tru, na ol i tok: “Yu wanpela disaipel bilong dispela man, tasol mipela ol disaipel bilong Moses. Mipela i save olsem God i bin toktok long Moses. Tasol dispela man hia, mipela i no save em i kam long we.”—Jon 9:26-29.

Dispela rabisman i kirap nogut na em i tok: “Dispela em i narakain tru, em i bin opim ai bilong mi, tasol yupela i no save em i kam long we.” Orait em i stori long ol long God i save orait long husat na em i harim beten bilong ol. Em i tok: “Yumi save olsem God i no save harim beten bilong ol sinman, tasol sapos man i pret long God na bihainim laik bilong em, orait God i save harim beten bilong dispela man. Long bipo yet i no gat stori bilong wanpela man i opim ai bilong man i aipas taim mama i karim em.” Na em i pinisim tok olsem: “Sapos dispela man i no kam long God, em i no inap mekim wanpela samting.”—Jon 9:30-33.

Ol Farisi i no inap painim rong long tok bilong dispela rabisman, olsem na ol i mekim tok bilong daunim em, olsem: “Sin i pas tru long yu taim mama i karim yu, tasol nau yu laik skulim mipela, a?” Na ol i rausim em i go.—Jon 9:34.

Taim Jisas i harim stori long dispela samting, em i go painim dispela man na i askim em: “Yu bilip long Pikinini bilong man?” Dispela man i kamap orait i tok: “Bikman, em i husat na mi ken bilip long em?” Jisas i tokaut stret long em: “Yu lukim em pinis, na man i toktok wantaim yu, em i dispela man.”—Jon 9:35-37.

Na dispela man i tok: “Bikpela, mi bilip long em.” Na em i brukim skru long Jisas bilong soim olsem em i bilip na rispektim Jisas. Na Jisas i mekim wanpela bikpela tok, em i tok: “Mi kam long dispela graun bai God i ken skelim ol manmeri, bai ol aipas i ken lukluk na ol man husat i lukluk ol i ken kamap aipas.”—Jon 9:38, 39.

Ol Farisi i harim tok Jisas i mekim i save olsem ol i no aipas. Tasol olsem wanem long wok bilong ol long soim rot long ol manmeri long sait bilong bilip? Bilong haitim rong bilong ol, ol i askim Jisas: “Mipela tu i aipas, a?” Jisas i tok: “Sapos yupela i aipas, yupela bai i no gat sin. Tasol nau yupela i tok, ‘Mipela inap lukluk.’ Olsem na sin bilong yupela i stap yet.” (Jon 9:40, 41) Ol Farisi i stap olsem ol tisa bilong lotu long Israel na ol i save gut long tok bilong Lo, olsem na i no stret long ol i sakim Jisas. Ol i mekim bikpela sin tru.