Sikspela mun bihain long Jon Bilong Baptais i kirap long autim tok, Jisas husat i gat 30 krismas long dispela taim i kam bungim em long wara Jordan. Bilong wanem em i go lukim Jon? Em i no go bilong raun nating, o bilong skelim wok bilong em, nogat. Jisas i go bilong askim Jon long kisim baptais.

Tasol Jon i laik pasim Jisas, olsem na em i tok: “Olsem wanem yu kam long mi? Mobeta yu baptaisim mi.” (Matyu 3:14) Jon i save olsem Jisas em Pikinini God i laikim tumas. Tingim, taim Maria i gat bel long Jisas na em i go lukim Elisabet, bebi Jon i stap long bel bilong Elisabet i amamas na i kalap. Ating bihain mama bilong Jon i tokim em long dispela samting. Na ating em i kisim save tu long ol ensel i tokaut long mama i karim Jisas, na tu, ol ensel i bin kamap long ol wasman bilong sipsip long nait taim Jisas i bon.

Jon i save olsem ol man husat i kam long em na kisim baptais, dispela i makim olsem ol i tanim bel pinis long ol rong ol i bin mekim. Tasol Jisas i no gat sin. Olsem na Jon i no laik baptaisim Jisas, tasol Jisas i tok: “No ken pasim mi, i gutpela long yumi inapim olgeta samting i stretpela long dispela rot.”—Matyu 3:15.

Bilong wanem i stret long Jisas i kisim baptais? Baptais bilong Jisas i no makim olsem em i tanim bel long ol sin em i bin mekim, nogat. Baptais bilong em i makim olsem em i givim em yet bilong mekim laik bilong Papa bilong em. (Hibru 10:5-7) Jisas i bin mekim wok kapenta, tasol nau em taim bilong em long kirap mekim wok Papa bilong em long heven i salim em long mekim. Yu ting Jon i save olsem wanpela narakain samting bai kamap taim Jisas i kisim baptais?

Bihain Jon i tok: “Man i bin salim mi i kam long baptaisim ol man long wara, em i tokim mi, ‘Dispela man yu lukim holi spirit i kam daun na i go i stap long em, dispela em man bilong baptaisim ol man long holi spirit.’” (Jon 1:33) Jon i save olsem holi spirit bilong God bai kam antap long wanpela bilong ol man husat i kam long em bilong kisim baptais. Olsem na taim Jisas i lusim wara na i kam antap, Jon i no kirap nogut long lukim “spirit bilong God i kam daun long [Jisas] olsem wanpela pisin balus.”—Matyu 3:16.

Tasol planti samting i bin kamap taim Jisas i kisim baptais. Em i lukim “skai i op.” Na dispela i makim wanem samting? Dispela i makim olsem taim  Jisas i kisim baptais, em i tingim i stap bilong em long heven. Jisas inap tingim olgeta samting em i bin mekim taim em i stap pikinini spirit bilong Jehova, na tu, em inap tingim olgeta tok God i givim long em paslain long em i kam long graun.

Na tu, taim Jisas i kisim baptais em i harim wanpela nek i kamap long heven na i tok: “Dispela em i Pikinini bilong mi, mi laikim em tumas na mi amamas long em.” (Matyu 3:17) Em nek bilong husat? Yu ting em nek bilong Jisas? Nogat, bikos long dispela taim em i stap wantaim Jon. I klia tru olsem em nek bilong God. Tru tumas, Jisas em i Pikinini bilong God, na em i no God.

Taim Jisas i stap long graun, em i Pikinini bilong God long graun, wankain olsem namba wan man Adam. Bihain, Luk i stori long baptais bilong Jisas, na i tok: “Taim Jisas i kirapim wok bilong en, em i gat 30 krismas. Na long tingting bilong ol man, em i pikinini bilong Josep, Josep em i pikinini bilong Heli, . . . pikinini bilong Devit, . . . pikinini bilong Abraham, . . . pikinini bilong Noa, . . . pikinini bilong Adam, Adam em i pikinini bilong God.”—Luk 3:23-38.

Wankain olsem Adam em i “pikinini bilong God” long graun, Jisas tu em i Pikinini bilong God. Taim Jisas i kisim baptais, God i makim em long holi spirit na em i kamap Pikinini spirit bilong God. Olsem na Jisas i gat namba long skulim ol man long tok i tru bilong God na soim ol long rot bilong kisim laip. Nau Jisas i kirap long mekim wanpela wok bilong helpim ol manmeri, na i no longtaim em bai givim laip bilong em olsem ofa bilong baim bek ol manmeri i gat sin.