Tenpela de bihain long Jisas i go long heven, ol disaipel i kisim holi spirit long de Pentikos, na i gat sampela samting moa i kamap bilong soim klia olsem Jisas i stap pinis long heven. Disaipel Stiven i mekim gut wok bilong autim tok, olsem na ol birua i stonim em. Paslain long em i dai, em i tok: “Harim! Mi lukim skai i op na Pikinini bilong man i sanap long han sut bilong God.”—Aposel 7:56.

Taim Jisas i stap wantaim Papa long heven, em i wet inap long God i tokim em long mekim wanpela samting olsem Rait Holi i tokaut long en. God i stiaim Devit long tok: “Bikpela i tokim Bikpela bilong mi olsem, ‘Yu sindaun long han sut bilong mi inap mi putim ol birua bilong yu i stap aninit long yu.’” Jisas bai wet inap long taim i kamap, na em bai “bosim ol birua bilong [em].” (Song 110:1, 2) Jisas i mekim wanem long taim em i wet long daunim ol birua bilong em?

Long Pentikos 33 C.E., kongrigesen Kristen i kirap nupela. Long heven, Jisas i kirap long bosim ol disaipel, em ol Kristen God i bin makim long holi spirit. (Kolosi 1:13) Em i stiaim ol taim ol i autim tok, na em i redim ol long wok ol bai mekim long bihain. Ol bai mekim wanem wok? Ol disaipel husat i stap gut long God i go inap long ol i dai, ol bai kirap bek na mekim wok king wantaim Jisas long Kingdom.

Wanpela bilong ol disaipel husat bai kamap king long bihain em Sol, nem bilong em long tok Rom em Pol. Em i bilong lain Juda na em i givim bel tru long bihainim Lo Bilong God, tasol em i bihainim tingting bilong ol hetman bilong lotu Juda, olsem na em i tok orait long ol manmeri long stonim Stiven. Sol i “strong yet long bagarapim ol disaipel bilong Bikpela na kilim ol i dai,” olsem na em i go long Damaskus. Hetpris Kaiafas i givim tok orait long em long arestim ol disaipel bilong Jisas na bringim ol i go bek long Jerusalem. (Aposel 7:58; 9:1) Tasol taim Sol i go yet long rot, strongpela lait long skai i sut i kam long em na em i pundaun long graun.

Em i harim wanpela nek i tok: “Sol, Sol, bilong wanem yu wok long mekim nogut long mi?” Sol i tok: “Bikpela, yu husat?” Na nek i tok: “Mi Jisas, mi dispela man yu wok long mekim nogut long en.”—Aposel 9:4, 5.

Jisas i tokim Sol long i go long Damaskus na wet inap long em i givim sampela tok moa long em.  Tasol ol narapela i mas stiaim Sol i go long Damaskus bikos lait i mekim na em i kamap aipas. Long narapela visen, Jisas i kamap long Ananaias, em wanpela disaipel bilong Jisas long Damaskus. Jisas i tokim Ananaias long rot em i mas bihainim na haus em i mas i go long en bilong bungim Sol. Ananaias i pret long mekim olsem, tasol Jisas i strongim em na i tok: “Dispela man i olsem wanpela sospen mi makim bilong karim nem bilong mi i go long ol lain manmeri, na long ol king na long ol manmeri bilong Israel.” Ai bilong Sol i kamap orait gen, na taim em i stap long Damaskus, em i “autim tok long ol man long Jisas, olsem dispela Man em i Pikinini Bilong God.”—Aposel 9:15, 20.

Jisas i sambai long Pol na ol narapela disaipel, na ol i mekim yet wok bilong autim tok, em dispela wok Jisas i bin kirapim. God i blesim wok bilong ol na gutpela samting tru i kamap. Inap olsem 25 yia bihain long Jisas i kamap long Pol long rot i go long Damaskus, Pol i raitim tok olsem “ol i bin autim dispela gutnius long olgeta hap bilong graun aninit long skai.”—Kolosi 1:23.

Inap planti yia bihain, Jisas i opim rot long aposel Jon, em disaipel em i laikim tumas, long lukim planti visen na em i raitim stori bilong ol dispela visen long Buk Revelesen long Baibel. Long rot bilong ol dispela visen, i olsem Jon i stap yet inap long em i lukim Jisas i kam bek olsem king long Kingdom. (Jon 21:22) “Long rot bilong holi spirit [Jon i] lukim olsem [em i] stap long de bilong Bikpela.” (Revelesen 1:10) Dispela “de bilong Bikpela” i kamap long wanem taim?

Sapos yumi skelim gut ol tok profet bilong Baibel, yumi bai luksave olsem “de bilong Bikpela” i kamap long taim bilong yumi. Long 1914, Wol Woa 1 i kirap. Long ol yia bihain long 1914, planti hevi i kamap, olsem ol pait, bikpela sik, bikpela hangre, guria, na ol dispela hevi i stap olsem “sain” em Jisas i tokim ol aposel long en i makim olsem em i “kam i stap” na “pinis” i laik kamap. (Matyu 24:3, 7, 8, 14) Long nau, ol disaipel i mekim wok bilong autim gutnius bilong Kingdom long ol hap em Gavman Rom i bosim, na tu, ol i autim dispela gutnius long olgeta hap bilong graun.

Holi spirit i kirapim Jon long stori gut moa long dispela samting, na em i tok: “Nau wok bilong God long kisim bek ol manmeri, na strong bilong en, na kingdom bilong God bilong yumi, na wok bos bilong Krais bilong em, olgeta dispela samting i kamap pinis.” (Revelesen 12:10) Em nau, Kingdom Bilong God long heven em Jisas i bin autim tok long en, em i wanpela gavman i stap tru!

Olgeta gutpela disaipel bilong Jisas i amamas tru long harim dispela tok. Ol i pilim tru tok bilong Jon, em i tok: “Yupela heven na yupela husat i stap long en, yupela i ken amamas! Tasol yu graun na yu solwara, yupela lukaut, long wanem, Satan i kam daun pinis long yupela, na em i belhat nogut tru, em i save em i gat sotpela taim tasol bilong i stap.”—Revelesen 12:12.

Olsem na Jisas i no sindaun moa long han sut bilong Papa na wet i stap, nogat. Em i mekim wok olsem King, na klostu nau em bai bagarapim olgeta birua bilong em. (Hibru 10:12, 13) Orait, yumi inap wetim wanem ol gutpela samting i kamap?